2 Kolinhlian 4 - Chahta Holisso Holitopa 1886

Ai a̱hli, achilita hosh ʋbanumpa ha̱ isht anumpohonli tuk ʋt otʋninchi, 1; 7 mihmʋt nan im apalʋmi puta tuk ʋt Chihowa yosh isht aholitopa he, 12 chʋch nan isht im a chukma he; 16 mikmʋt ilap nan isht il ai yukpʋt im a bilia hi a tuk a̱, achi.

¹ Yakohma chi̱ mak o̱, nan isht i̱ nukha̱klo il ishi hatuk mak osh, nan isht ai ʋtta ilʋppak ash o̱ isht il ahanta kʋt, pin takobi keyushke.

² Isht a hofahya he nan isht im aluma puta ka e kanchi mʋt; i̱ kostinit nan isht akanomi ya̱ il ai itʋnowa keyu, Chihowa im anumpa ha̱ ik a̱hlechot il inlʋchi keyu; amba Chihowa itikba ya̱ nan ai a̱hli ya̱ il otʋninchi ka, hatak moma nan isht il akostininchi yʋt a̱hli, pim ahni hoke.

³ Yohmi kia pim ʋbanumpa hʋt luma hokmʋt, okpula he ʋhleha hak o̱ in luma hoke.

⁴ Klaist, yʋmmʋt Chihowa Hoyulba ka, im ʋbanumpa holitopa in tohwikeli hʋt on tomma chi̱ keyu ka, na yimmi keyu yʋmmak ash o̱ im anukfila puta ka yakni ilʋppa i̱ shahli yosh lʋblichi hatuk oke.

⁵ Ʋbanumpa isht il anumpuli kʋt, pishno ak inli ho̱ isht il anumpuli keyu, amba Klaist Chisʋs Chitokaka yak atuk: yohmi hokʋt pishno yokʋto Chisʋs pulla hatuk mak o̱ hʋchin tishu pia hʋt il otʋninchishke.

⁶ Tohwikeli hʋt ai okhlilika ya̱ a kohchʋt tomma chi̱ ka, Chihowa yʋmmak osh im apesa tok okʋt, Chihowa im aholitopa nan isht ithaiyana im a tohwikeli hʋt Chisʋs Klaist i̱ nashuka a minti mak o̱ pima chi̱ hosh pi chu̱kʋsh a̱ a tommi hatuk oka.

⁷ Yohmi kia nan isht ai a̱hli chinto fehna kʋt pishno ak o̱ keyu, amba Chihowa ak o̱ immi ha chi̱ ka, nan ila̱yak holitopa ilʋppak ash o̱ nan ai ʋlhto okfulush toba ho̱ isht il ieshi hoke.

⁸ A palʋmmi bano hosh pia folubli kia, atukonofʋt pi komunta keyu ki̱sha; atia he pim oktʋpa, yohmi kia isht apelʋchi yʋt ik pim iksho ka chi̱ kil ahno hoke.

⁹ Inla yʋt pi̱ palʋmmichi, yohmi kia Chihowa hʋt ik pisso; aka il itula; yohmi kia ik pi okpulo hoke.

¹⁰ Chitokaka Chisʋs ʋt isht illi mak o̱ pi̱ haknip a̱ isht ieshit il a̱ya bilia; yohmi na Chisʋs okcha̱ya yosh pi haknip a̱ ai otʋna chi̱ hatuk oke.

¹¹ Chisʋs ʋt okcha̱ya kʋt illa he pi haknip a̱ isht ai otaha̱na chi̱ ka, Chisʋs pulla hatuk mak o̱ okcha̱yʋt il anta kʋt, illa he pim ʋlhpihi̱sa na bilia hoka.

¹² Yohmi hoka nan illi yosh pi a toksahanli, yohmi kia nan okcha̱ya yosh hʋchi a toksahanli hoke.

¹³ Na yimmi im anukfila, Na sai yimmi yʋmohmi hosh anumpuli li hoke; achit holisso tok a̱ yʋmmak inli ho̱ il ieshi hosh na pi yimmi ak inli, yʋmohmi hokʋt il anumpuli hoke.

¹⁴ Chitokaka Chisʋs a̱ tanichi tok yʋmmak osh Chisʋs pulla hatuk mak o̱ pi tanicha he ak inli, mikmʋt hʋchishno a̱ a pit aieninchit pi hiohlicha hi a̱ il ithaiyana hoke.

¹⁵ Nana puta kʋt hʋchishno pulla hatuk mak o̱ ai yakohmi ka, laua kʋt yak oke ahnit, aiokpʋchi pulla ho̱ nan isht i̱ kana laua kʋt Chihowa yʋt isht a holitopa chi̱ hoke.

¹⁶ Yakohmi hoka pin takobi keyu hoke; yohmi kia hatak pi̱ pakna yokʋto tikambit ma̱ha̱ya kia, hatak anu̱kaka yokʋto nitak osk nitak ma himonʋt tohombʋshke.

¹⁷ Yakosi itintakla ho̱ na pim a palʋmmi shohʋla kia, na holitopa weki bilia nan imaiya fehna ka pim atahli hoke:

¹⁸ Nana puyuta yʋmmʋt otaiyani yak o̱ e pihi̱sa keyu, amba nana kʋt otaiyani yak keyu; nana puta yʋmmʋt otaiyani yokʋto a bilia keyu; amba nana puta yʋmmʋt otaiyani keyu kak osh a bilia yoke.