2 Kolinhlian 9 - Chahta Holisso Holitopa 1886

¹ Ʋbanumpuli a̱hli ʋhleha nan isht im ahanta he imma yʋmmak ash okʋno, nan isht mihʋt hʋchi̱ holisso chi la he ʋm ʋlhpesa keyu.

² Yohmik bano ahni kʋt hʋchim ʋlhtaiyaha hatuk, mihma Akaia ai asha kak kia afʋmmi achʋfa foka kash nana kʋt im ʋlhtaiyaha hatuk, mihi yash o̱ Masetonia ai asha ka isht im ilauata li hatuk; yohmi hatuk o̱ na hʋsh a mosholi kʋllo kʋt laua fehna ka yimitʋchit anukfohkiechi ka ithaiyana lishke.

³ Yohmi ka ilʋppak ash o̱ hʋchim ʋlhta̱ha chi̱ ka, achi tuk mak osh il itibapishi ʋhleha ha̱ pit tihleli li tuk oke; yohmi ka nan isht e hʋch ilauwaiyata tuk ash o̱ ont ik ai a̱hlo keyu ka chi̱ kak atuk.

⁴ Masetonia hatak ash o̱t si api̱hʋt ona yoba cha, nana kʋt ik hʋchim ʋlhtaho ke tuk o̱ ont ahayuchi na, na yimmit isht ilauwaiyata tuk mihi yo̱ ai isht a pi hofahya hinla kʋt, hʋchishno ak a he okʋno il achi keyu.

⁵ Yohmi ka il itibapishi ʋhleha hash ot ti̱kba hʋchim a̱ya cha, nan isht hʋsh i̱ kana he ʋt isht anuhumpa tuk ash, tikbanli atahla he ʋlhpesa ahnit, i̱ miha li tuk; yohmi ka pilla nan isht i̱ kana yʋmmak a he ash ot ʋlhtaiyaha kʋt, nan il ahayuchi bʋnna yo̱ ik chohmo kashke.

⁶ Yohmi ka kʋna hosh ik lauacho hosh hokchi hokʋto, mihi yosh ik lauacho hosh ʋma chi̱ ak inli hoke; mikma kʋna hosh lauachi hosh hokchi hokʋto, mihi yosh lauachi hosh ʋma chi̱ ak inli, ilʋppa achi lishke.

⁷ Kʋna kia ilap im anukfila hak o̱ na ti̱kba nan isht ik ahni ha yosh hatak moma kʋt nan ik imá; isht nukha̱klo keyu, mikmʋt yohma hi atuk ahni kak o̱ keyu; aiokpanchit nan ima yak o̱ Chihowa yʋto i̱ hullo hoke.

⁸ Yohmi ka Chihowa hʋt nan isht i̱ kana moma ka isht hʋchim a lauacha hinla kʋt im ʋlhpiesa hoke; yohmikma nana moma ka isht hʋch im ʋlhtaiyaha biekʋt, na toksʋli achukma moma mʋt isht a hʋchin laua hi oke.

⁹ Yʋmmʋt na fimmi hatuk; micha yʋmmʋt ilbʋsha yo̱ nan ima hatuk aiena kʋt, nan ai ʋlhpiesa ho̱ yʋmihchi tuk a̱ takali na bilia hi hoke.

¹⁰ Yohmi ka kʋna hosh na hokchi a̱ na nihi im atahli yak osh hʋchim ilimpa chi̱ pʋska ma ik atahanlí, micha hʋchi̱ na nihi hollokchi tuk ash ik ibakahanlí, mikmʋt na hʋsh a kaniohmi ai ʋlhpesa im ʋni ya̱ i̱ shahlichit ik ibafoho̱ki; achi hosh holisso hoke.

¹¹ Nana ka lauachit hʋsh ima chi̱ kʋt, nana moma isht a hʋchin laiyauwa ka yʋmmak osh pishno pulla hatuk mak o̱, la̱wa kʋt Chihowa ha̱ yak oke im ai ahna chi ka, nukfohkihinchishke.

¹² Nan isht apehlʋchi ilʋppak oka isht ahanta kʋt ʋbanumpuli a̱hli ʋhleha nan ik im iksho kash o̱ nan im atahli illa keyu, amba Chihowa ha̱ lauachit yak oke im ai ahni ʋhleha ha̱ isht a laiyawa ak inlishke.

¹³ Klaist im ʋbanumpa ha̱ im antia hʋsh il anohonli; yohmi mʋt ilap, micha hatak moma ka nan isht hʋsh apelʋchi na nan isht apelʋchi ilʋppak ash o̱ imomaka pi̱hi̱sa pulla hosh Chihowa ya̱ okla holitoblichishke.

¹⁴ Yohmi mʋt ʋba isht hʋchi anumpohonli pulla hosh Chihowa nan isht i̱ kana fehna kʋt hʋchi anukfoyuka chi̱ ka, ai ahnit isht hʋchi̱ hullo hoke.

¹⁵ Chihowa nan isht i̱ kana yʋt anumpa ho̱ isht annoa he keyu hoka yak oke im ai ahni lishke.