2 Mi̱ko 2 - Chahta Holisso Holitopa 1886

¹ Atuk o̱ yakohmi tok, Chihowa yʋt Elichah ya̱ apanukfila ha̱ fohkit ʋba isht ia chi̱ ma, Elichah, micha Elisha itatuklo kʋt Kilkal a̱ ʋshwʋt itiachi tok.

² Mihma Elichah ʋt Elisha ya̱, Ilʋppak o̱ a̱shá, chim asilhha lishke; Chihowa yʋt Behlel a̱ sa pila tuk oka, im achi tok. Mihma Elisha yʋt, Chihowa yʋt okcha̱ya pulla ka, micha chimi shilombish ʋt okcha̱ya pulla ka, chissa la he keyu hoke, achi tok. Yohmi ho̱ Behlel a̱ itonachi tok.

³ Mihma hopaii ushi ʋhleha Behlel ai asha tuk ʋt kohchʋt Elisha ya̱ ont afama mʋt, Himak nitak a̱ Chihowa yʋt chi̱ shahli chi noshkobo ha̱ chim esha chi̱ ka ish ithana cho? im achi tok. Mihma, Ʋno ak kia ithana li, hʋch ik anumpulo kashke, achi tok.

⁴ Mihma Elichah ʋt, Elisha ma! ilʋppak o̱ a̱shá, chim asilhha lishke; Chihowa yʋt Cheliko ya̱ sa pila tuk oka, im achi tok. Mihma, Chihowa yʋt okcha̱ya pulla ka, micha chimi shilombish ʋt okcha̱ya pulla ka, chissa la he keyu hoke, achi tok. Yohmi ho̱ Cheliko ya̱ itonachi tok.

⁵ Mihma hopaii ushi ʋhleha Cheliko ai asha tuk ʋt im ʋla mʋt, Himak nitak a̱ Chihowa yʋt chi̱ shahli chi noshkobo ha̱ chim esha chi̱ ka ish ithana cho? im achi tok. Mihma, Ʋno ak kia ithana li, hʋch ik anumpulo kashke, achi tok.

⁶ Mihma Elichah ʋt, Ilʋppak o̱ a̱shá, chim asilhha lishke, Chihowa yʋt Chatan a̱ sa pila tuk oka, im achi tok. Mihma, Chihowa yʋt okcha̱ya pulla ka, micha chimi shilombish ʋt okcha̱ya pulla ka, chissa la he keyu hoke, achi tok. Mihma itatu̱klot iʋt okla tok.

⁷ Mihma hopaii ushi ʋhleha ai achʋfa yosh hatak pokoli tahlapi kʋt iʋt ichapaka ya̱ hopaki ho̱ hieli tok: mihma tuklo kash osh Chatan ontalaka ya̱ hielit okla tok.

⁸ Mihma Elichah ʋt im anchi ya̱ ishi cha, puhli mʋt, oka ya̱ isht isso ma, iti̱ filʋmmit ilʋppa, micha yʋmma ia tok: yohmi na yakni shila yo̱ tuklo kash osh hlopullit ia tok.

⁹ Mihma yakohmi tok, hlopullit okla ma, Elichah ʋt Elisha ya̱, Chim ishit ik sasho ki̱sha kak o̱ nana chi̱ yʋmihchi la chi̱ ka ish asilhhashke, im achi tok. Mihma Elisha ʋt, Chimi shilombish a̱ inlohmi tuklo hosh si onʋtoyulashke; chim asilhha lishke, achi tok.

¹⁰ Mihma, Kʋllochit ish asilhhʋshke: chim ishit sʋshi ka is sa pi̱sakmʋt, chi̱ yohmashke; amba keyukma, yohma chi̱ keyu hoke, achi tok.

¹¹ Atuk o̱ yakohmi tok, a̱yʋt anumpohonlit ma̱yʋt okla ma, yakeh! itichanʋlli luak, micha issuba luak aiena kʋt haiaka mʋt, iti̱ mokoffi tok: mihma Elichah ʋt apanukfila ho̱ fohkʋt ʋba ya̱ ia tok.

¹² Mihma Elisha ʋt pisa mʋt, pa̱yʋt, A̱ki ma! a̱ki ma! Islael im itichanʋlli, micha issuba om binili ʋhleha yoke, achi tok. Mihmʋt himakma ik peso tok: mihmʋt i̱ nafohka ya̱ ishi mʋt, hlilʋffit tuklochi tok.

¹³ Mihmʋt Elichah im anchi ʋt mokofʋt itula tuk o̱ ishi mʋt, falama tuk osh Chatan sakti ha̱ ant o̱ hikia tok.

¹⁴ Micha Elichah im anchi ʋt mokofʋt itula kash ishi cha, oka ya̱ isso mʋt, Elichah in Chitokaka Chihowa mʋto? achi tok. Micha yʋmmak kia oka ya̱ isso ma, oka yʋt iti̱ filʋmmit ilʋppa, micha yʋmma ia tok; mihma Elisha ʋt hlopulli tok.

¹⁵ Atuk o̱ hopaii ushi ʋhleha Cheliko ya̱ ai asha kash osh ichapaka ya̱ yʋmmak ash pit pisa mʋt, Elichah imi shilombish ʋt Elisha ya̱ onʋtonlʋshke, achi tok. Mihmʋt okla mintit ant afama cha, aka pit im akachunoli tok.

¹⁶ Micha, Yakeh! chin tishu ʋhleha ha̱ apehʋt hatak pokoli tahlapi kʋt a̱shʋshke; ik ia cha, chi̱ shahli ha̱ ik hoyó, e chim asilhhʋshke; Chihowa imi Shilombisli ʋt ʋba isht ona cha, nʋnih kanima, keyukmʋt okfa kanima et kanchi tuk yoba ká, okla im achi tok. Mihma, Hʋsh pila he keyu hoke, achi tok.

¹⁷ Atuk o̱ okla im achunanchi na hofahyʋt taha mʋt, Ho pilá, achi tok. Yʋmohmi ho̱ hatak pokoli tahlapi ho̱ okla pila tok; mihma nitak tuchina ho̱ hoyo kia, ik ahayucho tok.

¹⁸ Atuk o̱ falamʋt im ʋla ma, (Cheliko ya̱ anta hatuk oka,) Hʋch ik aiyo kiá, hʋchim achi li tuk keyu cho? im achi tok.

¹⁹ Mihma tʋmaha hatak ʋhleha hʋt Elisha ya̱, Yakeh! tʋmaha atalaia yʋt achukma ho̱ a̱ shabli hʋt pi̱sʋshke; yohmi kia oka yʋt okpulo, mikma yakni ʋt nana a waya he keyushke, im achi tok.

²⁰ Mihma, Ampo himona yo̱ isht hʋs sʋm ʋla cha, yʋmma hʋpi ha̱ oh ʋní, achi tok. Mihma okla isht im ʋla tok.

²¹ Mihma kohchʋt kʋli oka ya̱ ona cha, yʋmma hʋpi ha̱ okʋchi mʋt, Chihowa yʋt yak achishke, Oka ilʋppa achukmali lishke; ilʋppa himak pilla ma illi, micha awaya he keyu ʋt iksho ka chi̱ hoke, achi tok.

²² Yohmi ho̱ anumpa Elisha yʋt anumpuli tuk mak o̱, oka yash osh achukma tok osh himak nitak a̱ moma hoke.

²³ Mihma yʋmma ʋttʋt iʋt Behlel a̱ ona tok: atuk osh iʋt hina takla a̱ya ma, ʋlla nakni chipunta yʋt tʋmaha ha̱ kohchʋt ishit yopulʋt, Noshkobo yushmilali chia hʋt iá; noshkobo yushmilali chia hʋt iá, im ahanchi tok.

²⁴ Mihma im a̱shaka pit filema cha, pisa mʋt, Chihowa hochifot anumpa kʋllo onochit miha tok; mihma nita tek tuklo hosh kowi et kohcha cha, yʋmmak ash ai achʋfa ʋlla pokoli ushta akucha tuklo ho̱ niblit tahli tok.

²⁵ Atuk o̱ yʋmma ʋttʋt iʋt nʋnih Kamel a̱ ona tuk osh, yʋmma ʋttʋt falamʋt Samalia ya̱ ona tok.