2 Mi̱ko 14 - Chahta Holisso Holitopa 1886

¹ Islael i̱ mi̱ko Chehoahas ushi Choash ʋt mi̱ko tok afʋmmi ont atukla ho̱, Chutah i̱ mi̱ko Choash ushi Amasiah ʋt mi̱ko tok.

² Mi̱ko mʋt, afʋmmi pokoli tuklo akucha tahlapi tok; atuk osh afʋmmi pokoli tuklo akucha chakkali ho̱ Chelusalem a̱ ahantʋt mi̱ko tok; micha ishki hohchifo kʋt Chehoattan Chelusalem ʋtta yatok.

³ Mihmʋt Chihowa itikba ya̱ aiʋlhpiesa kak o̱ yʋmohmi tok; yohmi kia i̱ki Lewi ya̱ chohmi tok keyu; i̱ki Choash ʋt nana a kaniohmi tok moma kak o̱ yʋmohmi tok.

⁴ Achahaka puta kak illa ho̱ ishit ik kancho tok: okla hʋt achahaka puta ka nan ai ʋbit isht aiokpʋchit, micha nabalama a hukmi kʋt imoma tok.

⁵ Atuk o̱ yakohmi tok, apehlichika yʋt kʋllot ibbak fohka makinli hosh, in tishu ʋhleha i̱ki mi̱ko ya̱ ʋbi tuk a̱ ʋbi tok.

⁶ Yohmi kia ʋbi tok ʋhleha hash im ʋlla ʋhleha hano ik illecho ki tok: Moses i̱ nan ʋlhpisa holisso ha̱ a holisso tok, yʋmma Chihowa yʋt ai apesʋt, Ʋlla ya̱ i̱ki ʋt ʋlhtobʋt illa he keyu hoke, mikma i̱ki ya̱ ʋlla yʋt ʋlhtobʋt illa he keyu hoke; amba hatak ʋt ilap nan ashʋchi tuk aiyukali kak osh isht illa hi oke, achi tok mak atok.

⁷ Yʋmmʋt Etom hatak tahlepa sipokni pokoli ho̱ hʋpi okfa ha̱ ai ʋbi cha, itin tanampi ka Selah ya̱ ishi tok; micha Chokhleel hochifo tok o̱ himak nitak a̱ moma hoke.

⁸ Mihma Amasiah ʋt Islael i̱ mi̱ko Chehu ushi Chehoahas a̱ ushi Chehoash a̱ anumpa shali pit in tihlelit, Ish minti na pi nashuka il iti pisashke, achi tok.

⁹ Mihma Islael i̱ mi̱ko Chehoash ʋt Chutah i̱ mi̱ko Amasiah ya̱ pit i̱ pilʋt, Bʋfaha kʋti Lebanon a̱sha tuk ʋt chuahla Lebanon hiki̱a tuk a̱ pit i̱ pilʋt, Chisotek ʋt sʋso tekchi yachi̱ ho̱ imá, achi tok; atuk o̱ nampoa nukshopa Lebanon ʋtta tuk ʋt bʋfaha kʋti hash ahʋhlichit akʋchi tok.

¹⁰ Etom a̱ ish imaiya tuk o̱ mʋhli, mihma chi chu̱kʋsh ʋt ʋba chisht onʋshke; isht ish ilauata cha, chin chuka ish ahantashke; nanta katiohmi ho̱ ile nukowʋchit antʋt ishit hotopʋt chishno, micha Chutah hʋsh aienʋt hʋchi akʋma hinla cho? achi tok.

¹¹ Yohmi kia Amasiah ʋt hakla he keyu tok; yʋmohmi hoka Islael i̱ mi̱ko Chehoash ʋt ia tok; micha yʋmma, mikmʋt Chutah i̱ mi̱ko Amasiah itatuklo kʋt Chutah imm?-?Belh‐shemesh ak o̱ nashuka ai iti pisa tok.

¹² Mihma Chutah ʋt Islael itikba ya̱ akakoha tok; mihmʋt hatak ʋt yihlepʋt im ʋlhtipo aiyukali ona tok

¹³ Mihma Islael i̱ mi̱ko Chehoash ʋt Chutah i̱ mi̱ko Chehoash ushi Ahasiah ya̱ ushi Amasiah ya̱ Belh‐shemesh a̱ ai ishi cha, Chelusalem a̱ ona mʋt, Chelusalem holihta ya̱ Eflaim holihta okhissa ya̱ ʋttʋt ia hosh chukbika holihta okhissa ona ka kubit tahlepa ushta ho̱ kinʋffi tok.

¹⁴ Micha tʋli holisso lakna, micha tʋli hʋta, micha nan aiʋlhto Chihowa in chuka, micha mi̱ko in chuka naholitopa aiasha a̱sha tuk moma, micha anumpa isht aia̱hlichi hatak halanli ya̱ ishi cha, falamʋt Samalia ya̱ ona tok.

¹⁵ Mikma nana akaniohmi inla ka Chehoash ʋt yʋmihinchi tok, micha nan ai im aia̱hli tok, micha Chutah i̱ mi̱ko Amasiah ya̱ kaniohmit itibi tok aiena kʋt Islael i̱ mi̱ko ʋhleha i̱ nitak holisso ha̱ a holisso keyu cho?

¹⁶ Mihmʋt Chehoash ʋt i̱ki ʋhleha ha̱ ta̱kla nusi cha, Samalia ak o̱ Islael i̱ mi̱ko ʋhleha ha̱ ta̱kla a hollohpi tok: mihma ushi Cheloboam ʋt ʋlhtobʋt mi̱ko tok.

¹⁷ Atuk o̱ Islael i̱ mi̱ko Chehoahas ushi Chehoash ʋt illi haya̱, Chutah i̱ mi̱ko Choash ushi Amasiah ʋt afʋmmi auahtahlapi ho̱ okcha̱yʋt ahanta tok.

¹⁸ Mikma Amasiah nana akaniohmi tok inla kʋt Chutah i̱ mi̱ko ʋhleha i̱ nitak holisso ha̱ a holisso keyu cho?

¹⁹ Mihma Chelusalem a̱sha tuk ʋt i̱ sanalit anumpa luma ikbi tok: mihma malelit Lachish a̱ ona tok: yohmi kia iakaiyachit pila cha, yʋmmak o̱ ai illichi tok.

²⁰ Micha issuba onochit okla isht ʋla tok: mihma i̱ki ʋhleha ha̱ ta̱kla Chelusalem Lewi in tʋmaha hak o̱ a hollohpi tok.

²¹ Mihma Chutah okla moma kʋt Asaliah ya̱ yʋmmʋt afʋmmi auahhannali ho̱ ishi cha, i̱ki Amasiah ya̱ atobbichit mi̱kochi tok.

²² Mi̱ko ash osh i̱ki ʋhleha ha̱ ta̱kla nusi haya̱, Asaliah ʋt Elalh a̱ ikbi cha, Chutah ya̱ i̱ falʋmmichi tok.

²³ Chutah i̱ mi̱ko Choash ushi Amasiah ʋt mi̱ko tok afʋmmi ont isht auahtahlapi ho̱, Islael i̱ mi̱ko Choash ushi Cheloboam ʋt Samalia ya̱ ʋttʋt mi̱ko tuk osh, afʋmmi pokoli ushta akucha achʋfa ho̱ mi̱ko tok.

²⁴ Mihmʋt Chihowa itikba ya̱ nana ik achukmo kak o̱ yʋmohmi tok: Nebat ushi Cheloboam ʋt nan ashʋchit Islael a̱ ashʋchechi tok moma achʋfa kia ik i̱ filʋmmo tok.

²⁵ Islael in Chitokaka Chihowa im anumpa in tishu Amittai ushi Chonah hopaii Kalh‐hefe ʋtta ya̱ tohno na anumpohonli tok mak o̱, Islael im aiʋhli Hamalh achukowa ya̱ ʋttʋt ia hosh yakni patali okhʋta ona ka falʋmmichit ishi tok;

²⁶ Islael ilbʋsha kʋt palʋmmi fehna ka Chihowa yʋt pisa tok oka: micha yuka, micha yuka keyu aiena kʋt iksho tok, mihma Islael apela yʋt iksho tok oke.

²⁷ Micha Chihowa yʋt Islael hohchifo ka ʋba shutik nutaka ya̱ a kashoffit kancha he miha tok keyu: amba Chihowa yʋt Choash ushi Cheloboam ibbak ak o̱ ishit hlakoffichi tok.

²⁸ Mikma Cheloboam nana akaniohmi tok inla kʋt, micha nana yʋmihchi tok moma kʋt, micha nan ai im aia̱hli isht itin tanampi tok, micha kaniohmit Tamaskʋs, micha Hamalh, yʋmmʋt Chutah immi hatuk o̱, falʋmmichit ishi cha, Islael a̱ ima tok aiena kʋt Islael i̱ mi̱ko ʋhleha i̱ nitak holisso ha̱ a holisso keyu cho?

²⁹ Mihmʋt Cheloboam ʋt i̱ki ʋhleha Islael i̱ mi̱ko ʋhleha ha̱ ta̱kla nusi tok: mihma ushi Sachaliah ʋt ʋlhtobʋt mi̱ko tok.