2 Kolinhlian 5 - Chahta Holisso Holitopa 1886

Aiokcha̱ya bilia pisa he anukfoyuka a̱hli, 1; 9 mihmʋt Klaist im ai asha holitopa nan apesa itikba hikia chi̱ kʋt ithaiana, yohmi mʋt im a holitopa he ahnit toksahanli; mihmʋt ib ai achʋfʋt noho̱wa, micha inla mʋt okcha̱ya chi̱ ka anukfokihinchi.

¹ Ʋlhtipo yakni pakna a pim aboha ilʋppak okʋt ont a yuhla kia, ibbak isht atoba tok keyu, ʋba a holitopa ya̱ a bilia chuka, Chihowa hʋt ikbi tok a̱, pin talaia kʋt il ithaiyana hoka.

² Ilʋppak ash o̱ il a foyuka kak osh ilbʋshʋt e hihi̱ha kʋt, pim aboha, yʋmmʋt ʋba a minti mak o̱, isht e fohka he ahni fehnʋt, e hoho̱yo hoke:

³ Yakohmit e foyuka mʋhli hokmʋt, haknip biekʋt il otaiyana chi̱ keyu.

⁴ Ʋlhtipo ilʋppa il ai ahanta hokʋto, nan i̱ weki tikabit ilbʋshʋt e hi̱hi̱ha; yohmi kia ik fohko ka hi ak o̱ il ahni keyu, amba isht il a foyuka he ak oke; yohmi ho̱ nana kʋt illa he imma hatuk okʋto nan okcha̱ya kak o̱ ont ai iksho kak a chi̱ hatok a̱ il ahni hoke.

⁵ Yohmi ka nana kʋt ilʋppak a chi̱ ka a pi atahli tuk ʋt Chihowa ak oke; yʋmmak osh ai okcha̱yʋt bilia yʋt pim ai a̱hla chi̱ ka, Shilombish a̱ pihi̱ma ak inli hoke.

⁶ Yʋmohmi hoka yʋmohmi pulla chi̱ ai ahni fehna kʋt, haknip o̱ il ai anta ta̱kla hokʋto, Chihowa ya̱ i̱ filʋmmi hosh il anta kʋt il ithaiyana hoke.

⁷ Na yimmi pulla kak osh il itʋnoho̱wa, pi̱sa kak o̱ keyu hoka.

⁸ Yʋmohmi pulla chi̱ il ahni fehna, yohmi hokʋt haknip a ai i̱ filʋmmi cha, Chitokaka yak o̱ il ibai achʋfa hi ak osh pim i̱ shaiyahli hoke.

⁹ Yʋmohmi hokʋt ibai achʋfa kak okmá, keyukmʋt i̱ filʋmmi kak okmá, nana kia yʋmmak ash e yukpala chi̱ kʋt e toksahanli hoke.

¹⁰ Ilap haknip aiyuka nana kʋt ai yʋmohmi tuk a̱ nana achukma hokmá, keyukmʋt okpulo hokmá, nana hoh kia, yʋmma yʋmihchi tuk isht ʋlhtoba mak o̱ moyuma kʋt il isha chi̱ kʋt, Klaist im o̱ binili nan ai apesa itikba ya̱ e moma kʋt ont il ai otaiyana chi̱ pulla hoka.

¹¹ Yʋmohmi hoka Chitokaka isht im anukshopa hi a̱ ithaiyana hosh, hatak puta kʋt hlakofa he ahnit il in toho̱no; yʋmohmi hokʋt Chihowa ho̱ il im otaiyani pulla; yohmi hokʋt nan isht hʋsh il akostininchi ma e hʋchim otaiyani ak inli, ahni li hoke.

¹² Isht hʋsh pi ahnincha hi a̱ pishno ak inli kʋt atukla ma isht e hʋchim atahli keyu; amba chu̱kʋsh ak o̱ keyu; ilap nashuka yo̱ isht il aiyukpʋt ilauata ʋhleha yʋmma hʋchishno ʋt i̱ nan hʋsh ok acha hi ʋt hʋchi anukfo̱ka chi̱ kak osh, pishno ak o̱ nan isht hʋsh il aiyukpa kʋt hʋsh il auata chi̱ kak o̱, e hʋchim aha̱ni hoke.

¹³ Pishno ak inli kak osh il il atampli fehna hokmá, nana hoh kia, Chihowa nan isht im a holitopa chi̱ kak oke: keyukmʋt pim anukfila nuktaiyala hokmá, nana kia hʋchishno nan isht hʋchim achukma chi̱ kak oke.

¹⁴ Klaist nan isht pi̱ hullo yak osh a pi anukfoyukʋt pi ai yimilihinchi hatuk oka; yohmi ka achʋfa kʋt moma ka im illi hatok, yohmi hokma, moma kak osh illi yoke, ahnit yakohmichit isht pim anukfila hoka.

¹⁵ Yohmi ka moma kak o̱ im illi hatuk oka, kʋna hosh himmak ma okcha̱yʋt ahanta kʋt, ilap nan ahni banot ahanta he keyu, amba ʋlhtoba hosh illi tuk osh, anonti falamʋt tani tok yʋmmak o̱ holitoblichi hosh ahanta he ʋlhpesa hoke.

¹⁶ Yohmi ka himak a pilla ka haknip imma hatak nana kia il ithaiyana chi̱ keyu: a̱hli, yohmi kia haknip imma Klaist okʋno il ithaiyana tok: yohmi tok kia himak a pilla kʋno yʋmmak ash il ithaiyana chi̱ keyu mak oke.

¹⁷ Yʋmohmi ka hatak nana hosh Klaist a̱ ibai achʋfa hokmʋt, mihi yosh nana toba himona yoke: na sipokni atuk ʋt ont ai ikshot kʋnia na, yakeh! nana puta kʋt himonʋt toba hoke.

¹⁸ Yohmi ka Chihowa yʋmmak osh Chisʋs Klaist pulla hatuk mak o̱ ilap a̱ i̱sht a pit i̱ nanaiyʋchi tok; mihmʋt nan isht it i̱ nanaiyʋchi isht ai ʋtta yo̱ pi atokoli tuk mak osh, nana yakohmi puta ka yʋmihchi yoke.

¹⁹ Yohmi kʋt Klaist pulla ho̱ Chihowa hʋt yakni a̱ ilap a̱ isht il i̱ nanaiyʋchi kʋt, yʋmmak ash nan im ai ashʋchi puta kash o̱ isht in takalihinchi keyu; yohmi mʋt nan isht it i̱ nanaiya im anumpa ha̱ pi anukfoyuki hatok.

²⁰ Yʋmohmi hoka Klaist ʋlhtobʋt im anumpa isht a̱ya pia hoke; yohmi ka pishno pulla hatuk mak o̱ Chihowa hʋt i̱ kanʋt hʋchim anumpohonli chiyuhmi ma; pishno mʋt Klaist ʋlhtoba hosh e hʋchim asilhha ka Chihowa ya̱ hʋsh i̱ nanaiyashke.

²¹ Yʋmmak atuk mak o̱ Chihowa nan isht im ai ʋlhpiesa e toba chi̱ ka, yʋmmʋt nan ashʋchi ithaiyana tok keyu ka, yʋmmak ash o̱ Chihowa yʋt nan ashʋchi yo̱ pim ikbi tok.