2 Mi̱ko 22 - Chahta Holisso Holitopa 1886

¹ Chosiah ʋt mi̱ko mʋt, afʋmmi untuchina hatok; atuk osh afʋmmi pokoli tuchina akucha achʋfa ho̱ Chelusalem a̱ ʋttʋt mi̱ko tok: micha ishki ʋt Boskalh ʋtta Ataiah ushetik osh hohchifo kʋt Chetitah atok.

² Chihowa itikba ya̱ aiʋlhpiesa kak o̱ yʋmohmit, i̱ki Lewi ata̱ya moma kak o̱ a noho̱wa cha, naksika ishtimpakimma, keyukmʋt ʋlhfʋbekimma kanima ka pit ik fulloto tok.

³ Atuk o̱ yakohmi tok, Chosiah ʋt mi̱ko tok afʋmmi ont isht auahuntuchina mʋt, mi̱ko ʋt Meshullam ushi Asaliah ya̱ ushi holissochi Shafan a̱ Chihowa in chuka ya̱ pit pilʋt,

⁴ Naholitompa isht ʋtta i̱ shahli Hilkiah ya̱ ish im ona na Chihowa in chuka ya̱ tʋli holisso isht ʋla na okhissa apistikeli ʋhleha hʋt okla ha̱ im ai ishit itahobbi chatuk a̱ hotihnashke.

⁵ Micha toksʋli isht asha Chihowa in chuka apesʋchi ʋhleha ha̱ ibbak fohkashke, mikma atoksʋli Chihowa in chuka aiasha isht asha ya̱ okla ima na aboha akinafa ya̱ okla aiiskiachashke,

⁶ Chuka ikbi puta, micha itabʋnni puta, micha tʋli pilesa puta aiena ka okla imashke, micha iti, micha tʋli tʋhla aiena ka ishit chumpa cha, aboha ya̱ isht aiiskiachashke.

⁷ Yohmi kia tʋli holisso ya̱ ibbak a̱ fohki kʋt iti̱ hotihna he keyu; aiʋlhpiesa kak o̱ yʋmohmi hoka, achi tok.

⁸ Mihma naholitompa isht ʋtta i̱ shahli Hilkiah ʋt holissochi Shafan a̱, Nan ʋlhpisa holisso hʋt Chihowa in chuka itoyula na pisa lishke, im achi tok; micha Hilkiah ʋt holisso hash Shafan a̱ ima na itim anumpuli tok.

⁹ Mihma Shafan ʋt mi̱ko ya̱ anumpa falama isht im ʋla mʋt, Chin tishu ʋhleha hʋt tʋli holisso ʋt Chihowa in chuka aiasha tuk a̱ e tosholi cha, toksʋli isht asha Chihowa in chuka apesʋchi ʋhleha ibbak a̱ e fohkishke, achi tok.

¹⁰ Mihmʋt holissochi Shafan ʋt mi̱ko ya̱ im anolit, Naholitompa isht ʋtta Hilkiah ʋt holisso ho̱ sʋbbak a̱ fohkishke, achi tok: mihmʋt Shafan ʋt mi̱ko itikba ya̱ ai itim anumpuli tok.

¹¹ Atuk o̱ yakohmi tok, mi̱ko ʋt nan ʋlhpisa holisso hash im anumpa ha̱ haklo mʋt, i̱ nafohka ya̱ hlilʋffi tok.

¹² Mihmʋt mi̱ko ʋt naholitompa isht ʋtta Hilkiah, micha Shafan ushi Ahikam, micha Michaiah ushi Achbo, micha holissochi Shafan, micha mi̱ko in tishu Asahiah aiena ka im apesʋt,

¹³ Oh ia cha, ʋno, micha okla, micha Chutah moma, anumpa hʋt holisso haiaka ilʋppa takali ka Chihowa ya̱ ishit hʋsh pim i̱ ponaklashke: pi̱ki ʋhleha hʋt holisso ilʋppa anumpa takali ka ik haponaklot, nana moma ishit pi anumpulit holissochi tok a̱ ik yʋmihcho tok o̱, Chihowa im ai i̱ nukkilli ʋt pi̱ sanaht libbi fehna hoka, achi tok.

¹⁴ Mihma naholitompa isht ʋtta Hilkiah, micha Ahikam, micha Achbo, micha Shafan, micha Asahiah aiena kʋt nafohka aiasha apistikeli Hahas a̱ ushi Tikfah ya̱ ushi Shallum tekchi ohoyo hopaii Hultah ya̱ im ona tok: (mihma yʋmmʋt Chelusalem a̱ atukla yak o̱ ʋtta hatok;) micha okla itim anumpuli tok.

¹⁵ Mihma, Islael in Chitokaka Chihowa yʋt yak achishke, Hatak ʋt et hʋchi pila na hʋs sʋm ʋla tuk a̱,

¹⁶ Chihowa yʋt yak achishko, Yakeh! nana ik achukmo ka tʋmaha ilʋppa, micha okla aiasha ka holisso Chutah i̱ mi̱ko ʋt itim anumpuli tuk ash anumpa takali tuk moma ka onochi la chi̱ hoke.

¹⁷ Ibbak nan ishit toksʋli moma ishit sa nokowʋcha chi̱ kʋt sa kanchi cha, chitokaka inla puta ka nabalama i̱ hukmi tuk oka, ʋlhtoba hosh ʋm ai i̱ nukkilli ʋt tʋmaha ilʋppa i̱ sanalit libba chi̱ hoke, micha moshola he keyu hoke, hʋsh im achashke.

¹⁸ Amba Chutah i̱ mi̱ko ʋt Chihowa i̱ ponakla chi̱ hosh et hʋchi tihleli tuk ano yak hʋsh im achashke, Anumpa ish haiyaklo tuk okʋno Islael in Chitokaka Chihowa yʋt yak achishke,

¹⁹ Chi chu̱kʋsh ʋt waloha cha, tʋmaha ilʋppa i̱ sanalit, micha okla aiasha ka i̱ sanalit anumpulit, Chukilissʋt kalakshit taha chi̱ hoke, achi li tuk a̱ ish haklo mʋt, Chihowa itikba ya̱ il akanlosichit chi̱ nafohka ish hlilʋffi cha, sa tikba ya̱ chi nishkin okchi mihinti hoka, ʋno ak kia chi haiyaklo lishke, Chihowa yʋt achishke.

²⁰ Yʋmohmi hoka yakeh! chi̱ki ʋhleha ha̱ ta̱kla chiba?-?fohki la chi̱ hoke; mikma chim ahollohpi ya̱ nuktaiyalʋt ish ona chi̱ hoke; mikma chi nishkin ʋt tʋmaha ilʋppa nana ik achukmo moma onochi la chi̱ ka ik peso ka chi̱ hoke, im achi tok. Mihma mi̱ko ya̱ anumpa falama ya̱ okla isht im ona tok.