2 Kolinhlian 3 - Chahta Holisso Holitopa 1886

Pal ʋt ʋbanumpa isht anumpohonli ho̱ Kolinhlia ʋt ʋbanumpa anukfohka kak o̱ yʋmmak ash Chihowa hʋt pit pila hatuk a̱ otʋninchi tok, 1; 6 ʋbanumpa anumpula chi ka Chihowa yak osh ataiyahli tok a tuk, 12 ʋbanumpa hak osh holitopa kʋt Moses nan apesa tok a̱ i̱ shahli.

¹ Pishno ak inli kʋt atuklanchit il il ahninchit isht il ia ho̱? keyukmʋt inla ma̱ya ka chohmit, isht hʋsh pi̱ kana he holisso puta ka il isha he pim ʋlhpesa ho̱? yʋmmak keyukmʋt holisso isht ai i̱ kana ya̱ e hʋchim ai isha hi ʋt ʋlhpesa ho̱?

² Hʋchishno ak osh pi̱ holisso hʋchia hosh pi chu̱kʋsh a̱ a holihi̱so tuk osh, hatak moma ka im otaiyanit im ai it anuhumpa hoke:

³ Pishno yatuk mak o̱ hʋchishno ʋt Klaist i̱ holisso toba tuk otaiyanit hʋsh anoho̱wa kʋt, isht holissochi oka yo̱ isht holihi̱so tok keyu, amba Chihowa okcha̱ya imi Shilombish ak atuk; tʋli patʋssa yo̱ a holihi̱so tok keyu, amba chu̱kʋsh nipi ak atuk oke.

⁴ Yohmi hatuk o̱ Klaist pulla hatuk mak o̱ Chihowa yak osh yʋmihchi tuk a̱ pi̱ yimmishke.

⁵ Pishno ak inli nana ka ai isht anukfillit isht im ai a̱hla he il ahni kak osh pishno ak inli kʋt il ona chi̱ keyu hoke: amba Chihowa ak atuk mak o̱ nana ka pim ai a̱hlit il ona chi̱ hoke.

⁶ Nan it im ʋlhpisa himona nan isht im ʋtta ai a̱hla he mak o̱ yʋmmak osh pi atokoli ak inli tok: holisso tikba yak o̱ nan isht im ʋtta ho̱ keyu, amba Shilombish ak oke; holisso tikba yash okʋto ʋbi yoka, amba Shilombish okʋto okchalinchi yoke.

⁷ Yohmi ka tʋli yo̱ ai in chu̱wa holisso isht ai illa he isht ai ʋtta yʋt holitopa; yohmi ho̱ Moses yʋmma nashuka yʋt shohpalali hoka, Islael ushi ʋhleha hʋt nashuka yash o̱ atokowʋt pisa he keyu ki tok; yʋmmak ash ot ont ai iksho ka hi atok oke;

⁸ Katiohmi hosh Shilombish nan isht ai ʋtta yokak heto holitopa kʋt i̱ shahla hetuk keyu ho̱?

⁹ Isht a palʋmma he nan ʋlhpisa isht ai ʋtta yʋt holitopa hokma, nan isht ai ʋlhpiesa isht ai ʋtta yokak heto holitopa kʋt i̱ shahli fehna he tuk keyu ho̱?

¹⁰ Nana kʋt yakohmit holitopa tok ilʋppak ash ot na holitopa yʋmmʋt i̱ shahli pulla kak o̱ holitopa kʋt ik alauwo ki tok.

¹¹ Nana kʋt ont ai iksho kak osh holitopa tok okma, nana kʋt takali kʋt holitopa i̱ shahli fehna hinla hoke.

¹² Yʋmohmi hoka yʋmohma chi̱ ahnit na pi yimmi hosh anumpa otaiyani fehna ho̱ isht il anumpuli hoke.

¹³ Yʋmohmi kʋt Moses atok ano chohmi keyu, yʋmmak okʋto Islael ushi ʋhleha hʋt nan ʋlhpisa yʋmmak ash ot kʋnia kia, a hlopullichit ai ʋhli pit atokowʋt pisa keyu kak o̱, isht ompoholmo yo̱ ilap nashuka yash isht ompohomo tok.

¹⁴ Yohmi kia yʋmma im anukfila hash ot lʋpa yatok; himak nitak ak kia Testament sipokni im ai itim anumpuli hokʋno nan ompoholmo mihi ash inli kʋt ik i̱ kʋnio ki̱sha hosh takali hoke; yohmi kia yʋmmak ash ot Klaist ak o̱ ont isht ai akshot kʋnia hoke.

¹⁵ Yohmi ka himak ak kia Moses a̱ ai itim anumpuli ka, nan ompoholmo yashot i̱ chu̱kʋsh a̱ on hlipia hoke.

¹⁶ Yʋmohmi tuk o̱ Chitokaka ya̱ pit ai i̱ filemʋt im onakma, nan ompoholmo yash o̱ isht i̱ kancha hi oke;

¹⁷ Yohmi ka Chitokaka yʋt, Shilombish yʋmmak ash oke: yohmi ka kanima yo̱ Chitokaka imi Shilombish ʋt ai otaiyanikma, mihi yo̱ ai yuka keyu mak oke.

¹⁸ Yohmi ka nashuka ompoholmo keyut a pisa yo̱ il a pihi̱sa chohmit Chitokaka im aholitopa ya̱ e pihi̱sʋt, yʋmmak ash inli ho̱ hoyulba chi̱ hosh momʋt inlʋt e toba kʋt, Chitokaka imi Shilombish ʋt a pi̱ yʋmihchi kak o̱, holitopa kʋt i̱ shahlit il a ma̱ha̱ya hoke.