2 Kolinhlian 6 - Chahta Holisso Holitopa 1886

¹ Yʋmohmi hoka pishno ʋt nan itiba toksʋli pia hosh, Chihowa nan isht i̱ kana hʋsh habena kʋt, pilla hʋsh habena chi̱ keyu ho̱ i̱ kanʋt hʋchin toho̱no li hoke.

² Ai okpancha he nitak ʋt takali ma chi haha̱klo li tok; anonti isht ai okcha̱ya nitak ʋt takali ma chi on chʋfʋt chi apelahanchi li tok, yʋmmʋt achi hoka: yohmi hoka yakeh! himonasi ya̱ aiokpahancha he nitak ʋt takali hoke; yakeh! himonasi yak osh isht ai okcha̱ya he nitak ʋt takali hoke.

³ Ʋbanumpa isht ai ʋtta yʋt ik hofahyo ka chi ka, nana kia isht ai ibetʋbli ya̱ kil i̱ bohonlo hosh;

⁴ Nuktaiyalʋt achunanchi fehna, nan apalʋmmi puta ka isht ai atukonufʋt a hlakofa he keyu;

⁵ Fahama, aboha kʋllo ma foho̱ka, nukkillit yahapa puta, toksahanlit hoyubli, nusi mʋt ik im iksho, hohchaha̱fo,

⁶ Chu̱kʋsh kashofa, nan ithaiyana, i̱ kanʋt nuktaiyala, sʋlahʋt nokowa, Shilombish Holitopa, ilahobi keyu hosh nan it i̱ hullo,

⁷ Nan a̱hli isht anumpa, Chihowa nan isht im ai a̱hli, isht impakimma, mikmʋt isht afʋbekimma ita tuklo kʋt nan isht ai ʋlhpiesa i̱ nan isht tanampi isht ai im ʋlhtaiyaha;

⁸ Nan isht holitopa, anonti nan isht ik holitopo, nan ik achukmo isht annoa, anonti nan achukma isht annoa; na haksichi yo̱ chiyuhmi, yohmi kia ai a̱hli bieka;

⁹ Ik ithano yo̱ chiyuhmi, yohmi kia otaiyani achukma; illa he im ai ʋlhpihi̱sa, yohmi kia yakeh! pi okcha̱ya moma; kostina hi osh nan i̱ palʋmmi, yohmi kia illi keyu;

¹⁰ Na nukha̱klo yo̱ chiyuhmi, yohmi kia na yukpa bieka; ilbʋsha yo̱ chiyuhmi, yohmi kia la̱wa ka nan in lauahanchi; nan ik im iksho kamohmi ho̱ chiyuhmi, yohmi kia nana moma kʋt ai immi; nana kʋt a pi yakohmi hokʋt, Chihowa nan isht im ʋtta ʋt kaniohma hetuk a̱ chohmit nana moma ka isht il ai otʋnihinchi hoke.

¹¹ Kolinhlian hʋchia ma! pitakha yʋt hʋchi̱ wakama, pi chukʋsh mʋt hʋchim a chinto fehna hoke.

¹² Pi chu̱kʋsh a̱ ai iskitinosi ho̱ hʋsh pim a foyuka keyu, yohmi kia hʋchi chu̱kʋsh okʋno iskitinesi ho̱ hʋsh a pi foyuki hoke.

¹³ Yohmi ka mihi ash inli chohmi ho̱ hʋsh pi̱ falaminchi cha, hʋchi chu̱kʋsh a̱ hʋsh pin chitolashke; ʋm ʋlla chipunta chohmi ho̱ im anumpʋli li hoke.

¹⁴ Na yimmi keyu ʋhleha hokʋno it ibai achʋfʋt ikunla abana isht ik hʋch abanaiyo kashke: nanta ho̱ nan ʋlhpesa kʋt nan ik ʋlhpeso ya̱ it ibai ieshi ho̱? nanta ho̱ tohwikeli hʋt okhlili ha̱ isht ai it ibai achʋfa ho̱?

¹⁵ Yohmikma Klaist ʋt Belial a̱ nanta ho̱ isht ai itiba ola achukma ho̱? mikma na yimmi yʋt nan ik yimmo ya̱ nanta ho̱ isht ai it ibai achʋfa ho̱?

¹⁶ Yohmikma Chihowa in tempel ʋt na holbʋt toba puta ka nanta ho̱ isht ai it ibai achʋfa ho̱? Chihowa okcha̱ya in tempel hʋchia hoka; yohmi ka Chihowa hʋt, Yʋmmak oka ai ahanta la chi̱, mikmʋt a noho̱wa la chi̱: yohmi cha in Chihowa sia hokma, anonti ilap ʋt ʋm okla ha chi̱ hoke, achi tok oka.

¹⁷ Yʋmohmi hoka yʋmma a kohchʋt hʋsh mintashke; yohmi cha oh i̱ filʋmmí, mikmʋt nana kʋt ik kashofo ka hʋsh potoli ná; yohmik mak o̱ hʋch i̱ kanʋt hʋchi ieshi la chi̱ hoke, Chitokaka yʋt achishke.

¹⁸ Yohmikmʋt hʋch I̱ki toba likma, anonti hʋchishno ʋt sʋso ʋhleha, sʋsotek ʋhleha hʋsh toba hi oke, Chihowa nana moma i̱ shahli hʋt achishke.