2 Mi̱ko 15 - Chahta Holisso Holitopa 1886

¹ Islael i̱ mi̱ko Cheloboam ʋt mi̱ko tok afʋmmi ont ishit pokoli tuklo akucha untuklo ho̱, Chutah i̱ mi̱ko Amasiah ushi Asaliah ʋt mi̱ko tok.

² Mi̱ko mʋt, afʋmmi auahhannali hatok; atuk osh afʋmmi pokoli tahlapi akucha tuklo ho̱ Chelusalem a̱ ʋttʋt mi̱ko tok: micha ishki Chelusalem ʋtta yosh hohchifo kʋt Checholiah atok.

³ Micha Chihowa itikba ya̱ aiʋlhpiesa kak o̱ yʋmohmi tok; i̱ki Amasiah a yʋmohmi tok moma kak o̱ chohmi tok.

⁴ Achahaka puta kak illa ho̱ ishit ik kancho tok; okla hʋt achahaka puta ka nan ai ʋbit isht aiokpʋchit, micha nabalama a hukmi kʋt imoma tok.

⁵ Atuk o̱ Chihowa yʋt mi̱ko ya̱ isso na leplosi ʋbi yosh a̱yʋt nitak ai illi ka ont ʋhli cha, abeka ai ʋtta chuka ya̱ ai ʋtta tok: mihma mi̱ko ushi Chohlam ak osh mi̱ko in chuka ya̱ pehlichit yakni ya̱ okla ha̱ nan im apihi̱sa tok.

⁶ Micha Asaliah nana akaniohmi tok inla kʋt, micha nana yʋmihchi tok moma kʋt Chutah i̱ mi̱ko ʋhleha i̱ nitak holisso ha̱ a holisso keyu cho?

⁷ Micha Asaliah ʋt i̱ki ʋhleha ha̱ ta̱kla nusi tok; mihma i̱ki ʋhleha ta̱kla Lewi in tʋmaha hak o̱ okla a hohpi tok; mihma ushi Chohlam ʋt ʋlhtobʋt mi̱ko tok.

⁸ Chutah i̱ mi̱ko Asaliah ʋt mi̱ko tok afʋmmi ont ishit pokoli tuchina akucha untuchina ho̱, Cheloboam ushi Sachaliah ʋt Samalia ya̱ ʋttʋt hʋshi hannali ho̱ Islael a̱ i̱ mi̱ko tok.

⁹ Micha Chihowa itikba ya̱ nana ik achukmo kak o̱ yʋmohmi tok; i̱ki ʋhleha hʋt yʋmohmi tok ak o̱ chiyuhmi tok: Nebat ushi Cheloboam ʋt nan ashʋchit Islael a̱ ashʋchechi tok a̱ ik i̱ filʋmmo tok.

¹⁰ Mihma Chabesh ushi Shallum ʋt i̱ sanalit anumpa luma ikbi mʋt, okla itikba ya̱ a fahamʋt illichi mʋt, ʋlhtobʋt mi̱ko tok.

¹¹ Mikma Sachaliah nana akaniohmi tok inla kʋt, yakeh! Islael i̱ mi̱ko ʋhleha i̱ nitak holisso ha̱ a holissoshke.

¹² Ilʋppak osh Chihowa im anumpa Chehu im anumpulit, Ʋlla ʋhleha ai itishali ont aiushta kʋt Islael im aiombinili holitompa ya̱ chim ai om binila hi oke, achi tok mak oke. Atuk o̱ yʋmohmi tok.

¹³ Chutah i̱ mi̱ko Ussiah ʋt mi̱ko tok afʋmmi ont ishit pokoli tuchina akucha chakkali ho̱, Shallum ʋt mi̱ko tok; atuk osh hʋshi achʋfa ho̱ Samalia ya̱ ʋttʋt mi̱ko tok.

¹⁴ Mihma Kati ushi Menahem ʋt Tisah ya̱ ʋttʋt iʋt Samalia ya̱ ona cha, Chabesh ushi Shallum a̱ Samalia ya̱ a fahamʋt illichi cha, ʋlhtobʋt mi̱ko tok.

¹⁵ Mikma Shallum nana akaniohmi tok inla kʋt, micha mi̱ko i̱ sanalit anumpa luma ikbi tok aiena kʋt, yakeh! Islael i̱ mi̱ko ʋhleha i̱ nitak holisso ha̱ a holissoshke.

¹⁶ Yohmi ma Menahem ʋt Tisah ʋttʋt ia tuk osh, Tifsah, micha yʋmma aiasha tuk moma, micha aiʋhli moma ka issot kanchi tok: ik in tiwo tuk ak o̱ issot kanchi tok: micha ohoyo ʋlla shanli moma ka patʋffi tok.

¹⁷ Chutah i̱ mi̱ko Asaliah ʋt mi̱ko tok afʋmmi ont ishit pokoli tuchina akucha chakkali ho̱ Kati ushi Menahem ʋt Islael a̱ i̱ mi̱ko tuk osh afʋmmi pokoli ho̱ Samalia ya̱ ʋttʋt mi̱ko tok.

¹⁸ Mihmʋt Chihowa itikba ya̱ nana ik achukmo kak o̱ yʋmohmi tok; i̱ nitak moma ka Nebat ushi Cheloboam ʋt nan ashʋchit Islael a̱ ashʋchechi tok a̱ ik i̱ filʋmmo tok.

¹⁹ Mihma Assilia i̱ mi̱ko Pul ʋt yakni ya̱ ant in tanampi tok; mihma Pul ibbak ʋt ibafoyuka cha, apehlichika ya̱ kʋllochit ibbak a̱ fohka chi̱ ho̱, Menahem ʋt tʋli hʋta talent tahlepa sipokni achʋfa ho̱ ima tok.

²⁰ Mihma Menahem ʋt Islael a̱ hatak holitopa imi̱ la̱yak chito ʋhleha moma ka tʋh hʋta shekel pokoli tahlapi aiyukali ho̱ Assilia i̱ mi̱ko ima chi̱ kʋt onochit i̱ hoyo tok.

²¹ Mikma Menahem nana akaniohmi tok inla kʋt, micha nana yʋmihchi tok moma kʋt Islael i̱ mi̱ko ʋhleha i̱ nitak holisso ha̱ a holisso keyu cho?

²² Micha Menahem ʋt i̱ki ʋhleha ha̱ ta̱kla nusi tok: mihma ushi Pekahiah ʋt ʋlhtobʋt mi̱ko tok.

²³ Chutah i̱ mi̱ko Asaliah ʋt mi̱ko tok afʋmmi ont ishit pokoli tahlapi ho̱ Menahem ushi Pekahiah ʋt Samalia ya̱ ʋttʋt Islael a̱ i̱ mi̱ko tuk osh afʋmmi tuklo ho̱ mi̱ko tok.

²⁴ Mihmʋt Chihowa itikba ya̱ nana ik achukmo kak o̱ yʋmohmi tok: Nebat ushi Cheloboam ʋt nan ashʋchit Islael a̱ ashʋchechi tok a̱ ik i̱ filʋmmo tok.

²⁵ Mihma im itichanʋlli kʋpitʋni Lemaliah ushi Pekah ʋt i̱ sanalit anumpa luma ikbi cha, Samalia ya̱ mi̱ko in chuka aboha chaha kʋllo ya̱, yʋmma, micha Akob, micha Alieh aiena ka a fahamʋt ʋbi tok; mihma Kileat hatak pokoli tahlapi hosh Pekah ya̱ apeha tok; mihma Pekahiah ya̱ illichi mʋt, ʋlhtobʋt mi̱ko tok.

²⁶ Mikma Pekahiah nana akaniohmi tok inla kʋt, micha nana yʋmihchi tok moma kʋt, yakeh! Islael i̱ mi̱ko ʋhleha i̱ nitak holisso ha̱ a holissoshke.

²⁷ Chutah i̱ mi̱ko Asaliah ʋt mi̱ko tok afʋmmi ont ishit pokoli tahlapi akucha tuklo ho̱ Lemaliah ushi Pekah ʋt Samalia ya̱ ʋttʋt Islael a̱ i̱ mi̱ko tuk osh afʋmmi pokoli tuklo ho̱ mi̱ko tok.

²⁸ Micha Chihowa itikba ya̱ nana ik achukmo kak o̱ yʋmohmi tok: Nebat ushi Cheloboam ʋt nan ashʋchit Islael a̱ ashʋchechi tok a̱ ik i̱ filʋmmo tok.

²⁹ Islael i̱ mi̱ko Pekah i̱ nitak a̱ Assilia i̱ mi̱ko Tiklalh‐pilese ʋt ʋla cha, Ichon, micha Abel‐beth‐maachah, micha Chanoah, micha Katesh, micha Haso, micha Kileat, micha Kalili, Naftali yakni moma aiena ka ishi cha, yukachit Assilia ya̱ isht ia tok.

³⁰ Mihma Ussiah ushi Chohlam ʋt mi̱ko tok afʋmmi ont ishit pokoli tuklo ho̱, Elah ushi Hoshea ʋt Lemaliah ushi Pekah ya̱ i̱ sanalit anumpa luma ikbit fahama cha, illichi mʋt, ʋlhtobʋt mi̱ko tok.

³¹ Mihma Pekah nana akaniohmi tok inla kʋt, micha nana yʋmihchi tok moma kʋt, yakeh! Islael i̱ mi̱ko ʋhleha i̱ nitak holisso ha̱ a holissoshke.

³² Islael i̱ mi̱ko Lemaliah ushi Pekah ʋt mi̱ko tok afʋmmi ont atukla ho̱, Chutah i̱ mi̱ko Ussiah ushi Chohlam ʋt mi̱ko tok.

³³ Mi̱ko mʋt, afʋmmi pokoli tuklo akucha tahlapi tok; atuk osh afʋmmi auahhannali ho̱ Chelusalem a̱ ʋttʋt mi̱ko tok: mikma ishki ʋt Satok ushetik osh hohchifo kʋt Chelusha atok.

³⁴ Mihma Chihowa itikba ya̱ aiʋlhpiesa kak o̱ yʋmohmi tok: i̱ki Ussiah ʋt a yʋmohmi tok moma kak o̱ yʋmohmi tok.

³⁵ Achahaka puta kak illa ho̱ ishit ik kancho tok: okla hʋt achahaka puta ka nan ai ʋbit isht aiokpʋchit, micha nabalama a hukmi kʋt imoma tok. Yʋmmʋt Chihowa in chuka holihta okhissa chaha i̱ shahli ya̱ ikbi tok.

³⁶ Mikma Chohlam nana akaniohmi tok inla kʋt, micha nana yʋmihchi tok moma kʋt Chutah i̱ mi̱ko ʋhleha i̱ nitak holisso ha̱ a holisso keyu cho?

³⁷ Nitak yʋmma Chihowa yʋt Silia i̱ mi̱ko Lesin, micha Lemaliah ushi Pekah itatuklo ka Chutah ya̱ on tihlelit isht ia tok.

³⁸ Atuk o̱ Chohlam ʋt i̱ki ʋhleha ha̱ ta̱kla nusi cha, i̱ki Lewi in tʋmaha ha̱ i̱ki ʋhleha ta̱kla a hollohpi tok: mihma ushi Ahas ʋt ʋlhtobʋt mi̱ko tok.