2 Mi̱ko 10 - Chahta Holisso Holitopa 1886

¹ Mihma Ahab ʋt ushi pokoli untuklo hosh Samalia ya̱ a̱sha tok. Mihma Chehu ʋt Samalia ya̱ pit holissochit, Chesleel kʋpitʋni ʋhleha, asʋnonchi ʋhleha, micha Ahab im ʋlla hofantichi ʋhleha aiena ka pit i̱ pilʋt,

² Himak a̱ holisso ilʋppʋt hʋchim ona makinlikmʋt, hʋchi̱ shahli ushi ʋhleha hʋt hʋchi takla a̱sha, micha itichanʋlli puta, micha issuba puta, micha tʋmaha holihta kʋllo, micha tʋnʋp a̱ya isht im ʋlhtaha aiena kʋt hʋchim a̱sha hokʋt;

³ Hʋchi̱ shahli ushi ʋhleha ha̱ achukma i̱ shahli, micha a yʋmohma he ʋlhpiesa i̱ shahli kak o̱ hʋsh ahayuchi cha, i̱ki im aiombinili holitompa ya̱ hʋsh binilichi cha, hʋchi̱ shahli in chuka achʋfa ya̱ hʋsh im itibashke, achi tok.

⁴ Mihma okla nukshopa kʋt atampa fehna mʋt, Yakeh! mi̱ko tuklo kʋt itikba ik hielo tok; yohmi ka katiohmi kak osh pishno ʋto e hiela hinla cho? achi tok.

⁵ Mihma mi̱ko in chuka achʋfa pehlichi, micha tʋmaha ha̱ pehlichi, micha asʋnonchi ʋhleha, micha ʋlla hofantichi ʋhleha aiena kash osh Chehu ya̱ anumpa pit i̱ pilʋt, Chin tishu ʋhleha pia hoke, micha nana ho̱ ish pi̱ mihakma, moma e yʋmihcha chi̱ hoke; hatak nana kia e mi̱kocha he keyu hoke: chishno ʋt ish pisa kʋt chim ʋlhpiesa kak osh ish yʋmihchashke, achi tok.

⁶ Yohmi ma atukla ma holisso pit i̱ holissochit, Ʋno hʋchia hokmʋt, micha ʋm anumpa ha̱ hʋsh haklo hokmʋt, hʋchi̱ shahli ushi hatak ʋhleha noshkobo ha̱ ishit, onnaha himak a̱ chohmi fokakma Chesleel a̱ isht hʋs sʋm ʋlashke, achi tok. (Yohmi ka mi̱ko ushi ʋhleha hʋt pokoli untuklo hosh tʋmaha yʋmma hatak hochitoka ʋhleha yosh hofantichi tuk a̱ takla aiasha tok.)

⁷ Atuk o̱ yakohmi tok, holisso hʋt im ona ma, mi̱ko ushi ʋhleha ha̱ hatak pokoli untuklo ho̱ ʋbi cha, noshkobo ha̱ kishi apitta mʋt, Chesleel pit i̱ pila tok.

⁸ Mihma anumpa shali ʋt ant im anolit, Mi̱ko ushi ʋhleha noshkobo ha̱ isht ʋlʋshke, achi tok. Mihma, Holihta okhissa achukowa yak o̱ itʋnaha tuklo ho̱ hʋsh ashachashke, mikma a̱sha na onnashke, achi tok.

⁹ Atuk osh yakohmi tok, onnahinli ma, kohchʋt ont hikia cha, okla moma ka, Aiʋlhpiesa hʋchia hoke; yakeh! ʋno ak osh a̱ shahli ha̱ i̱ sanalit anumpa luma ikbit ʋbi li tuk oke; amba kʋta hosh ilʋppa moma ka ʋbi tuk oh cho?

¹⁰ Yʋmohmi hoka Chihowa im anumpa hʋt, yʋmmʋt Ahab in chuka achʋfa ya̱ Chihowa yʋt nana ahanchi tok a̱ nana achʋfa kia aka itula he keyu ka hʋsh ithaiyanashke; Chihowa yʋt in tishu Elichah ya̱ tohno na anumpuli tok mak osh yʋmihchi tuk oka, achi tok.

¹¹ Micha Chehu ʋt Ahab in chuka achʋfa Chesleel a̱ a̱sha tuk, micha hatak i̱ holitompa ʋhleha moma, micha i̱ kana ʋhleha, micha naholitompa isht im asha ʋhleha aiena ka ʋbit tahli cha, achʋfa kia ik i̱ hlakoffecho tok.

¹² Mihma wakaya cha, ia mʋt, Samalia ya̱ ona tok: atuk osh hina takla Belh‐eket‐haloim a̱ hikia mʋt,

¹³ Chehu ʋt Chutah i̱ mi̱ko Ahasiah itibapishi ʋhleha ha̱ pisa cha, Kʋta hʋchia hoh cho? achi tok. Mihma, Ahasiah itibapishi ʋhleha pia hoke: micha mi̱ko im ʋlla ʋhleha, micha ohoyo mi̱ko im ʋlla ʋhleha aiena ka il aiokpʋcha chi̱ hosh il ia hoke, achi tok.

¹⁴ Mihma, Okcha̱ya ho̱ oh ishí, achi tok. Mihma okcha̱ya ho̱ okla ishi cha, kʋli hofobi Belh‐eket talaia ya̱ hatak pokoli ushta akucha tuklo ho̱ ai ʋbi tok: achʋfa kia ik hlakoffecho tok.

¹⁵ Atuk osh yʋmma ʋttʋt ia mʋt, Lechab ushi Chehonatab ʋt afamʋt minti na pisa cha, aiokpʋchi tok: mihmʋt, Sa chu̱kʋsh ʋt chi chu̱kʋsh a̱ im ʋlhpesa ka, yʋmma chiyuhmi hosh chi chu̱kʋsh ʋt ʋlhpesa cho? achi tok. Mihma Chehonatab ʋt, Yohmishke, achi tok. Yohmi hokmʋt, chibbak a̱ is sʋmashke, achi tok. Mihma ibbak a̱ ima tok: mihma ishi cha, halʋllit itichanʋlli yash fohki tok.

¹⁶ Mihmʋt, Si awant ia cha, Chihowa ya̱ amosholit im antia li ka pisá, achi tok. Yohmi ho̱ itichanʋlli ya̱ okla ibai om binilichi tok.

¹⁷ Atuk osh Samalia ya̱ ona mʋt, Chihowa im anumpa, yʋmma Elichah ya̱ im anumpuli tok mak o̱, Samalia ya̱ Ahab ʋt im a̱sha tuk a̱ ʋbit ont taiyahli tok.

¹⁸ Micha Chehu ʋt okla moma ka itʋnahli cha, Ahab ʋt Baal a̱ in toksʋli iskʋtenosi tok a̱, amba Chehu ʋto in toksʋli fehna chi̱ hoke.

¹⁹ Yʋmohmi hoka himak a̱ Baal i̱ hopaii moma, in tishu moma, micha i̱ naholitompa isht asha moma ka hʋs sʋm itʋnahlashke; achʋfa kia iksho kʋt iksho kashke; nan ʋbit isht aiokpʋchi chinto ho̱ Baal a̱ isht im ʋtta la chi̱ hoka: kʋna kia ikshokmʋt, okcha̱ya he keyu hoke, im achi tok. Yohmi kia Chehu ʋt Baal im antia ʋhleha ha̱ ʋbit tahla chi̱ hosh i̱ kostini hatuk oke.

²⁰ Mihma Chehu ʋt, Baal a̱ im itʋnaha holitopa yo̱ hʋsh apesashke, achi tok. Mihma okla apesa tok.

²¹ Mihma Chehu ʋt Islael yakni moma ka a hoyo tok: yohmi ho̱ Baal im antia ʋhleha hʋt ʋlʋt, hatak achʋfa kia ik lo hosh anta kʋt iksho tok. Mihmʋt Baal in chuka ya̱ okla chukowa tok; mihma Baal in chuka yʋt alotʋt in tʋnnʋp ʋttʋt ia kʋt in tʋnnʋp a̱ ona tok.

²² Mihma nafohka aiasha apistikeli ya̱, Baal im antia moma ka nafohka isht i̱ kohchá, im achi tok. Mihma nafohka ya̱ isht i̱ kohcha tok.

²³ Mihma Chehu, micha Lechab ushi Chehonatab itatuklot Baal in chuka ont chukowa cha, Baal im antia ʋhleha ha̱, Hʋsh hoyashke, micha Chihowa in tishu ʋhleha hʋt iksho ho̱, amba Baal im antia ʋhleha kak bano ka hʋsh pisashke, im achi tok.

²⁴ Atuk o̱ nan ʋbit isht aiokpʋchi, micha na hukmit isht aiokpʋchi im issa chi̱ hosh okla chukowa tok; mikma Chehu ʋt yʋmma hatak pokoli untuchina hosh kocha i̱ hieli cha, Hatak a̱ isht ʋlʋt hʋch ibbak fohki li tuk a̱ hatak kanima hosh hlakoffikma, im ilhfiopak ʋt im ilhfiopak a̱ ʋlhtoba chi̱ hoke, achi tok.

²⁵ Atuk o̱ yakohmi tok, na hukmit isht aiokpʋchi im issa kʋt ont tahli mʋt, Chehu ʋt anumpa a̱hlichi ʋhleha, micha itichanʋlli kʋpitʋni ʋhleha ha̱, Ho chukowa cha, oh ʋbí; hatak achʋfa kia ik kohcho kashke, im achi tok. Mihma bʋshpo falaia isht ʋbit tahli tok: mihmʋt anumpa a̱hlichi ʋhleha, micha itichanʋlli kʋpitʋni ʋhleha hʋt kocha pila mʋt, Baal im aboha tʋmaha ha̱ ona tok.

²⁶ Mihmʋt Baal im aboha i̱ naholbʋt toba hiohli ya̱ okla ishit a kohcha cha, hukmi tok.

²⁷ Mihmʋt Baal holbʋt toba ya̱ okla kinʋffi mʋt, Baal im aboha ya̱ okla kinʋffi cha, apotaka chuka puta ikbi tok a̱ himak nitak a̱ moma hoke.

²⁸ Yakohmichi hosh Chehu ʋt Baal a̱ Islael a̱ ai ishit kanchi tok.

²⁹ Yohmi kia Nebat ushi Cheloboam ʋt nan ashʋchit Islael a̱ ashʋchechi tok, yʋmmʋt tʋli holisso lakna wakushi tuklo Behlel a̱ hikia, micha Tan a̱ hikia itatuklo ka ik i̱ filʋmmo tok.

³⁰ Mihma Chihowa yʋt Chehu ya̱, Ta tikba ya̱ aiʋlhpiesa mak o̱ yʋmohmit ish achukmali tuk, micha sa chu̱kʋsh nukfoyuka tuk moma mak o̱ Ahab in chuka achʋfa ya̱ ish yʋmihchi hokʋt, ʋlla ʋhleha aiitishali ont aiushta kʋt Islael im aiombinili holitompa ya̱ chim ai om binila hi oke, im achi tok.

³¹ Yohmi kia Chehu ʋt ahah! ahnit chu̱kʋsh ai oklu̱hʋchit Islael in Chitokaka Chihowa i̱ nan ʋlhpisa ha̱ ik a nowo tok: Cheloboam ʋt nan ashʋchit Islael a̱ nan ashʋchechi tok a̱ ik i̱ filʋmmo tok.

³² Nitak yʋmma foka ma Chihowa yʋt Islael a̱ atikko?-?nuffiit isht ia tok: mihma Hasael ʋt Islael im aiʋhli afullota moma,

³³ Chatan a̱ ʋttʋt hʋshi akohchaka pila ia hosh, Kat okla, micha Luben okla, micha Manasseh okla, yʋmmʋt Kileat yakni moma, Aloe, yʋmmʋt Anon okhina bili̱ka talaia ka ʋttʋt ia hosh, Kileat, micha Bashan aiena ka fahama tok.

³⁴ Mikma Chehu nana akaniohmi tok inla kʋt, micha nana yʋmihchi tok moma kʋt, micha nana ai im aia̱hli tok moma aiena kʋt Islael i̱ mi̱ko ʋhleha i̱ nitak holisso ha̱ a holisso keyu cho?

³⁵ Mihma Chehu ʋt i̱ki ʋhleha ha̱ ta̱kla nusi tok; mihma Samalia ak o̱ okla a hohpi tok: mihma ushi Chehoahas ʋt ʋlhtobʋt mi̱ko tok.

³⁶ Mihma Chehu ʋt Samalia ya̱ ahantʋt Islael a̱ i̱ mi̱ko tok nitak moma kʋt afʋmmi pokoli tuklo akucha untuchina tok.