2 Mi̱ko 21 - Chahta Holisso Holitopa 1886

¹ Manasseh ʋt mi̱ko mʋt, afʋmmi auahtuklo tuk osh, afʋmmi pokoli tahlapi akucha tahlapi ho̱ Chelusalem a̱ ʋttʋt mi̱ko tok: mihma ishki hohchifo kʋt Hefsi‐bah atok.

² Atuk osh Chihowa itikba ya̱ nana ik achukmo kak o̱ yʋmohmit, oklushi puta nan ashʋchi ishit yuwala yumihchi ho̱ yʋmma Chihowa yʋt Islael im ʋlla ʋhleha itikba ya̱ a tihlelit kocha wehli tok ak o̱ yʋmohmi tok.

³ Micha achahaka puta ka i̱ki Hesekiah ʋt okpʋnit tahli tok a̱ anonti ikbi tok: micha Islael i̱ mi̱ko Ahab atok a̱ chohmit Baal a̱ alta puta im ikbi cha, Ashelah ha̱ ikbi tok: micha ʋba shutik nana puta moma ka im akachunolit im antia beka tok.

⁴ Micha Chihowa in chuka yʋmmak oka Chihowa yʋt, Chelusalem ak o̱ sa hohchifo ha̱ a bohli la chi̱ hoke, achi tok a̱ alta puta ai ikbi tok.

⁵ Micha ʋba shutik nana puta moma ka Chihowa in chuka i̱ wanuta tuklo ka̱ alta puta im ai ikbi tok.

⁶ Micha ushi ya̱ luak hlopullichi cha, hoshonti kak o̱ nan isht ithʋna, micha fʋppuli, micha nana ahulhkunna, micha ishtahullo puta atokolit ahanta beka tok: Chihowa itikba ya̱ nan ashʋchi fehna ka yʋmihchi cha, nokowʋchi tok.

⁷ Micha tihlit inchonlit Ashelah naholbʋt toba ikbi tuk ʋt chuka yash anu̱kaka hilechi tok, chuka yʋmmak oka Chihowa yʋt Lewi, micha ushi Solomon a̱, Chuka ilʋppak o̱, micha Chelusalem, yʋmmak o̱ Islael apehlichika puta moma a kohchit atokolit, sa hohchifo ha̱ bohli li̱ bilia chi̱ hoke

⁸ Micha yakni ya̱ i̱ki ʋhleha ima li tok ʋt himakma Islael iyi ya̱ a kohchit fulohlihinchi la he keyu hoke: peh nana im anumpohonli li tok moma, micha an tishu Moses ʋt im anumpohonli tok nan ʋlhpisa moma kak o̱ holitoblikmá, im achi tok.

⁹ Yohmi kia okla ik haponaklo tok: micha Manasseh ʋt yoshublit nana ik achukmo kak o̱ yʋmihchechi kʋt oklushi moma Islael itikba ya̱ Chihowa yʋt ai ishit kanchi tok ak kia i̱ shahlichi tok.

¹⁰ Mihma Chihowa yʋt in tishu ʋhleha hopaii ya̱ tohnot anumpulit,

¹¹ Chutah i̱ mi̱ko Manasseh ʋt nan ashʋchi ishit yuwala ilʋppa puta ka yʋmihinchi cha, nahaksi yʋmihchi kʋt tikba aiasha tok Amolait ʋhleha hʋt nan ashʋchi tok a̱ i̱ shahlichit, i̱ naholbʋt toba puta ka Chutah ya̱ isht ashʋchechi hoka;

¹² Yʋmohmi hoka Islael in Chitokaka Chihowa yʋt yak achishke, Yakeh! Chelusalem, micha Chutah ya̱ nana ik achukmo ka onochi likma, kʋna hosh haklokmʋt, haksobish itichampa kʋt cha̱sa hi oke.

¹³ Micha Chelusalem a̱ Samalia aseta isht ʋlhpisa, micha Ahab in chuka achʋfa isht itilauechi ya̱ o̱ shebli la chi̱ hoke: micha kʋna kia ampo kasholichi, kasholichi cha, hlipeli chatuk a̱ chohmichit Chelusalem a̱ kasholichi la chi̱ hoke.

¹⁴ Micha ʋm okla atok atampa ya̱ kanchi la chi̱ hoke, micha in tʋnʋp puta ibbak a̱ fohki la chi̱ hoke: mikma in tʋnʋp puta moma kʋt yukachit wehpula chi̱ hoke.

¹⁵ I̱ki ʋhleha hʋt Echip a̱ a kohchʋt minti tok takla himak nitak ant ʋhli ka sa tikba ya̱ nana ik achukmo kak o̱ yʋmohmit sa nokowʋchi tuk oka, achi tok.

¹⁶ Micha Manasseh ʋt Chutah ya̱ yoshublichit Chihowa itikba ya̱ nana ik achukmo kak o̱ yʋmihchechi mʋt, nan okpʋni keyu im issish a̱ hlatʋbli fehna cha, Chelusalem a̱ in tʋnnʋp ʋttʋt ia kʋt in tʋnnʋp ona ka alotoli aiena tok.

¹⁷ Mikma Manasseh nana akaniohmi tok inla kʋt, micha nana yʋmihchi tok moma kʋt, micha nan ashʋchi ashʋchi tok ʋt Chutah i̱ mi̱ko ʋhleha i̱ nitak holisso ha̱ a holisso keyu cho?

¹⁸ Mihma Manasseh ʋt i̱ki ʋhleha ha̱ takla nusi cha, ilap in chuka osapushi Ussa im osapushi ak o̱ hollohpi tok: mihma ushi Amon ʋt ʋlhtobʋt mi̱ko tok.

¹⁹ Amon ʋt mi̱ko mʋt, afʋmmi pokoli tuklo akucha tuklo tuk osh, afʋmmi tuklo ho̱ Chelusalem a̱ ahantʋt mi̱ko tok. Mihma ishki ʋt Chotbah ʋtta Halus ushetik osh hohchifo kʋt Meshullemelh atok.

²⁰ Micha iki̱ Manasseh ʋt yʋmohmi tok ak o̱ chohmit, Chihowa itikba ya̱ nana ik achukmo kak o̱ yʋmohmi tok.

²¹ Micha i̱ki ʋt a noho̱wa tok hina moma kak o̱ a noho̱wa mʋt, naholbʋt toba puta i̱ki ʋt im antia tok ak o̱ im antiʋt im akachunoli tok.

²² Micha i̱ki ʋhleha in Chitokaka Chihowa ya̱ issa cha, Chihowa ata̱ya ya̱ ik a noho̱wa tok.

²³ Mihma Amon in tishu ʋhleha hʋt i̱ sanalit anumpa luma ikbi cha, mi̱ko yash ilap in chuka akinli ai illichi tok.

²⁴ Mihma yakni ya̱ okla hʋt mi̱ko Amon a̱ i̱ sanalit anumpa luma ikbit ʋbi kash moma ka ʋbit tahli tok: micha yakni ya̱ okla hash osh ushi Chosiah ak o̱ atobbichit mi̱kochi tok.

²⁵ Mikma Amon nana akaniohmi tok inla yʋmihinchi tok ʋt Chutah i̱ mi̱ko ʋhleha i̱ nitak holisso ha̱ a holisso keyu cho?

²⁶ Mihma im ahollohpi Ussa im osapushi ak o̱ a hohpi tok; mihma ushi Chosiah ak osh ʋlhtobʋt mi̱ko tok.