2 Mi̱ko 18 - Chahta Holisso Holitopa 1886

¹ Atuk o̱ yakohmi tok, Islael i̱ mi̱ko Elah ushi Hoshea ʋt mi̱ko tok afʋmmi ont atuchina ho̱, Chutah i̱ mi̱ko Ahas ushi Hesekiah ʋt mi̱ko tok.

² Mi̱ko mʋt, afʋmmi pokoli tuklo akucha tahlapi tok; atuk osh afʋmmi pokoli tuklo akucha chakkali ho̱ Chelusalem a̱ ʋttʋt mi̱ko tok: micha ishki ʋt Sachaliah ushetik osh hohchifo kʋt Abi atok.

³ Micha i̱ki Lewi a yʋmohmi tok moma kak o̱ chohmit Chihowa itikba ya̱ aiʋlhpiesa kak o̱ yʋmohmi tok.

⁴ Micha achahaka puta ka ishit kanchi mʋt, naholbʋt toba puta ka kobahlichit bushullichit, Ashelah ha̱ chanlit akʋchi mʋt, asonak lakna sinti Moses ʋt ikbi tok a̱ bolit bushullichi tok: nitak yʋmma ant ʋhli ka Islael im ʋlla ʋhleha hʋt nabalama i̱ hukmi moma hatuk oka; micha Nehushtan hochifo tok.

⁵ Islael in Chitokaka Chihowa ya̱ anukchieto tok: yohmi ho̱ Chutah i̱ mi̱ko ʋhleha hʋt iakaiya kʋt, micha tikba tok achʋfa kia inlohmi kʋt iksho tok.

⁶ Micha Chihowa ya̱ asitia cha, iakaiya kʋt issa keyu, amba im anumpa ʋlhpisa puta Chihowa yʋt Moses a̱ im apihi̱sa tok a̱ ieshi tok.

⁷ Mihma Chihowa yʋt ibafoyuka tok: mihma kanima yo̱ kohchʋt iakmʋt, im aia̱hli tok: micha Assilia i̱ mi̱ko ya̱ i̱ filʋmmit i̱ sanali cha, ik im antio tok.

⁸ Yʋmmak osh Filistin okla ha̱ issot kanchit Kasa, micha im aiʋhli fullota aiatoni aboha chaha yo̱ ʋttʋt ia kʋt tʋmaha holihta kʋllo ont ʋhli ka isht ona tok.

⁹ Atuk o̱ yakohmi tok, Hesekiah ʋt mi̱ko tok afʋmmi ont aiushta, yʋmmʋt Islael i̱ mi̱ko Elah ushi Hoshea ʋt mi̱ko tok afʋmmi ont isht untuklo ho̱, Assilia i̱ mi̱ko Shalmanese ʋt Samalia ya̱ ʋlʋt in tanampit abinachit afolubli tok.

¹⁰ Atuk osh afʋmmi tuchina kʋt ont taha ma, okla ishi tok; Hesekiah ʋt mi̱ko tok afʋmmi ont ishit hannali ma, yʋmmʋt Islael i̱ mi̱ko Hoshea ʋt mi̱ko tok afʋmmi ont ishit chakkali kak o̱, Samalia ya̱ ishi tok.

¹¹ Micha Islael a̱ Assilia i̱ mi̱ko ʋt Assilia ya̱ isht ona cha, Halah, micha Habo, Kosan okhina bili̱ka, micha Metia okla in tʋmaha puta ka ai ashachi tok;

¹² In Chitokaka Chihowa im anumpa ik im antio, amba nan itim apesa ya̱, Chihowa in tishu Moses ʋt apihi̱sa tok moma ka kobʋffi cha, i̱ haponaklo tok keyu, micha yʋmihchi tok keyu hatuk o̱.

¹³ Atuk o̱ mi̱ko Hesekiah ʋt mi̱ko tok afʋmmi ont isht auahushta ma, Assilia i̱ mi̱ko Sennachelib ʋt ʋlʋt, Chutah in tʋmaha holihta kʋllo puta ka in tanampi cha, ishi tok.

¹⁴ Mihma Assilia i̱ mi̱ko ʋt Lachish a̱ anta tuk o̱, Hesekiah ʋt anumpa pit i̱ pilʋt, Yoshuba lishke; a̱ filʋmmit ish iashke; nana ho̱ is si onochikma, aiokpʋchi lashke, achi tok. Mihma Assilia i̱ mi̱ko ʋt Chutah i̱ mi̱ko Hesekiah ya̱ tʋli hʋta talent tahlepa tuchina, micha tʋli holisso lakna talent pokoli tuchina aiena ho̱ im apesa tok.

¹⁵ Mihma Hesekiah ʋt tʋli hʋta ʋt Chihowa in chuka, micha mi̱ko in chuka naholitopa aiasha ya̱ a̱sha tuk a̱ ima tok.

¹⁶ Nitak yʋmma Hesekiah ʋt Chihowa in tempel okhissa isht okshilita puta, micha toni̱k puta ka in tʋli holisso lakna ya̱ Chutah i̱ mi̱ko Hesekiah ʋt lapalichi tuk ʋt fakoh?-?lit ishi cha, Assilia i̱ mi̱ko ya̱ ima tok.

¹⁷ Mihma Assilia i̱ mi̱ko ʋt Lachish a̱ ʋttʋt Tatan, micha Lab‐salis, micha Lab‐shakeh, micha tʋshka laua aiena ho̱ Hesekiah aiʋtta Chelusalem a̱ pit pila tok: mihma okla mintit Chelusalem a̱ ʋla tok. Atuk osh okla ʋla mʋt, ibe?-?tʋp oka talaia ya̱, yʋmmʋt nafohka achifa im osapa atia bili̱ka, oka ayanʋlli ya̱ ant hieli tok.

¹⁸ Atuk osh mi̱ko ya̱ okla pit hoyo ma, Hilkiah ushi Eliakim, yʋmmʋt mi̱ko in chuka achʋfa ya̱ apesʋchi, micha holissochi Shebna, micha holisso takalichi Asaf ushi Choah aiena kʋt kohchʋt im ona tok.

¹⁹ Mihma Labshakeh ʋt, Mi̱ko chito, Assilia i̱ mi̱ko ʋt yak achishke, Nana anukcheto ilʋppa ish anukchieto kʋt nanta hoh cho?

²⁰ Itin tanampi ka hatak anumpuli, micha kʋllo aiena kʋt ʋm a̱sha hoke, ish achi kʋt, peh anumpa ik ahobo ish anumpuli hoke. Himak a̱ kʋta ho̱ ish anukchieto hosh is sa̱ filʋmmit is sa̱ sanali cho?

²¹ Himak a̱ yakeh! tʋbi ku̱shak kochofa ilʋppa Echip ak o̱ ish anukchietoshke, yʋmma kʋna hosh ʋtayakma, ibbak a̱ chukowʋt bahla hinla yoke; Echip i̱ mi̱ko Feleo ya̱ anukchieto moma ka yʋmmak o̱ yʋmohmi hoke.

²² Amba, Pin Chitokaka Chihowa yak o̱ il anukchieto hoke, hʋs sʋm achi hokma, yʋmmak o̱ im achahaka puta, micha im alta puta ka Hesekiah ʋt ishit kanchi cha, Chutah, micha Chelusalem a̱, Alta Chelusalem hikia ilʋppa itikba yak o̱ hʋsh aiokpʋchashke, im achi tok keyu cho?

²³ Yʋmohmi hoka himak a̱ a̱ shahli Assilia i̱ mi̱ko ya̱ isht a̱hlichi ya̱ ish imashke, chim asilhha lishke, micha chishno ʋt ombinili ya̱ ish onocha hinlakma, issuba tahlepa sipokni tuklo ho̱ chi̱ hiohlichi lashke.

²⁴ Yohmi kʋt katiohmi kak osh a̱ shahli ha̱ in tishu ʋhleha moma ik lauwo kʋpitʋni achʋfa nashuka ya̱ ish filim?-?micha hinla hoh cho? a̱hlí, itichanʋlli, micha issuba ombinili aiena ka Echip ak osh chim atahla he ish anukchietoshke.

²⁵ Himak a̱ Chihowa sʋbafoyuka keyu ho̱ tʋmaha ilʋppa okpʋnit tahli la chi̱ hosh ʋla li cho? Ish ia cha, yakni ilʋppa in tanampit okpʋnit ish tahlashke, Chihowa yʋt ʋm achi tuk oke, Hesekiah ya̱ ont hʋsh im achashke, hʋchim asilhha lishke, im achi tok.

²⁶ Yohmi ma Hilkiah ushi Eliakim, micha Shebna, micha Choah aiena kʋt Lab‐shakeh ya̱, Chin tishu ʋhleha ha̱ Silia anumpa ho̱ ish im anumpulashke, e chim asilhhʋshke, il akostininchi hokʋt; micha Chu im anumpa ha̱ okla hʋt tʋmaha holihta paknaka a̱sha kʋt ha̱klo ka chik pim anumpulo kashke, im achi tok.

²⁷ Mihma Labshakeh ʋt, Chi̱ shahli, micha chishno ak o̱ hʋchim anumpuli la chi̱ ho̱ a̱ shahli hʋt et sa pila tuk oh cho? tʋmaha holihta paknaka hatak aiasha kak o̱ im anumpuli la chi̱ ho̱ et sa pila na ilap i̱ yʋlhki akinli ho̱ hʋch ibai ʋpa cha, ilap i̱ hoshowa akinli ho̱ hʋch ibai ishka chin tuk ak keyu cho? im achi tok.

²⁸ Yohmi mʋt Lab‐shakeh ʋt hikia cha, chitoli hosh pa̱yʋt, Chu im anumpa ho̱ anumpulit, Mi̱ko chito Assilia i̱ mi̱ko im anumpa ha̱ hʋsh haklashke:

²⁹ Mi̱ko ʋt yak achishke, Hesekiah ʋt ik hʋchi haksecho kashke; ibbak a̱ a hʋchi hlakofficha he keyu hoka:

³⁰ Micha Hesekiah ʋt, Chihowa yʋt pi hlakoffichi pulla chi̱ hoke, mikma tʋmaha ilʋppʋt Assilia i̱ mi̱ko ibbak a̱ fohka chi̱ keyu hoke, achit Chihowa ya̱ ik hʋchi anukche?-?tocho kashke.

³¹ Hesekiah ya̱ hʋsh i̱ haponaklo ná: Assilia i̱ mi̱ko ʋt yak achi hoka, Nahʋlbina ʋmʋt anumpa ishit hʋs sʋtim apesa cha, kohchʋt hʋs sʋm ʋlashke; micha ilap i̱ pa̱kʋpi aiyukali ai ʋpʋt, micha i̱ fikʋpi aiyukali ai ʋpʋt, micha i̱ kʋli hofobi oka yak o̱ aiyukali hʋsh ai ishkashke.

³² Atuk o̱ ant hʋch ishit iʋt yakni hʋchi̱ yakni akinli chohmi, tanchi, micha okapa̱ki aiasha yakni, micha pʋska, micha pa̱kʋpi ahollokchi aiasha yakni, micha alif bila, micha foi bila aiasha yakni yo̱ hʋch isht ona li̱ hʋchi okcha̱ya cha, ik hʋch illo kashke: micha Hesekiah ʋt, Chihowa yʋt pi hlakofficha chi̱ hoke, achit hʋchi nukfohki bʋnna ka hʋch ik i̱ haponaklo kashke.

³³ Oklushi puta in chitokaka ʋhleha hʋt i̱ yakni niyukali ka Assilia i̱ mi̱ko ibbak a̱ a kohchit hlakoffichi chatuk oh cho?

³⁴ Hamalh, micha Apat in chitokaka puta mʋto? Sefafaim, Hena, micha Ifah in chitokaka puta mʋto? Samalia ya̱ sʋbbak a̱ a kohchit hlakoffichi tuk oh cho?

³⁵ Yakni puta in chitokaka kʋta hosh i̱ yakni ya̱ sʋbbak a̱ a kohchit hlakoffichi tuk o̱, Chihowa yʋt Chelusalem a̱ sʋbbak a̱ a kohchit hlakofficha hinla cho? achi tok.

³⁶ Mihma okla hʋt nana ik acho hosh, anumpa falama achʋfa kia ik im anumpulo tok; mi̱ko ʋt i̱ miha kʋt, Anumpa falama hʋsh im anumpula he keyu, achi hatuk oka.

³⁷ Yohmi ma Hilkiah ushi Eliakim, yʋmmʋt mi̱ko in chuka achʋfa ya̱ apesʋchi, micha holissochi Shebna, micha holisso takalichi Asaf ushi Choah aiena kʋt i̱ nafohka hlilafa hosh Hesekiah im ona cha, Lab‐shakeh im anumpa ha̱ im anoli tok.