2 Mi̱ko 16 - Chahta Holisso Holitopa 1886

¹ Lemaliah ushi Pekah ʋt mi̱ko tok afʋmmi ont isht auahuntuklo ho̱ Chutah i̱ mi̱ko Chohlam ushi Ahas ʋt mi̱ko tok.

² Ahas ʋt mi̱ko mʋt, afʋmmi pokoli tuklo tuk osh, afʋmmi auahhannali ho̱ Chelusalem a̱ ʋttʋt mi̱ko tok; micha in Chitokaka Chihowa itikba ya̱ aiʋlhpiesa kak o̱ yʋmohmi keyut i̱ki Lewi yatok a̱ ik chohmo tok.

³ Amba Islael i̱ mi̱ko ʋhleha ata̱ya yak o̱ a noho̱wa tok; micha ushi ya̱ luak a̱ hlopullichi aienʋt, Chihowa yʋt Islael im ʋlla ʋhleha itikba a tihlelit kocha wehli tok oklushi puta kʋt nana yuwalʋchi yʋmohmi tok ak o̱ yohmi tok.

⁴ Micha achahaka puta, micha nʋnih paknaka puta, micha iti okchamali puta nuta ya̱ nan ai ʋbit isht aiokpʋchit nabalama a hukmi beka tok.

⁵ Mihma Silia i̱ mi̱ko Lesin, micha Islael i̱ mi̱ko Lemaliah ushi Pekah itatuklo kʋt Chelusalem a̱ in tanampit ʋla tok; micha Ahas a̱ abinachit afolubli kia, imaiya he keyu tok.

⁶ Yʋmma fokali ka Silia i̱ mi̱ko Lesin ʋt Elalh a̱ falʋmmichit ishit Silia ya̱ ima cha, Chu okla ha̱ tihlelit Elalh a̱ a kohchichi tok; mihma Silia okla hʋt Elalh a̱ ona cha, aiasha tok osh himak nitak a̱ moma hoke.

⁷ Mihma Ahas ʋt Assilia i̱ mi̱ko Tiklalh‐pilese ya̱ anumpa shali ʋhleha pit i̱ pilʋt, Chin tishu sia, micha chiso sia hoke; ish minti cha, Silia i̱ mi̱ko ibbak a̱ a kohchit, micha Islael i̱ mi̱ko ibbak a̱ a kohchit is sa hlakoffichashke, yʋmmʋt a̱ sanalit wakaya hoka, achi tok.

⁸ Micha Ahas ʋt Chihowa in chuka, micha mi̱ko in chuka naholitopa aiasha ya̱ tʋli hʋta, micha tʋli holisso lakna aiena kʋt a̱sha ka ishi cha, nahʋlbina yo̱ Assilia i̱ mi̱ko ya̱ pit i̱ pila tok.

⁹ Mihma Assilia i̱ mi̱ko ʋt i̱ haponaklo tok; mihmʋt Assilia i̱ mi̱ko ʋt iʋt Tamaskʋs a̱ ona cha, ishi mʋt, okla ha̱ yukachit isht iʋt Ki ya̱ isht ona cha, Lesin a̱ illichi tok.

¹⁰ Mihma mi̱ko Ahas ʋt Assilia i̱ mi̱ko Tiklalh‐pilese ya̱ afamʋt Tamaskʋs a̱ ona mʋt, Tamaskʋs a̱ alta yʋt hikia ka pisa tok: mihmʋt mi̱ko Ahas ʋt alta yʋt kaniohmi, micha isht ʋlhtaha moma ka holba ya̱ naholitompa isht ʋtta Ulichah ya̱ pit i̱ pila tok.

¹¹ Mihma naholitompa isht ʋtta Ulichah ʋt alta ya̱ ikbi tok; mi̱ko Ahas ʋt Tamaskʋs a̱ ʋttʋt mintit ʋla takla ka, mi̱ko Ahas ʋt Tamaskʋs a̱ ʋttʋt i̱ pila tuk moma mak o̱, naholitompa isht ʋtta Ulichah ʋt yʋmihchi tok.

¹² Atuk o̱ mi̱ko ʋt Tamaskʋs a̱ ʋtta tuk ʋt mintit ʋla mʋt, alta yash pisa tok: micha mi̱ko ʋt alta ya̱ bili̱ka ona mʋt, nana onochit isht aiokpʋchi tok.

¹³ Micha na hukmit isht aiokpʋchi, micha ilhpak isht aiokpʋchi aiena ka alta ya̱ onochit hukmi mʋt, nan ishko isht aiokpʋchi ya̱ on hlatʋbli mʋt, iti̱ nanaiyʋchi isht aiokpʋchi puta issish a̱ alta yash o̱ fimmi tok.

¹⁴ Mihmʋt asonak lakna alta, yʋmmʋt Chihowa itikba, alta, micha Chihowa in chuka ititakla chuka yash itikba hikia kash kanʋllichit alta ya̱ falʋmmi in tʋnnʋp a̱ a talali tok.

¹⁵ Mihmʋt mi̱ko Ahas ʋt naholitompa isht ʋtta Ulichah ya̱ im apesʋt, Alta chito ak o̱ onnahinli na hukmit isht aiokpʋchi, micha opiaka ilhpak isht aiokpʋchi, micha mi̱ko i̱ na hukmit isht aiokpʋchi, micha im ilhpak isht aiokpʋchi, micha okla moma yakni ya̱ aiasha ka i̱ na hukmit isht aiokpʋchi, micha im ilhpak isht aiokpʋchi, micha i̱ nan ishko isht aiokpʋchi aiena ka onochit ish hukmashke; micha na hukmit isht aiokpʋchi issish moma, micha nan ʋbit isht aiokpʋchi issish moma aiena ka ish o̱ fimmashke; mikma asonak lakna alta yʋto ishit ponaklo li yachi̱ hoke, achi tok.

¹⁶ Mihma naholitompa isht ʋtta Ulichah ʋt mi̱ko Ahas ʋt im apesa tuk moma mak o̱ yʋmihchi tok.

¹⁷ Mihma mi̱ko Ahas ʋt aiontaloha ʋhli shemʋchi puta ka tʋptuli mʋt, ampo mahaia chito ʋt paknaka on talaia tuk a̱ kanʋllichi tok; micha asonak lakna okhʋta yʋt asonak lakna wak ʋt nutaka hieli na on talaia tuk a̱ akʋchi cha, tʋli potʋlhpo yo̱ on talali tok.

¹⁸ Micha nitak hullo hoshontika ya̱ chuka okla ai ikbi tok a̱, micha kocha pila mi̱ko achukowa aiena ka Assilia i̱ mi̱ko yatuk mak o̱, Chihowa in chuka ya̱ a filʋmmichi tok.

¹⁹ Mikma nana akaniohmi tok inla Ahas ʋt yʋmihinchi tok ʋt Chutah i̱ mi̱ko ʋhleha i̱ nitak holisso ha̱ a holisso keyu cho?

²⁰ Mihma Ahas ʋt i̱ki ʋhleha ha̱ ta̱kla nusi cha, i̱ki ʋhleha ta̱kla Lewi in tʋmaha ha̱ a hollohpi tok: mihma ushi Hesekiah ʋt ʋlhtobʋt mi̱ko tok.