2 Kolinhlian 7 - Chahta Holisso Holitopa 1886

¹ Yʋmohmi ka a̱ kana holitopa ʋhleha ma! nana hash yakohmiechit pimihi̱sa ka, haknip, micha hʋpim anukfila nan isht ai liteha puyuta ka isht kiloh il a kashofi, Chihowa ha̱ holitohombli pulla hosh ont ai a̱hlit nan ai ashʋchi ka ik pim iksho kashke.

² Pi̱ kanʋt hʋsh il anukfoyukashke; hatak nana kia kil ʋlhpesalo hatuk keyu; hatak nana kia il ai okpʋnichi hatuk keyu; hatak nana kia haksichi hosh nan il im ishi hatuk keyu.

³ Anumpa hʋchi onochi la hi osh ilʋppa anumpuli li keyu; hʋch ibai illi hokmá, okcha̱yʋt hʋsh ibai ahanta hokmá, nana hi ʋt pi̱ chu̱kʋsh a̱ hʋsh pim a foyuka hoke, tikba kash achi li tuk oka.

⁴ Yohma chi̱ ahnit, na yimmi chintot hʋchim anumpuli li hokʋt otʋninchi li fehnʋshke; nan isht hʋchi ilauahanta li chinto hoke; na hopohla ma isht ʋm alotowa kʋt, na pim apalʋmmi a moma ka isht a sai yukpa ʋm atampa fehna hoke.

⁵ Masetonia yakni ya̱ ant e chukowa ha yatuk a̱ pi haknip ʋt ik foho kʋmohmi; yohmi hoka a pi afolubli moma ka nan isht a pi̱ palʋmmi; kocha ya̱ ai itihimbi ma, pi anu̱kaka ma, pi nukshohumpʋshke.

⁶ Yʋmohmi kia Chihowa hʋt kʋna hosh im anukfila akanlosi puta hokʋno nuktalali, yʋmmak osh Titʋs ʋt a̱yʋt ʋla pulla ho̱ pi nuktalali tuk.

⁷ Yohmi kʋt yʋmmʋt a̱yʋt ʋla kak bano keyu, amba na nuktanla mihi yo̱ yʋmmak ash ot isht hʋchi anuktanla pulla tuk osh, nan isht hʋs sa̱ hullo kʋllo, mihmʋt na hʋchi nukha̱klo, hʋchim anukfila ha̱ kʋllochit isht hʋs si atakali aiena ka yʋmmak ash ot ant pim anoli hoka: yohmi hoka nan isht sai yukpa ʋm i̱ shahli fehna tuk oke.

⁸ Yohmi kʋt hʋchi̱ holissochit isht hʋchi nukha̱klochi li tuk ʋt sa nukha̱klo tuk kia, himak ano sa nukha̱klo keyushke; holisso yʋmmak ash ot na hʋchi nukha̱klochi kia, hʋshi kanʋlli achʋfa ho̱ chohmi tok a̱ akostininchi li hoke.

⁹ Himonasi ya̱ sai yukpʋshke, na hʋchi nukha̱klo kak keyu, amba na hʋchi nukha̱klot hʋsh ile kostininchi kak atuk oke: pishno ak atuk mak o̱ nana kia isht hʋchi ai okpulo ka chi̱ kʋt, Chihowa nan ai ahni ho̱ na hʋchi nukha̱klo tuk oke.

¹⁰ Chihowa nan ai ahni ho̱ na nukha̱klo yokʋto anukfohka cha, okcha̱ya chi̱ hosh ile kostininchi kʋt nukha̱kla himma keyu hoke: amba yakni yo̱ nan isht a nukha̱klo yokʋto illa hi osh anukfohka hoke.

¹¹ Chihowa nan ai ahni ho̱ na hʋchi nukha̱klo tuk ʋt ilʋppak fehna ka ho pesá; tu̱shpʋt anukfohkʋt nana isht hʋsh ahanta tuk, a̱hli, na hʋchi onʋtula tuk ash hʋsh il im i̱ kanʋllichi tuk, a̱hli, ile shitilemʋt nan ai ashʋchi hʋsh i̱ nukkilli tuk, a̱hli, na hʋchi nukshopa tuk, a̱hli, yʋmohmi pullakbano ahni fehnʋt hʋchi anukfoyuka tuk, a̱hli, nan a mosholit hʋsh ahanta tuk, a̱hli, ik ʋlhpeso mak o̱ i̱ sanalit hʋsh i̱ nukkilli tuk, yohmi hokʋt nan ilʋppak ash hʋsh ai iti̱ kashofa kʋt nana ilʋppa puta kak o̱ isht hʋsh il otʋninchishke.

¹² Yʋmohmi ka hʋchi̱ holissochi li tuk ʋt kʋna hosh nan ik ʋlhpeso ka yʋmihchi tuk, mihmʋt kʋna hosh ik ʋlhpesot nan i̱ palʋmmi tuk pulla kak o̱ yʋmihchi li tuk keyu; amba Chihowa itikba yo̱ tu̱shpʋt anukfohkʋt isht e hʋchim ahanta ka hʋchim otaiyana chi̱ kak atuk oke.

¹³ Yʋmohmi hoka nan isht hʋchi nuktanla ka isht a pi nuktaiyala hoke; a̱hli, yohmi hokʋt Titʋs yʋmmʋt im anukfila hʋt hʋsh moyuma kak o̱ nan isht a nuktanla tuk okʋt, na yukpa kak o̱ pishno ʋt na pi yukpa pim atampa tuk oke.

¹⁴ Hʋchishno pulla hatuk mak o̱ isht im ilauata li tuk oh kia, sa hofahya keyu; yohmi ka ai a̱hli ho̱ nana moma isht e hʋchim anumpuli kʋt, Titʋs itikba yo̱ na yukpʋt il ilauata ha tuk a̱, yʋmmak ash ot ai a̱hli bieka hoke.

¹⁵ Yohmi ka nukshohumpa, micha wʋnihinchi aiena hosh yʋmmak ash hʋsh aiokpʋchi cha, nana ka mominchit hʋsh im antia tuk a̱ ithaiyana momʋt, yʋmmak ash ot im anukfila isht hʋchi̱ kana kʋt in laiyawa atampa hoke.

¹⁶ Yʋmohma hoka nana moma ka hʋsh ai a̱hli ka hʋchi yimmi li kak osh na sai yukpa hoke.