2 Mi̱ko 19 - Chahta Holisso Holitopa 1886

¹ Mihma yakohmi tok, mi̱ko Hesekiah ʋt haklo mʋt, i̱ nafohka hlilʋffi cha, nahishi tʋnna isht il ompohomo cha, Chihowa in chuka ya̱ ont chukowa tok.

² Mihmʋt Eliakim, yʋmmʋt mi̱ko in chuka achʋfa ya̱ apesʋchi, micha holissochi Shebna, micha naholitompa isht asha asʋnonchi ʋhleha aiena kʋt nahishi tʋnna isht ompoholmo ho̱, Amos ushi hopaii Isaiah ya̱ pit i̱ pila tok.

³ Atuk o̱, Hesekiah ʋt yak achishke, Himak nitak ʋt ilbʋsha, micha na palʋmmi onochi, micha kalakshichit anumpuli nitak oke: ʋlla yʋt a̱sha chin tuk o̱, a kohchicha chin tuk ʋt hlampko yʋt iksho hoka.

⁴ Chin Chitokaka Chihowa yʋt i̱ shahli Assilia i̱ mi̱ko ʋt Chitokaka okcha̱ya ya̱ kalakshichit mihacha chi̱ ho̱, Lab‐shakeh et pila tuk o̱ anumpuli tuk a̱ moma haklo cha, anumpa ha̱ chin Chitokaka Chihowa yʋt haklo tuk ʋt na palʋmmi onochi yoba ná: yʋmohmi hoka atampa a̱sha ka im ilbʋshʋt isht ish anumpohonlashke, im achi tok.

⁵ Yohmi hosh mi̱ko Hesekiah in tishu ʋhleha hʋt Isaiah ya̱ im ona tok.

⁶ Mihma Isaiah ʋt, Hʋchi̱ shahli ha̱ yak hʋsh im achashke, Chihowa yʋt yak achishke, Anumpa Assilia i̱ mi̱ko in tishu ʋhleha hʋt kalakshichit ishit sa miha tuk a̱ ish haklo tuk ʋt chik i̱ nukshopo kashke.

⁷ Yakeh! mahli et onochi likma, nana annoa ka haklo cha, falamʋt i̱ yakni akinli ho̱ ona chi̱ hoke; mikma i̱ yakni akinli ho̱ bʋshpo falaia isht akʋmachi la chi̱ hoke, im achi tok.

⁸ Mihma Lab‐shakeh ʋt falama cha, Assilia i̱ mi̱ko ʋt Libnah in tanampi hosh ahanta na ont pisa tok: Lachish a̱ issʋt ia tuk o̱ haklo tuk okʋt.

⁹ Mihma, Yakeh! Ehliopia i̱ mi̱ko Tihakah ʋt chin tanampa chi̱ hosh mintishke, achi ho̱ haklo mʋt, anonti Hesekiah ya̱ anumpa shali ʋhleha ha̱ pit i̱ pilʋt.

¹⁰ Chutah i̱ mi̱ko Hesekiah ya̱ yak hʋsh im achashke, Chin Chitokaka yʋmma ish anukchieto kʋt, Chelusalem ʋt Assilia i̱ mi̱ko ibbak a̱ fohka he keyu, achit ik chi haksecho kashke.

¹¹ Yakeh! Assilia i̱ mi̱ko ʋhleha hʋt yakni moma ka kaniohmichit okpʋnit taiyahlit ʋmohmichi tok a̱ ish haklo chatuk oke; yohmi ka chishno ʋto chi hlakoffa hinla cho?

¹² Oklushi puta a̱ki ʋhleha hʋt imaiyʋt chukilissʋchi tok, Kosan, micha Halan, micha Lesef, micha Eten im ʋlla ʋhleha, yʋmmʋt Hlelassa ya̱ a̱sha tok in chitokaka puta kʋt hlakoffichi tok oh cho?

¹³ Hamalh i̱ mi̱ko, micha Apat i̱ mi̱ko, micha Sefafaim in tʋmaha i̱ mi̱ko, micha Hena i̱ mi̱ko, micha Ifah i̱ mi̱ko aiena a tok mʋto? achi tok.

¹⁴ Mihma anumpa shali ʋhleha hash holisso ha̱ Hesekiah ʋt im ishi cha, itim anumpuli tok: mihmʋt Hesekiah ʋt Chihowa in chuka ya̱ ont chukowa mʋt, Chihowa itikba ya̱ patali tok.

¹⁵ Mihmʋt Hesekiah ʋt Chihowa itikba ya̱ anumpa ilbʋsha anumpulit, Islael in Chitokaka Chihowa chelubim ititakla ahanta chia ma! chishno, chishno ak bano hosh yakni apehlichika puta moma in Chitokaka chia hoke: chishno ak osh ʋba, micha yakni aiena ka ish ikbi tok.

¹⁶ Chihowa ma! chi haksobish a̱ ish akachunolichi cha, ish haklashke; Chihowa ma! chi nishkin a̱ ish fatummi cha, ish pisashke: micha Sennachelib ʋt Chihowa okcha̱ya kalakshichit mihacha chi̱ hosh et pila tuk a̱ im anumpa ha̱ ish haklashke.

¹⁷ A̱hlishke, Chihowa ma! Assilia i̱ mi̱ko ʋhleha hʋt oklushi puta, micha i̱ yakni aiena ka chukilissʋchit tahli tuk oke.

¹⁸ Micha in chitokaka puta ka luak ito pihinla tuk oke: chitokaka yatuk keyu hoka, amba hatak ibbak toksʋli, iti, micha tʋli yatuk oke; yʋmohmi hoka okla ishit kanchi tok oke.

¹⁹ Yʋmohmi hoka himak a̱, pin Chitokaka Chihowa ma! ibbak a̱ ish pi a hlakoffichaske, chim asilhha lishke; mikma apehlichika moma yakni paknaka aiasha kʋt chishno ak bano hosh Chitokaka Chihowa chia ka ithaiyanashke.

²⁰ Yohmi ma Amos ushi Isaiah ʋt Hesekiah ya̱ pit i̱ pilʋt, Islael in Chitokaka Chihowa yʋt yak achishke, Assilia i̱ mi̱ko Senachelib a̱ i̱ sanalit nana is sʋm asilhha tuk a̱ haklo lishke.

²¹ Anumpa ilʋppak o̱ Chihowa yʋt yʋmma isht anumpulishke, Ohoyo himita hatak ik halelo, Saion ushetik ʋt chi shitilemʋshke, ishit chi yopulʋt yukpʋshke Chelusalem ushetik ʋt noshkobo ha̱ chi o̱ walishke.

²² Kʋta ho̱ na mihachit ish kalakshichi cho? micha kʋta ho̱ i̱ sanalit chim anumpa ha̱ chahʋchit, chi nishkin a̱ ʋba ish akachakalichi cho? Islael i̱ Holitopa yak atuk oke.

²³ Chim anumpa shali ʋhleha yak o̱ i̱ Shahli ha̱ nan isht ish mihachit, Itichanʋlli ʋt ʋm apakna kak osh nʋnih chaha paknaka, Lebanon aiʋhli puta ka onʋt, chuahla iti chaha puta, micha sha̱kolo aiyua aiena ka chanlit akakohli la chi̱ hoke, micha im aiʋhli anusi, kowi achukma im ai offo ya̱ ona la chi̱ hoke.

²⁴ Ʋno ak osh kullit oka inla ya̱ ishko li chatuk oke; micha Echip okhina moma ka saiyi pʋtha ishit shileli la chi̱ hoke.

²⁵ Hopaki pilla ma yʋmma yʋmihchi li tok, micha cha̱shpo ma apesa li tok a̱ ish ha̱klo tok keyu cho? himak a̱ ant aia̱hlichi li ho̱ tʋmaha holihta kʋllo puta ka okpʋnit ish chi?-?fokohoncha hi atok.

²⁶ Yʋmohmi hatuk o̱ ai okla hʋt shakba ikfalaio tok oke, micha komuntʋt hofahya tok oke: oktak hʋshuk chohmi, haiyu̱kpulo okchamali chohmi, hʋshuk osh aboha pakna a̱sha ka chohmi, micha onush osh waya ik ono ki̱sha hosh bʋshi ka chohmi tok oke.

²⁷ Yohmi ka ish aiʋtta, micha kohchʋt ish ia, micha ant ish chukowa, micha ʋmi̱ sanalit chi nokowa ka chim ithaiyana li hoke.

²⁸ Ʋmi̱ sanalit chi nokowa, micha is sʋm ilefehnʋchit ish shakapa kʋt sa haksobish a̱ ant chukowa hoka, yʋmohmi hoka an tʋli chʋnaha ya̱ chibichulo ya̱ fohki likmʋt, ʋm itih kapali ya̱ chitih ha̱ kapalichi likmʋt, falʋmminchit ish a minti tuk hina ya̱ fohkit chisht ia la chi̱ hoke.

²⁹ Mikma ilʋppak osh nan isht atokowa yachi̱ hoke, himak afʋmmi ka ilap akinli waya ho̱ hʋsh pa tuk osh, afʋmmi atuklakma yʋmmak ash inli a toba ho̱ hʋsh pa chi̱ hoke: atukmʋt afʋmmi ont atuchinakma, hʋsh hokchi cha, bʋshlit, micha pa̱kʋpi ahollokchi hʋsh hokchi cha, waya ka hʋsh ai ʋpashke.

³⁰ Mikma Chutah in chuka achʋfa atampa hlako̱ffi kʋt anonti aka pila haksish tobakmʋt, ʋba pila iʋt waya chi̱ akinli hoke.

³¹ Atampa kʋt Chelusalem a̱ a kohonchakma, hlako̱fli kʋt Saion nʋnih ha̱ a kohoncha chi̱ hoka; ʋba nan oklu̱ha ilai ieshi Chihowa im amosholi ʋt ilʋppa yʋmihcha chi̱ hoke.

³² Yʋmohmi hoka Chihowa yʋt Assilia i̱ mi̱ko ya̱ isht anumpulit yak achishke, Tʋmaha ilʋppa chukowa chi̱ keyu, micha oski naki yʋmma pila he keyu, micha telihpa ieshit itikba ʋla he keyu, micha i̱ sanalit lukfi bukkochit apakfobla he keyu hoke.

³³ Hina a minti tuk falamʋt yʋmmak inli ia chi̱ hoke; micha tʋmaha ilʋppa chukowa chi̱ keyu, Chihowa yʋt achishke.

³⁴ Micha ʋno atuk pulla mak o̱, micha an tishu Lewi atuk pulla mak o̱ tʋmaha ilʋppa hlakoffichi la chi̱ kʋt afoa la chi̱ hoke, achi tok.

³⁵ Atuk o̱ ninak yʋmma yakohmi tok, Chihowa im enchel ʋt kohchʋt iʋt Assilia i̱ binah ha̱ tahlepa sipokni tahlepa achʋfa cha, tahlepa sipokni pokoli untuchina akucha tahlapi ho̱ issot kanchi tok: atuk o̱ onnahinli fehna okla tani ma, yakeh! illi bieka tok.

³⁶ Mihma Assilia i̱ mi̱ko Sennachelib ʋt kanʋlli cha, falamʋt ia mʋt, Ninifeh ak o̱ ʋtta tok.

³⁷ Atuk o̱ yakohmi tok, in chitokaka Nisloch in chuka aiokpʋchit isht anta ma, ushi tuklo Atlammelech, micha Shalese ʋt bʋshpo falaia ishit fahamʋt illichi tok; micha tihlayʋt Amenia yakni ya̱ ona tok. Mihma ushi Esa‐hatton ʋt ʋlhtobʋt mi̱ko tok.