Biblia Todo Logo
Bìoball air-loidhne

- Sanasan -

2 Mi̱ko 13 - Chahta Holisso Holitopa 1886

1 Chutah i̱ mi̱ko Ahasiah ushi Choash ʋt mi̱ko tok afʋmmi ont ishit pokoli tuklo akucha tuchina ho̱, Chehu ushi Chehoahas, ʋt Samalia ya̱ ʋttʋt Islael a̱ i̱ mi̱ko tuk osh, afʋmmi auahuntuklo ho̱ mi̱ko tok.

2 Mihmʋt Chihowa itikba ya̱ nana ik achukmo kak o̱ yʋmohmi tok; micha Nebat ʋshi Cheloboam ʋt nan ashʋchit Islael a̱ ashʋchechi tok ak o̱ iakaiya tok; achʋfa kia ik i̱ filʋmmo tok.

3 Mihma Chihowa im ai i̱ nukkilli yʋt Islael a̱ i̱ sanalit libbi mʋt, nitak moma ka Silia i̱ mi̱ko Hasael ibbak fohki, micha Hasael ushi Benhatat a̱ ibbak fohki tok.

4 Mihma Chehoahas ʋt Chihowa ya̱ im ilbʋsha ma, Chihowa yʋt i̱ haponaklo tok: Silia i̱ mi̱ko ʋt ilbʋshalí hatuk o̱, Islael ʋt ilbʋsha ka pisa tok okʋt.

5 (Mihma Chihowa yʋt Islael a̱ hlakoffichi ima tok; yohmi ho̱ Silia okla ibbak a̱ i̱ nutaka tuk ʋt kohcha tok: micha Islael im ʋlla ʋhleha hʋt cha̱shpo atok chohmit im ʋlhtipo puta ka aiasha tok.

6 Yohmi kia Cheloboam in chuka achʋfa yʋt nan ashʋchit Islael a̱ ashʋchechi tok a̱ ik i̱ filʋmmo tok; amba a noho̱wa tok; micha Samalia ya̱ Ashelah ak kia hikia moma tok.)

7 Okla ha̱ Chehoahas a̱ im ashanchi kʋt issuba ombinili pokoli tahlapi, micha itichanʋlli pokoli, micha hatak aka a̱ya tahlepa sipokni pokoli illa tok oka: Silia i̱ mi̱ko ʋt ʋbit tahli cha, lukfi yo̱ bolit pushechi ka chohmichi tok oka.

8 Mikma Chehoahas nana akaniohmi tok inla kʋt, micha nana yʋmihchi tok moma kʋt, micha nan ai im aia̱hli tok ʋt Islael i̱ mi̱ko ʋhleha i̱ nitak holisso ha̱ a holisso keyu cho?

9 Micha Chehoahas ʋt i̱ki ʋhleha ha̱ ta̱kla nusi tok: mihma Samalia ak o̱ a hohpi tok: mihma ushi Choash ʋt ʋlhtobʋt mi̱ko tok.

10 Chutah i̱ mi̱ko Choash ʋt mi̱ko tok afʋmmi ont ishit pokoli tuchina akucha untuklo ho̱, Chehoahas ushi Chehoash ʋt Samalia ya̱ ʋttʋt Islael a̱ i̱ mi̱ko tuk osh afʋmmi auahhannali ho̱ mi̱ko tok.

11 Micha Chihowa itikba ya̱ nana ik achukmo kak o̱ yʋmohmi tok: Nebat ushi Cheloboam ʋt nan ashʋchit Islael a̱ ashʋchechi tok achʋfa kia ik i̱ filʋmmo hosh a noho̱wa tok.

12 Mikma Choash nana akaniohmi tok inla kʋt, micha nana yʋmihchi tok moma kʋt, micha nan ai im aia̱hli Chutah i̱ mi̱ko Amasiah ya̱ isht itibi tok aiena kʋt Islael i̱ mi̱ko ʋhleha i̱ nitak holisso ha̱ a holisso keyu cho?

13 Mihmʋt Choash ʋt i̱ki ʋhleha ha̱ ta̱kla nusi tok: mihma Cheloboam ʋt im aiombinili holitompa ya̱ om binili tok; mihma Choash ʋt Islael i̱ mi̱ko ʋhleha ta̱kla Samalia ak o̱ a hollohpi tok.

14 Mihma Elisha yʋt abeka kʋt abeka yʋmma isht illa chi̱ hatok. Mihma Islael i̱ mi̱ko Choash ʋt im ona cha, nashuka o̱ wakayʋt yaiya mʋt, A̱ki ma! a̱ki ma! Islael im itichanʋlli, micha issuba ombinili ʋhleha yoke, achi tok.

15 Mihma Elisha yʋt, Ititanampo, micha oski naki puta aiena ka ishí, im achi tok. Mihma ititanampo, micha oski naki puta aiena ka ishi tok.

16 Mihma Islael i̱ mi̱ko ya̱, Chibbak a̱ ititanampo yash ishit halʋlli, im achi tok. Mihma ibbak a̱ ishit halʋlli tok; mihma Elisha yʋt ilap ibbak a̱ mi̱ko ibbak a̱ potonli tok.

17 Mihma, Okhissushi hʋshi akohchaka imma ya̱ tiwí, achi tok. Mihma tiwi tok. Yohmi ma Elisha yʋt, Hu̱sá, achi tok. Mihma hu̱sa tok. Mihma Elisha yʋt, Chihowa isht a hlakoffichi oski naki yoke, micha Silia isht im a hlakoffi oski naki yoke; Silia okla ha̱ Afek a̱ a fahamʋt ish taiyahla chi̱ hoka, achi tok.

18 Mihmʋt oski naki ya̱ aiowá, achi tok. Mihma aiowa tok. Mihma Islael i̱ mi̱ko ya̱, Yakni ya̱ isht issó, im achi tok. Mihma hituchina ha isht isso mʋt, issa tok.

19 Mihma Chitokaka immi hatak ash osh i̱ nokowa mʋt, Tahlapi ha, keyukmʋt hannali ha ish issa hetuk oke; yohmi hatuk okmʋto, Silia ya̱ fahamʋt imaiyʋt ont ish lushumma hetuk oke; yohmi tuk kia himak ano hituchina ha illa ho̱ Silia ya̱ fahamʋt ish imaiya chi̱ hoke, achi tok.

20 Atuk osh Elisha yʋt illi tok; mihma okla hohpi tok. Atuk o̱ Moab a̱ya kanohmi kʋt, afʋmmi ant chukowa ma, yakni ya̱ iba chukowa tok.

21 Atuk o̱ yakohmi tok, hatak o̱ okla hohpi hosh ma̱ya ma, yakeh! a̱ya achʋfa ka okla pisa tok; mihmʋt hatak ash Elisha im ahollohpi ya̱ pila tok: atuk o̱ hatak ash osh ona cha, Elisha foni ya̱ haleli mʋt, fiopa cha, wakayʋt hikia tok.

22 Mikma Silia i̱ mi̱ko Hasael ʋt Chehoahas ʋt ahanta nitak moma ka Islael a̱ ilbʋshali tok.

23 Yohmi tuk kia Chihowa yʋt Eblaham, Aisak, micha Chekob aiena nan itim apesa yatok pulla hatuk mak osh i̱ kanʋt i̱ nukha̱klot filemʋt i̱ holhponayo hanta onochi cha, chukilissʋchi ik bʋnno, micha itikba ya̱ ai ishit ik kancho ki̱sha tok.

24 Yohmi ma Silia i̱ mi̱ko Hasael ʋt illi tok; mihma ushi Benhatat ʋt ʋlhtobʋt mi̱ko tok.

25 Mihma Chehoahas ushi Chehoash ʋt Hasael ushi Benhatat a̱, tʋmaha puta Hasael ʋt i̱ki Chehoahas a̱ itin tanampi hosh ibbak a̱ a kohchit im ishi tok a̱, anonti ibbak a̱ a kohchit im ishi tok: hituchina ha Choash ʋt imaiya cha, Islael in tʋmaha puta ka falʋmmichit ishi tok.

Published by the American Bible Society 1848-1886, reprinted 1913

British & Foreign Bible Society
Lean sinn:



Sanasan