2 Mi̱ko 20 - Chahta Holisso Holitopa 1886

¹ Nitak yʋmma Hesekiah ʋt abekʋt illa̱ hosi tok. Mihma Amos ushi hopaii Isaiah ʋt im ona cha, Chihowa yʋt yak achishke, Chin chuka achʋfa ya̱ achukmalit ish im apesashke; chilla chi̱, micha chi okcha̱ya chi̱ keyu hokʋt, im achi tok.

² Yohmi ma nashuka ya̱ aboha lapalika pit shanaiyʋchit Chihowa ya̱ im asilhhʋt,

³ Chim ilbʋsha lishke, Chihowa ma! nana aia̱hli, micha chu̱kʋsh aia̱hlit chi tikba ya̱ a̱ya li chatuk, micha chi tikba ya̱ achukma kak o̱ yʋmohmi li chatuk a̱ ish ithaiyanashke, chim asilhha lishke, achi tok. Mihmʋt Hesekiah ʋt nishkin okchi minti fehna tok.

⁴ Atuk o̱ yakohmi tok, Isaiah ʋt kohchʋt iklʋna wanuta ya̱ ik ono ki̱sha ka, Chihowa im anumpa hʋt im ʋlʋt,

⁵ Ish falama cha, ʋm okla pehlichi Hesekiah ya̱, Chi̱ki Lewi in Chitokaka Chihowa yʋt yak achishke, Chim anumpa albʋsha ya̱ ha̱klo lishke, chi nishkin okchi hlatapa ka pi̱sa lishke: yakeh! chi hlakoffichi la chi̱ hoke; nitak ont atuchinakma Chihowa in chuka ya̱ ont ish chukowa chi̱ hoke.

⁶ Micha chi̱ nitak a̱ afʋmmi auahtahlapi ho̱ achakali likmʋt, chishno, micha tʋmaha ilʋppa Assilia i̱ mi̱ko ibbak a̱ a hlakoffichi la chi̱ hoke: micha ʋno atuk pulla kak o̱, micha an tishu Lewi atuk pulla kak o̱ tʋmaha ilʋppa afoa la chi̱ hoke, ish im achashke, achi tok.

⁷ Mihma Isaiah ʋt, Fik palʋska achʋfa ho̱ hʋsh ishashke, achi tok. Mihma okla ishi cha, hishi ya̱ onochi ma, hlakoffi tok.

⁸ Mihma Hesekiah ʋt Isaiah ya̱, Chihowa yʋt sa hlakofficha chi̱, mikma nitak ont atuchinakma Chihowa in chuka ont chukowa la chi̱ ka isht atokowa yʋt nanta hoh cho? im achi tok.

⁹ Mihma Isaiah ʋt, Chihowa yʋt anumpuli tuk ʋt aia̱hlicha chi̱ kʋt ilʋppak osh isht atokowa yo̱ Chihowa yʋt chi?-?mashke: hoshontika yʋt ʋlhpisa pokoli tikba iakmá, ak cho, ʋlhpisa pokoli ho̱ falamʋt ia chi̱ cho? achi tok.

¹⁰ Mihma Hesekiah ʋt, Hoshontika yʋt ʋlhpisa pokoli ho̱ tikba ia hokʋto nafehna keyushke: aha̱! amba ʋlhpisa pokoli ho̱ hoshontika yʋt falamashke, achi tok.

¹¹ Mihma hopaii Isaiah ʋt Chihowa ya̱ i̱ pa̱ya tok: mihma ʋlhpisa pokoli ho̱ Ahas i̱ hʋshi isht ʋlhpisa ya̱ aka iʋt yʋmma ona tuk a̱ falʋmmichi tok.

¹² Nitak yʋmma Babulon i̱ mi̱ko Balatan ushi Belotach?-?balatan ʋt holisso puta, micha nahʋlbina aiena ka Hesekiah ya̱ i̱ pila tok; Hesekiah ʋt abeka ka haklo tuk okʋt.

¹³ Mihma Hesekiah ʋt i̱ haponaklo cha, nana holitopa aiasha chuka moma, tʋli hʋta, micha tʋli holisso lakna, micha nabalama puta, micha bila holitopa, micha tʋnʋp a̱ya imi̱ la̱yak aiasha chuka moma, micha imi̱ la̱yak aiasha ya̱ a̱sha tuk moma ka pisachi tok: in chuka nana aiasha tuk, micha im apehlichika nana aiasha tuk a̱ Hesekiah ʋt ik pisacho ka iksho tok.

¹⁴ Yohmi ma hopaii Isaiah ʋt Hesekiah ya̱ im ona cha, Hatak ilʋppa puta kʋt nanta ho̱ chim achi cho? micha katima yo̱ minti hosh chim ʋla cho? im achi tok. Mihma Hesekiah ʋt, Yakni hopaki Babulon ak o̱ okla minti hoke, achi tok.

¹⁵ Mihma, Nanta ho̱ chin chuka ya̱ a pisa tuk oh cho? achi tok. Mihma Hesekiah ʋt, Nana moma an chuka a̱sha ka okla pisa tuk oke; ʋmi̱ la̱yak aiasha ka ak pisacho ka iksho hoke, achi tok.

¹⁶ Mihma Isaiah ʋt Hesekiah ya̱, Chihowa im anumpa ha̱ ish haklashke.

¹⁷ Yakeh! chin chuka aiasha moma, micha chi̱ki ʋhleha hʋt ashachit isht auehinchi tok himak nitak ant ʋhli moma aiena ka isht iʋt Babulon a̱ isht ona he nitak ʋt mintishke: nana achʋfa kia a̱sha chi̱ keyu, Chihowa yʋt achishke.

¹⁸ Mikma chiso ʋhleha chi a kohcha chi̱ ish tobacha chi̱ ka isht ia hi oke: mikma Babulon i̱ mi̱ko in chuka holitopa ya̱ yunʋk osh aiasha chi̱ hoke, im achi tok.

¹⁹ Yohmi ma Hesekiah ʋt Isaiah ya̱, Chihowa im anumpa ish anumpuli kʋt achukmushke, im achi tok. Mihmʋt, Si okcha̱ya nitak moma ka, iti̱ nanaiya, micha aia̱hli aiena kʋt a̱sha hokma, achukma keyu cho? achi tok.

²⁰ Mikma Hesekiah nana akaniohmi tok inla kʋt, micha nan ai im aia̱hli tok moma kʋt, micha kaniohmit oka talaia, micha oka ayanʋlli ikbi cha, tʋmaha ha̱ oka isht ʋla tok aiena kʋt Chutah i̱ mi̱ko ʋhleha i̱ nitak holisso ha̱ a holisso keyu cho?

²¹ Mihma Hesekiah ʋt i̱ki ʋhleha ha̱ ta̱kla nusi tok: mihma ushi Manasseh ʋt ʋlhtobʋt mi̱ko tok.