2 Kolinhlian 8 - Chahta Holisso Holitopa 1886

¹ Yʋmohmi ka itibapishi li ʋhleha ma! Masetonia yakni chʋch a hiohli ka Chihowa hʋt ilap nan isht i̱ kana yo̱ ihi̱ma ma,

² Nan imomaka pisa chinto a palʋmmi kak o̱ nan isht im il aiyukpa kʋt la̱wa, yohmi mʋt ilbʋsha fehna yatuk ʋt ilap nan ahnit nan itahobi kʋt, lauachi fehna tuk a̱ isht e hʋchim anolishke.

³ Nan isht il ilauechi, a̱hli, nan isht il ilauecha hi a̱ im atampa ak inli kia, yʋmihcha he ahnit, ilap inli nana im anukfila hatuk o̱ atokowa anoli li hoke;

⁴ Nan isht i̱ kana yash il ishi cha, na yimmi a̱hli ʋhleha isht im ia ka ibachʋfʋt il apelʋcha hi a̱, okla ai ahni fehnʋt pim asilhha tuk oke.

⁵ Yohmi kʋt ilʋppak o̱ okla yʋmihchi tuk, yohma he ahnit pim anukfila tuk keyu; yohmi kia na tikba Chitokaka yoka okla il im issa cha, anonti Chihowa nan ai ahni pulla ho̱ pishno ma pim il issa tuk oke.

⁶ Yohmi hatuk o̱ nana ka isht wakaya hatuk okʋt, Titʋs ak osh nan isht i̱ kana hʋsh bohla he yʋmmak ash kia hʋchi ai itahobit tahla hi a̱, il im ahni tuk oke.

⁷ Yʋmohmi hoka na yimmi, micha anumpuli imponna, micha nan ithana, micha tu̱shpʋt anukfohkʋt nana ka isht ahanta, mikmʋt hʋsh pi̱ hullo aiena, nana moma ma isht a hʋchim ʋlhtaiyaha laua ka, chohmit nan isht i̱ kana ilʋppak kia hʋchin lauashke.

⁸ Nan ʋlhpisa yo̱ isht anumpuli li keyu, amba inla tu̱shpʋt anukfohkʋt nan achunanchi yak oke; yohmi kʋt na hʋshi̱ hullo ai a̱hli kak o̱ otʋninchi la he ak atuk oke.

⁹ Hʋpin Chitokaka Chisʋs Klaist, yʋmmak okʋt nan in laua yatuk kia, hʋchishno pulla kak o̱ ilbʋsha yo̱ toba tok; yʋmmʋt nan ilbʋsha pulla hatuk mak o̱ na hʋchin laua chi̱ hatok ʋt hʋsh ithana hoke.

¹⁰ Yohmi ka tikba kash isht hʋsh wakaya kʋt, nana ka hʋsh yʋmihcha he ak illa keyu, amba afʋmmi achʋfa foka kash yohmikbano ahnit, hʋchi anukfoyuka ak inli tok, ilʋppʋt nan isht hʋchim ʋlhpesa hoka, ʋno nana anukfilli li kʋt anoli lishke.

¹¹ Yohmi hoka himonasi ya̱ nana kʋt ai yʋmohma he yatuk ash hʋsh yʋmihchashke: yohmik bano ahnit hʋchim ʋlhtaiyaha hatuk okʋno na hʋchim a̱sha ka isht hʋsh ai a̱hlichi kʋt, hʋchim ʋlhtaiyaha ak inlashke.

¹² Im anukfila ak osh nan tikba yohmikbano ahni ha yatuk okʋno, hatak yʋmmʋt nana ho̱ i̱shi tuk ash isht ʋlhpisa ho̱ ima kʋt isht ai ʋlhpesa hoke, amba yʋmmak ash ot nana hash ik isho ke tuk ak osh isht ik im ai ʋlhpiso chatuk keyu.

¹³ Hʋchishno ak osh na hʋchi̱ weki, nan inla yʋto nan ik ahalaio ka hi o̱ miha li keyu.

¹⁴ Amba ai itilauashke, yohmi hoka himonasi ano na hʋchin laua yak osh ilbʋshʋt na bʋnna yak o̱ apelʋcha chi̱; yohmi tukma ilap nan in laua yak kia ilbʋshʋt na hʋchi bʋnnakma hʋchi apelʋcha chi̱; yohmikma nana kʋt ai itilaui kʋt;

¹⁵ Kʋna hosh nana ka lauachit itahobi hatuk kia, atampa kʋt ik im iksho hoke; mihma kʋna hosh ik lauachot itahobi hatuk kia, ak im ono keyu, achi hosh holisso ka chohmi hoke.

¹⁶ Yohmi ka achilitʋt nana yʋmmak ash isht hʋchim ʋtta chi̱ ka, Titʋs im anukfila ha̱ Chihowa hʋt anukfohkichechi tuk a̱ yak oke, im ahni lishke.

¹⁷ Yʋmmak ash osh nan in toho̱no li ka aiokpanchi fehna mʋhli hatuk; yohmi kʋt ilap inli nan im anukfila kʋt achilitʋt, ila tu̱shpa fehnʋt hʋchi̱ ma̱ya hatuk oke.

¹⁸ Yohmi ma ʋbanumpa pulla hatuk mak o̱ chʋch hiohli moma ka im a holitopa il itibapishi ha̱, tuklonchit pit e pila hatuk.

¹⁹ Yohmi kʋt yʋmmak bano hatuk keyu, amba Chitokaka yʋmmak ash inli kʋt isht a holitopa chi̱, mikmʋt nana kʋt yohmikbano ahnit hʋchim ʋlhtaiyaha tuk ʋt otaiyana chi̱ ka, nan isht i̱ kana ilʋppak okʋt pishno pulla hatuk mak o̱ ai yʋmohmi tuk a̱ yʋmmak ash ieshit pi takla nowʋt a̱ya chi̱ kʋt, chʋch ʋhleha ho̱ yʋmmak ash ot ai im ʋlhtokowa ak inli tuk oke.

²⁰ Nan isht i̱ kana laua ilʋppak ash yakohmichit isht il ahanta na kʋna kia nan isht ik pi mihacho ka chi̱ ka, ilʋppa ahah! il ahani tuk oke.

²¹ Chitokaka itikba ak illa keyu, amba hatak puta itikba yak kia, nana kʋt ʋlhpiesa ho̱ isht iloh il otʋnincha hetuk oke.

²² Yohmi kʋt himonna̱ imomaka e pihi̱sa na nana la̱wa ka achunanchi yatuk il itibapishi, mihmak o̱ ibafo̱kit pit e pila tuk; yohmi ka hʋchi̱ yimmi chinto kʋt nana ka achunanchi i̱ shahli fehna chi̱ pulla hoke.

²³ Hʋchishno yatuk mak o̱ kʋnia kia Titʋs a̱ a ponakla he yoba ká, yʋmmak okʋt ʋm itapela, micha na sʋba toksʋli yoke; yʋmmak keyukmʋt hʋp itibapishi ʋhleha hash a ponakla he yoba ká; yʋmmak okʋt Klaist nan isht a holitopa chi̱ ka, chʋch hiohli puta ho̱ ai im ʋlhtoka ʋhleha hoke.

²⁴ Yʋmohmi hoka nan isht hʋsh i̱ hullo, mikmʋt hʋchishno a̱ nan e hʋchi̱ yimmit isht il ilauata hatuk ash atokolit a̱hlichi kʋt, chʋch hiohli puta, mikmʋt ilʋppak ash aiena ka hʋsh im otʋninchashke.