2 Mi̱ko 1 - Chahta Holisso Holitopa 1886

¹ Yohmi ma Ahab ʋt illi haya̱, Moab ʋt Islael a̱ i̱ filʋmmit i̱ sanali tok.

² Atuk o̱ Ahasiah ʋt ʋba potʋlhpo Samalia talaia ka ʋttʋt iti okhowatkʋchi ya̱ ʋbanʋblit ont itula cha, abeka tok: mihmʋt anumpa shali ʋhleha ha̱ pit pila cha, Iʋt Eklon in chitokaka Baal‐sebub a̱, abeka ilʋppa a sa hlakoffikmá, nana chi̱ ka ont hʋsh i̱ ponaklashke, im achi tok.

³ Mihma Chihowa im enchel ʋt Elichah Tishbeh hatak a̱, Wakayʋt, Samalia i̱ mi̱ko im anumpa shali ʋhleha ha̱ ont ish afama cha, Chitokaka yʋt Islael a̱ iksho kak o̱, Eklon in chitokaka Baal‐sebub a̱ i̱ ponaklot ia hosh hʋsh a̱ya cho?

⁴ Yohmi hoka Chihowa yʋt yak achishke, Topa ha̱ ish oiya tuk ʋt, yʋmma ish akowa chi̱ keyu hoke, amba chilli pulla chi̱ hoke, ish im achashke, im achi tok. Mihma Elichah ʋt ia tok.

⁵ Atuk o̱ anumpa shali ʋhleha hash osh falamʋt im ona ma, Nanta katiohmi ho̱ hʋsh falama cho? im achi tok.

⁶ Mihma, Hatak osh ant pi afama cha, Oh iá, falamʋt mi̱ko ʋt hʋchi pila tuk a̱ hʋsh im ona cha, Chihowa yʋt yak achishke, Chitokaka yʋt Islael a̱ iksho kak o̱, Eklon in chitokaka Baal‐sebub a̱ ish i̱ ponakla chi̱ hosh ish pila tuk oh cho? yʋmohmi hokʋt topa ha̱ ish oiya tuk ʋt, yʋmma ish akowa chi̱ keyu hoke, amba chilli pulla chi̱ hoke, hʋsh im achashke, pim achi tuk oke, okla im achi tok.

⁷ Mihma, Ant hʋchi afama cha, anumpa ilʋppa puta ka hʋchim anumpuli kʋto, hatak katiohmi tuk oh cho? im achi tok.

⁸ Mihma, Hatak hishi chito hosh na hakshup isht ʋskofʋchi yo̱ isht ʋskofaiyachi tuk oke, okla im achi tok. Mihma, Elichah Tishbeh hatak ash oke, achi tok.

⁹ Yohmi mʋt pokoli tahlapi i̱ kʋpitʋni ya̱, micha i̱ pokoli tahlapi ka aieninchit pit i̱ pila tok: atuk o̱ im ona tok; mihma yakeh! nʋnih tʋbokaka yo̱ binnili tok. Mihma, Chitokaka immi hatak chia ma! mi̱ko ʋt, Ish akowashke, achishke, im achi tok.

¹⁰ Mihma Elichah ʋt afalamichit, pokoli tahlapi i̱ kʋpitʋni yash, Atukma, Chitokaka immi hatak sia hokma, luak ʋt ʋba ik minti cha, chishno, micha chi̱ pokoli tahlapi aiena ka hukmit ik hʋchi tahli, im achi tok. Mihma luak ʋt ʋba minti cha, yʋmmak ash, micha i̱ pokoli tahlapi aiena kash hukmit tahli tok.

¹¹ Atuk o̱ anonti pokoli tahlapi i̱ kʋpitʋni inla yo̱, micha i̱ pokoli tahlapi ka aieninchit pit i̱ pila tok. Atuk o̱ miha mʋt, Chitokaka immi hatak chia ma! mi̱ko ʋt yak achishke, Tu̱shpʋt ish akowashke, im achi tok.

¹² Mihma Elichah ʋt afalamichit, Chitokaka immi hatak sia hokma, luak ʋt ʋba ik minti cha, chishno, micha chi̱ pokoli tahlapi aiena ka hukmit ik hʋchi tahli, im achi tok. Mihma Chitokaka in luak ʋt ʋba minti cha, yʋmmak ash, micha i̱ pokoli tahlapi aiena kash hukmit tahli tok.

¹³ Atuk o̱ anonti pokoli tahlapi atuchina i̱ kʋpitʋni ya̱, micha i̱ pokoli tahlapi ka aieninchit pit i̱ pila tok. Atuk o̱ pokoli tahlapi i̱ kʋpitʋni atuchina yash osh iʋt ona mʋt, Elichah itikba ya̱ hʋchukbihlepa cha, im ilbʋshʋt, Chitokaka immi hatak chia ma! ʋm ilhfiopak, micha chin tishu ʋhleha pokoli tahlapi ilʋppa im ilhfiopak ʋt chi tikba ya̱ a holitopashke, chim asilhha lishke.

¹⁴ Yakeh! luak ʋt ʋba minti cha, pokoli tahlapi cha̱shpo i̱ kʋpitʋni tuklo, micha i̱ pokoli tahlapi bi̱ka hukmit tahli tuk oke: yʋmohmi hoka ʋm ilhfiopak ʋt chi tikba ya̱ a holitopashke, im achi tok.

¹⁵ Mihma Chihowa im enchel ʋt Elichah ya̱, Awant ish iashke; ish i̱ nukshopa ná, im achi tok. Mihma wakaya cha, awant iʋt mi̱ko ya̱ im ona tok.

¹⁶ Mihmʋt, Chihowa yʋt yak achishke, Anumpa shali ʋhleha hʋt Eklon in chitokaka Baal‐sebub a̱ i̱ ponakla chi̱ ho̱ ish pila tuk ʋt (Chitokaka yʋt Islael a̱ iksho na, im anumpa ha̱ ish a ponakla he keyu ak atuk oh cho?) yʋmohmi hokʋt topa ha̱ ish oiya tuk ʋt, yʋmma ish akowa chi̱ keyu hoke, amba chilli pulla chi̱ hoke, im achi tok.

¹⁷ Atuk o̱ Chihowa im anumpa ha̱ Elichah ʋt anumpuli tuk mak o̱ illi tok. Mihma, Chehoshafat ushi Cheholam ʋt Chutah i̱ mi̱ko tok afʋmmi ont atukla ho̱, Cheholam ʋt ʋlhtobʋt mi̱ko tok; ushi ʋt ik im iksho hatuk oka.

¹⁸ Mikma nana a kaniohmi inla Ahasiah ʋt yʋmihinchi tok ʋt Islael i̱ miko ʋhleha i̱ nitak holisso ha̱ a holisso keyu cho?