2 Mi̱ko 11 - Chahta Holisso Holitopa 1886

¹ Atuk o̱ Ahasiah ishki Ahlaliah ʋt ushi ʋt illi na pisa mʋt, wakaya cha, mi̱ko ishtatiaka moma ka ʋbit tahli tok.

² Yohmi kia mi̱ko Cholam a̱ ushetik, Ahasiah ya̱ in tek Chehosheba yʋt Ahasiah ushi Choash a̱, mi̱ko ushi ʋhleha illit taha ka, a kohchit lumʋt ishit kʋnia tok; yʋmma, micha pishechi itatuklo ka aboha anusi ya̱ a kohchit Ahlaliah ya̱ okla in luhmi na ik illo tok.

³ Mihma lumʋt takla Chihowa in chuka ahanta na afʋmmi hannali tok: mihma Ahlaliah ʋt yakni ya̱ i̱ mi̱ko tok.

⁴ Atuk o̱ afʋmmi ont isht untuklo ma, Chehoiata yʋt pit hoyot atoni, micha anumpa a̱hlichi aiena tahlepa puta i̱ kʋpitʋni ʋhleha ha̱ Chihowa in chuka ya̱ isht ʋla cha, nana itim apesʋt, Chihowa i̱ chuka ya̱ anumpa kʋllo ya̱ ai il onoche?-?chi mʋt, mi̱ko ushi ya̱ pisachi tok.

⁵ Micha im apesʋt, Anumpa hʋsh aia̱hlicha chi̱ kʋt ilʋppak oke; ont hʋsh atuchina kʋt nitak hullo ya̱ hʋsh chukowa cha, mi̱ko im aboha aiatoni apistikeli hʋchia hachi̱ hoke.

⁶ Mikma ont atuchina kʋt Su holihta okhissa ya̱ hiela chi̱ hoke; mikma ont atuchina kʋt anumpa a̱hlichi a̱shaka holihta okhissa ya̱ hiela chi̱ hoke: yohmi hosh aboha aiatoni yash hʋsh apistikeli cha, okla ha̱ hʋsh kanʋllicha chi̱ hoke.

⁷ Yohmi kʋt nitak hullo ya̱ kashapa tuklo hosh hʋsh kohcha moma kʋt Chihowa in chuka aiatoni ya̱ mi̱ko ʋt anta ka hʋsh apistikela chi̱ hoke.

⁸ Micha hatak moma kʋt nahalupa ieshi bieka hosh mi̱ko ya̱ hʋsh afolubla chi̱ hoke: mikma kʋna hosh a baiʋlli ka ʋlakmʋt, illashke; micha mi̱ko ʋt kohoncha, micha ant chukoho̱wa ka hʋsh apehashke, achi tok.

⁹ Mihma tahlepa puta i̱ kʋpitʋni ʋhleha hʋt naholitompa isht ʋtta Chehoiata yʋt apihi̱sa tuk moma mak o̱ yʋmihchi tok: mihmʋt hatak ʋt in tʋshka aiyukali kʋt nitak hullo ya̱ chukowa hetuk, micha nitak hullo ya̱ kohcha hetuk aiena ka ishi cha, naholitompa isht ʋtta Chehoiata ya̱ im ʋla tok.

¹⁰ Mihma tahlepa puta i̱ kʋpitʋni ʋhleha ha̱ naholitompa isht ʋtta yash osh mi̱ko Lewi in tʋbi tʋli halupa ontʋla puta, micha in telihpa puta Chihowa in chuka ai asha tuk a̱ ima tok.

¹¹ Mihma anumpa a̱hlichi ʋt nahalupa ieshi bieka hosh mi̱ko ya̱ afolublit chuka chukbika ishtimpakimma ʋttʋt ia hosh, chuka ʋlhfʋbekimma chukbika ya̱ ona mʋt, alta, micha chuka ya̱ i̱ bili̱ka ka hieli tok.

¹² Mihma mi̱ko ushi yash ishit kohcha mʋt, bita ha̱ om biteli cha, nan isht atokowa ya̱ ima tok: mihma okla mi̱kochi cha, nan ahʋmmi tok: mihmʋt ibbak a̱ okla itabolichi mʋt, Mi̱ko ʋt okcha̱yashke, ahanchi tok.

¹³ Atuk o̱ Ahlaliah ʋt anumpa a̱hlichi, micha okla aiena kʋt shakapa ka haklo mʋt, okla ha̱ im onʋt Chihowa in chuka ya̱ ona tok.

¹⁴ Micha pisa ma, yakeh! a yʋmohmi chatuk mak o̱, mi̱ko ʋt ahikia paknaka ya̱ hikia ma, kʋpitʋni ʋhleha hash osh, micha ishit pu̱fa olachi puta kʋt mi̱ko ya̱ bili̱ka hieli ma, okla moma kʋt nayukpʋt ishit pu̱fa olahanchi tok. Mihma Ahlaliah ʋt i̱ nafohka ya̱ hlilʋffi mʋt, Anumpa luma ikbit mi̱ko i̱ sanali yoke, anumpa luma ikbit mi̱ko i̱ sanali yoke, achi tok.

¹⁵ Mihma naholitompa isht ʋtta Chehoiata yʋt tahlepa puta i̱ kʋpitʋni ʋhleha, tʋshka chipota pehlichi ʋhleha ha̱ i̱ mihʋt, A baiʋlli ka ho kohchí; mikma kʋna hosh iakaiyak?-?ma, bʋshpo falaia ya̱ isht illichí, im achi tok. Naholitompa isht ʋtta yash osh, Chihowa in chuka ya̱ ik ai illo kashke, achi hatuk oka.

¹⁶ Mihma ibbak ishit potolit okla ishi tok; mihma issuba puta kʋt mi̱ko im aboha ai ʋla chatuk hina yak o̱ ia tok; mihma yʋmmak o̱ ai illichi tok.

¹⁷ Mihma Chehoiata yʋt Chihowa ya̱, micha mi̱ko, micha okla aiena ka nan itim apesʋchi ho̱ Chihowa im okla hachin tok; micha mi̱ko ya̱, micha okla ha̱ itim apesʋchi akinli tok.

¹⁸ Mihma yakni ya̱ okla moma kʋt Baal im aboha ona cha, kinʋffi tok; micha im alta puta, micha i̱ naholbʋt toba puta aiena ka boshulliehit tahli mʋt, Baal naholitompa isht im ʋtta Mattan a̱ alta puta itikba ya̱ ai ʋbi tok: mihma naholitompa isht ʋtta yash osh Chihowa in chuka ya̱ apesʋchi puta ka atokoli tok.

¹⁹ Mihmʋt tahlepa puta i̱ kʋpitʋni ʋhleha, micha nan atoni, micha anumpa a̱hlichi ʋhleha, micha yakni ya̱ okla moma ka ishi tok; mihma mi̱ko ya̱ Chihowa in chuka ya̱ okla ai ishit anumpa a̱hlichi i̱ holihta okhissa hina yak o̱ minti hosh mi̱ko in chuka ya̱ isht ʋla tok: mihma mi̱ko ʋhleha im aiombinili holitompa om binili tok.

²⁰ Mihma yakni yʋmma okla moma kʋt nayukpa ma, tʋmaha kʋt nuktaiyala tok: mihma Ahaliah ya̱ mi̱ko in chuka bili̱ka ya̱ bʋshpo falaia yo̱ isht ai illichi tok.

²¹ Chehoash ʋt mi̱ko mʋt, afʋmmi untuklo tok.