2 Mi̱ko 17 - Chahta Holisso Holitopa 1886

¹ Chutah i̱ mi̱ko Ahas ʋt mi̱ko tok afʋmmi ont isht auahtuklo ho̱, Elah ushi Hoshea ʋt Samalia ya̱ ʋttʋt Islael a̱ i̱ mi̱ko tuk osh afʋmmi chakkali ho̱ mi̱ko tok.

² Atuk osh Chihowa itikba ya̱ nana ik achukmo kak o̱ yʋmohmi tok: yohmi kia Islael i̱ mi̱ko ʋhleha tikba tok ano ik chohmo tok.

³ Assilia i̱ mi̱ko Shalmanese ʋt ʋlʋt in tanampi tok; mihma Hoshea ʋt in tishu toba cha, nahʋlbina puta ihi̱ma tok.

⁴ Atuk o̱ Hoshea ʋt i̱ sanalit anumpa luma ikbi ho̱ Assilia i̱ mi̱ko ʋt im akostininchi tok: Echip i̱ mi̱ko So ya̱ anumpa shali ʋhleha i̱ pila cha, Assilia i̱ mi̱ko ya̱ afʋmmi hosh ont afʋmmikma yʋmihchi chatuk ʋt nahʋlbina pit ik i̱ pelo tok oka; yʋmohmi hatuk o̱ Assilia i̱ mi̱ko ʋt im okhishta cha, takchit aboha kʋllo fohki tok.

⁵ Yohmi ma Assilia i̱ miko ʋt ʋlʋt yakni moma ka hlopullit a̱ya mʋt, Samalia ya̱ ʋla cha, in tanampit afʋmmi tuchina ho̱ abinachit afolubli tok.

⁶ Hoshea ʋt mi̱ko tok afʋmmi ont ishit chakkali ho̱, Assilia i̱ mi̱ko ʋt Samalia ya̱ ishi cha, Islael a̱ isht iʋt Assilia ya̱ isht ona cha, Kosan okhina bili̱ka Halah, micha Habo, micha Metia okla in tʋmaha puta ka ashachi tok.

⁷ Yakohmi tuk ak atok; Islael im ʋlla ʋhleha hʋt in Chitokaka Chihowa, yʋmmak osh Echip yakni, micha Echip i̱ mi̱ko Feleo ibbak i̱ nutaka tuk a̱ a kohchichi tok a̱ i̱ yoshuba cha, chitokaka inla puta ka aiokpʋchi beka tok,

⁸ Micha oklushi puta yʋmma Chihowa yʋt Islael im ʋlla ʋhleha itikba ya̱ a tihlelit kocha wehli tok i̱ nan ʋlhpisa, micha Islael i̱ mi̱ko ʋhleha hʋt nan ʋlhpisa puta apesa tok aiena kak o̱ a noho̱wa tok.

⁹ Micha Islael im ʋlla ʋhleha hʋt in Chitokaka Chihowa ya̱ i̱ sanali cha, aiʋlhpiesa keyu kak o̱ lumʋt yʋmohmi cha, aiatoni aboha chaha ya̱ ʋttʋt ia kʋt tʋmaha holihta kʋllo ont ʋhli ka in tʋmaha moma achahaka puta ka okla ai ikbi tok.

¹⁰ Micha nʋnih chaha puta paknaka, micha iti okchamali puta nuta ya̱ naholbʋt toba puta, micha Ashelah puta ka okla hiohlichi tok:

¹¹ Micha oklushi puta yʋmma Chihowa yʋt itikba ya̱ ai ishit kanchi tok ayʋmohmi tok a̱ yʋmihchit achahaka moma nabalama a hukmi beka tok; micha nana ik achukmo moma ka yʋmohmit Chihowa ya̱ nokowʋchi tok:

¹² Micha Chihowa yʋt yʋmmak oka, Nana ilʋppa hʋsh yʋmohma he keyu, im achi tok kia, naholbʋt toba puta ka okla aiokpʋchi tok.

¹³ Mihma Chihowa yʋt hopaii moma, micha napisa moma tohno na Islael a̱, micha Chutah ya̱ atokolit, Nana aiʋlhpiesa keyu hʋsh yʋmohmi kʋt, hʋsh i̱ filʋmmi cha, ʋm anumpa ʋlhpisa puta, micha a̱ nan ʋlhpisa puta hʋch i̱ki ʋhleha im apihi̱sa li tok, micha an tishu ʋhleha, hopaii puta tohnot hʋchi̱ pila li tok nan ʋlhpisa moma mak o̱ hʋsh ieshaslike, ahanchi tok.

¹⁴ Yohmi kia okla ik haponaklo hosh, amba ikunla ya̱ kʋllochit, i̱ki ʋhleha hʋt in Chitokaka Chihowa ya̱ ik i̱ yimmo hosh ikunla kʋllochi tok a̱ chohmi tok.

¹⁵ Micha i̱ nan ʋlhpisa puta, micha nan itim apesa i̱ki ʋhleha ha̱ nan itim apesa tok, micha nan isht atokowa isht atokoli aiena ka shitilemʋt kanchi tok; micha nan ik ahobo ya̱ okla iakaiyʋt ik ahobot taha mʋt, oklushi puta apakfoyupʋt a̱sha ka, yʋmmak oka Chihowa yʋt atokolit hobacha he keyu ka i̱ miha tok ak o̱ iakaiya tok.

¹⁶ Micha in Chitokaka Chihowa im anumpa ʋlhpisa puta ka i̱ filʋmmi cha, bilʋt akmot naholbʋt toba, wakushi tuklo ho̱ ikbit, micha Ashelah ikbi mʋt, nana moma ʋba shutik aiasha ka im akachunolit aiokpʋchi, micha Baal a̱ im antia tok.

¹⁷ Micha ushi ʋhleha, micha ushetik ʋhleha ha̱ luak hlopullichit, nana kaniohma he akostininchi, micha fʋppuli puta yʋmihchit Chihowa itikba nana aiʋlhpiesa keyu ya̱ yʋmohmit ile kanchi cha, nokowʋchi tok.

¹⁸ Mihma Chihowa yʋt Islael a̱ i̱ nukkilli fehna cha, itikba ya̱ kanʋllichit ishit kanchi na apehlichi achʋfa kia iksho, amba Chutah ak illa tok.

¹⁹ Chutah ak kia in Chitokaka Chihowa im anumpa ʋlhpisa puta ik iesho hosh, amba Islael i̱ nan ʋlhpisa puta okla apesa tok ak o̱ a noho̱wa tok.

²⁰ Mihma Chihowa yʋt Islael aiunchololi moma ka shitilemʋt kanchi cha, ilbʋshalit wehpuli puta ibbak a̱ fohkit itikba ya̱ ai ishit kanchi tok.

²¹ Islael a̱ Lewi in chuka achʋfa ya̱ mokoffit im ai ishi tok okʋt; mihma Nebat ushi Cheloboam ak o̱ okla mi̱kochi tok: mihma Cheloboam ʋt Islael ʋt Chihowa iakaiya tuk a̱ issʋchi cha, nan ashʋchi chinto ho̱ ashʋchechi tok.

²² Micha Islael im ʋlla ʋhleha hʋt Cheloboam i̱ nan ashʋchi moma kak o̱ ai itʋnowa tok; achʋfa kia okla ik i̱ filʋmmo tok.

²³ Yohmi na pola̱ka Chihowa yʋt in tishu ʋhleha hopaii puta ka tohnot ahanchi tuk mak osh itikba ai ishit kanchi tok. Yohmi hosh i̱ yakni ya̱ a kohchit Islael a̱ Assilia isht ona tok o̱ himak nitak a̱ aiasha hoke.

²⁴ Mihma Assilia i̱ mi̱ko ʋt Babulon, micha Kuhlah, micha Afa, micha Hamalh, micha Sefafaim a̱ hatak ʋhleha ai ishit Samalia tʋmaha puta ka Islael im ʋlla ʋhleha ha̱ atobbichit ai ashachi tok; mihma Samalia ya̱ ishi cha, in tʋmaha puta ka aiasha tok.

²⁵ Atuk osh yakohmi tok, yʋmma a̱shʋt isht ia ʋmmona kʋt Chihowa ya̱ ik i̱ nukwio tok: yʋmohmi ma Chihowa yʋt koi hochito ya̱ et on tihleli na kanimi ka ʋbi tok.

²⁶ Mihma Assilia i̱ mi̱ko ya̱ im achit, Okla puta kanʋllichit Samalia tʋmaha puta ish ashachi tuk ʋt yakni ya̱ in Chitokaka akaniohmi ya̱ ithana keyu hoke: yʋmohmi hatuk o̱ koi hochito on tihleli na, yakeh! ʋbishke; yakni ya̱ in Chitokaka akaniohmi ya̱ ik ithano hoka, okla achi tok.

²⁷ Yohmi ma Assilia i̱ mi̱ko ʋt apesʋt, Naholitompa isht asha ʋhleha yʋmma ai ishit hʋsh la tok achʋfa ka ishit hʋsh onashke; mikma ont aha̱shwakmʋt, yakni ya̱ in Chitokaka akaniohmi ya̱ im abʋchashke, achi tok.

²⁸ Yohmi ma naholitompa isht asha ʋhleha Samalia ya̱ ai ishit ia tok ash achʋfa kʋt ʋlʋt Behlel a̱ ʋtta cha, kaniohmi hosh Chihowa ya̱ i̱ nukwia hi a̱ im abʋchi tok.

²⁹ Yohmi kia oklushi ilap in chitokaka aiyukali ka ikbi cha, achahaka chuka puta Samalia hatak ʋhleha hʋt ikbi tok a̱ a hiohlichit oklushi puta kʋt in tʋmaha aiyukali aiasha ka hiohlichi tok.

³⁰ Yohmi kʋt Babulon hatak ʋhleha hʋt Sukkolh‐benolh a̱ ikbi ma, Kulh hatak ʋhleha hʋt Nekal a̱ ikbi ma, Hamalh hatak ʋhleha hʋt Ashima ya̱ ikbi ma,

³¹ Afa hatak ʋhleha hʋt Nibhas, micha Tatak a̱ ikbi tok; mikma Sefafaim hatak ʋhleha hʋt im ʋlla ʋhleha ha̱ Sefafaim i̱ chitokaka tuklo Atlammelech, micha Anammelech a̱ luak im itʋchit hukmi tok.

³² Yohmi ho̱ Chihowa ya̱ okla i̱ nukwia kia, im okla akinli ai ishit achahaka naholitompa isht asha ikbi na yʋmmak osh achahaka chuka puta ka ai isht im ai ʋtta tok.

³³ Chihowa ya̱ i̱ nukwia kia, yʋmma ai ishit ia tok oklushi puta akaniohmi yak o̱ iakaiyʋt ilap in chitokaka puta ka im antihi̱ya tok.

³⁴ Himak nitak ant ʋhli ka cha̱shpo akaniohmi tok puta ka yʋmohmi moma hoke; Chihowa ya̱ i̱ nukwia keyu, micha nan ʋlhpisa puta, micha nana akaniohmi ʋlhpesa, micha anumpa ʋlhpisa aiena yʋmmak oka Chihowa yʋt Chekob, yʋmma Islael hochifo tok ʋt im ʋlla ʋhleha ha̱ i̱ miha tok, okla yʋmmʋt in tonla kia, iakaiya keyu hoke.

³⁵ Yʋmmak oka Chihowa yʋt nana itim apesa cha, i̱ mihʋt, Chitokaka inla puta ka hʋsh i̱ nukwia he keyu, micha hʋsh im akachunola he keyu, micha hʋsh im antia he keyu, micha nan ʋbit isht hʋsh im aiokpʋcha he keyu;

³⁶ Amba Chihowa yʋmmak osh nan isht im aia̱hli chito, micha shakba ashatapa hosh Echip a̱ a pehlichit hʋchi kohchi tok, yʋmmak o̱ hʋsh i̱ nukwia cha, hʋsh im akachunolikmʋt, yʋmmak o̱ nan ʋbit isht hʋsh im aiokpʋchashke.

³⁷ Micha nan ʋlhpisa puta, micha nana akaniohmi ʋlhpesa puta, micha anumpa ʋlhpisa puta hʋchi̱ holissochi tok a̱ nitak moma ka ahah! ahnit hʋsh holitobla hi oke; micha chitokaka inla puta ka hʋsh i̱ nukwia he keyu hoke.

³⁸ Micha nan itim apesa hʋch itim apesa li tok a̱ ik hʋchim i hakso kashke; micha chitokaka inla puta ka hʋsh i̱ nukwia he keyu hoke.

³⁹ Amba hʋchin Chitokaka Chihowa yak o̱ hʋsh i̱ nukwiashke; mikma yʋmmak osh hʋchin tʋnʋp moma ibbak a̱ a hʋchi hlakofficha hi oke, achi tok.

⁴⁰ Yohmi kia okla ik i̱ haponaklo hosh, amba cha̱shpo akaniohmi ak osh yʋmohmi tok.

⁴¹ Yohmi hosh oklushi ilʋppa puta kʋt Chihowa ya̱ i̱ nukwia kia, tʋhlʋt naholbʋt toba puta ka im antia tok; micha im ʋlla ʋhleha, micha im ʋlla ya̱ im ʋlla ʋhleha aiena kʋt, i̱ki ʋhleha hʋt yʋmohmi tok mak o̱, himak nitak a̱ yʋmohmi moma hoke.