2 Kolinhlian 2 - Chahta Holisso Holitopa 1886

Nana hosh kaniohmi kak o̱ ik im ono ki tuk ʋt anoli, 1; 6 Chʋch a a kohcha tok a̱ i̱ nukhanklot i̱ kʋshofa hi a̱ im ahni; 10 ilap ak kia i̱ kʋshofi tuk a̱ chohmachi: 15 kanima yo̱ ʋbanumpa isht anumpohonli ka Chihowa yʋt im ai okpanchi.

¹ Yohmi ka ʋm anukfila kʋt na nukha̱klo hosh, atukla ma ak hʋchim ono ka chi̱, ilʋppak o̱ ʋno ak inli kʋt ʋm anukfila hatuk oke.

² Hʋchi nukha̱klochi li, yohmi hokma kʋta hosh na sai yukpala hinla ho̱? amba ʋno yak atuk mak o̱ kʋna hosh nukha̱klo tuk yʋmmak inli kak a hinla keyu̱?

³ Yohmi ka ona likmʋt, kʋna ho̱ ibai yukpa la hetuk, yʋmmak ash ot nana a kaniohmi ka isht a nukha̱klo la hinla kak osh, ilʋppʋt mihi ash inli ka isht hʋchi̱ holissochi li hatuk oke: hʋsh moma nan isht hʋchim ai‐yukpa yʋt ʋno a̱ nan isht ʋm il aiyukpa ak inli hoke, ai ahnit hʋsh moma ka hʋchi̱ yimmi lishke.

⁴ Na nukha̱klo fehna, chu̱kʋsh ilbaiyʋshʋt nishkin okchi mʋt laua aiena hosh isht hʋchi̱ holissochi li hatuk; hʋchi nukha̱kla he yak atuk keyu, amba nan isht i̱ hullo yʋmma isht hʋchi̱ hoyullo li fehna hatuk a̱ hʋsh ithaiyana chi̱ kak atuk oke.

⁵ Yohmi kia kʋna hosh na nukha̱klochi tuk okmʋt, ʋno ak illa ho̱ si anukhaklochi tuk keyu: hʋsh moma ka ak hʋchi̱ kʋllo ka chi̱ kak osh ilʋppa hʋchim achi lishke.

⁶ Hatak yʋmma chohmi kʋno nan ʋlhpisa ilʋppak o̱ laua kʋt im apesa tuk a̱, im ai ʋlhpiesa hoke.

⁷ Yohmi tuk a̱ yʋmma chohmi kash i̱ kashofit hopohlʋli kak o̱ hʋsh ahna he tuk oke; yʋmmak keyukma yʋmma chohmi kash ot na nukha̱klot isht ai i̱ palʋmmit kʋnia hinla hoke.

⁸ Yʋmohmi hoka nan isht hʋsh i̱ hullo kʋt yʋmmak ash o̱ hʋsh im otʋnincha chi̱ kak o̱ hʋchim ai ahni lishke.

⁹ Ilʋppak a he mak o̱ holissochi li akinli hatuk; nana moma ka ai im antia hʋchia hokmá, nana ka hʋch imoma ka ithʋna la chi̱ hatuk oke.

¹⁰ Kʋna ho̱ nana ka hʋsh i̱ kashofi hokma, ʋno ak kia i̱ kashofi li hoke; nana hatuk o̱ i̱ kashofi likmʋt, hʋchishno pulla kak o̱ Klaist ʋlhtoba hosh yʋmihchi li hoke.

¹¹ Yʋmmak keyukma Setan ʋt pi haksicha hinla, yʋmma nan ahni ik ʋlhpeso ya̱ kil ithano keyu hoka.

¹² Yohmi ka Klaist im ʋbanumpa isht anumpohonli la chi̱ hosh, Tloas a̱ ona li ma, Chitokaka yʋt nan ai ahni ho̱, okhissa yʋt an tiwa tok.

¹³ Itibapishi li Titʋs a̱ ak ahayucho hokʋt, ʋm anukfila nuktʋla ik sʋm iksho ki tok: yohmi ka okla yʋmmak ash aiokpʋchit issa li mʋt, yʋmma a kohchʋt Masetonia yakni ya̱ ia li tok.

¹⁴ Yohmi hoka, yak oke ahnit, Chihowa ha̱ kiloh aiokpʋchí; yʋmmak osh Klaist pulla hatuk mak o̱ il imaiyacha chi̱ ka pi apelahanchi; mikmʋt kanima moma ka pishno pulla atuk mak o̱ ilap a nan isht im ithʋna i̱ na balama otʋnihinchishke.

¹⁵ Pishno ʋto Klaist ibai achʋfa pia hosh kʋna hosh okcha̱ya chi̱, micha illa chi̱ aiena kak o̱ Chihowa i̱ nan isht balama champuli pia hoke.

¹⁶ Achʋfa kano, illi bitema nan isht ai illa he i̱ pia hoke, mikmʋt inla yano okcha̱ya na balama nan isht ai okcha̱ya pia hoke. Yohmi ka kʋta hosh ilʋppa puyuta ka isht im ai ʋlhpiesa cho?

¹⁷ Laua hʋt Chihowa im anumpa ik ai a̱hlecho ya̱ e chohmi keyu; amba chu̱kʋsh ai a̱hli, yohmi kʋt Chihowa im ʋlhtoka kʋt, Chihowa itikba yo̱ Klaist i̱ hohchifo isht il anumpohonli hoke.