2 Kolinhlian 13 - Chahta Holisso Holitopa 1886

¹ Ilʋppʋt isht atuchina mak o̱ hʋchim a̱ya lishke: Nan atokoli tuklo, tuchina itih ho̱ anumpa moma kʋt isht ai a̱hlashke.

² Tikba hoka hʋchim anoli li tok osh, anonti atukla mak o̱ hʋchi takla anta li chohmit tikbanli hʋchim ano li lishke; yohmi kʋt himak a̱ ik saksho hatuk osh tikba ka yoshuba tok ash, micha inla moma aiena ka pit i̱ holissochi li, yohmi kʋt anonti ona likmʋt, apoanchi la he keyu hoke.

³ Klaist ʋt isht si a hʋchim anumpohonli tuk a̱ atokowa hʋsh hoyo hoka, yʋmmʋt hʋchishno yokʋno ik hʋchi̱ hlampko keyu, amba hʋchi ai a hlampko hoke.

⁴ Ik hlampko hosh ititaiyukhʋna a takalit illi tok kia, Chihowa imi hlampko pulla ho̱ okcha̱ya hoka, pishno ak kia yʋmma iba cha̱fʋt ik pi hlampko; yohmi kia Chihowa imi hlampko yʋt hʋchi onʋtula chi̱ pulla ka, yʋmmak ash iba cha̱fʋt pi okcha̱ya chi̱ hoke.

⁵ Ai yimmi ka yoka hʋsh ibai achʋfakma, nana kʋt hʋchishno inli hʋsh ile pisashke; hʋchishno inli imomaka hʋsh pisashke. Hʋchishno inli hʋch ik ithano cho? Chisʋs Klaist ʋt hʋch iba foyʋka ka, ik ai a̱hlo hʋchia keyukmʋt.

⁶ Yohmi ka pishno yʋt ik ai a̱hlo pia keyu ka, hʋsh ithana chi̱ ka sa yimmishke.

⁷ Micha Chihowa ya̱ pit im asilhha li kʋt, nan ik ʋlhpeso ka ik hʋchi yʋmohmo ka he ak oke: il ai a̱hli kʋt isht il otʋna he ak keyu, amba ik ai a̱hlo yo̱ pia e chiyuhmi kia, hʋchishno yokʋto nana achukma kak o̱ hʋsh yʋmohma he ak oke.

⁸ Anumpa a̱hli il i̱ sanali kʋt nana e kanihma he keyu, amba anumpa a̱hli ya̱ il apelʋchi yak oka.

⁹ Ik pi hlampkokmʋt, hʋchi hlampko kak o̱, pi yukpa hokʋt: anonti ai a̱hlit hʋchim ʋlhtaha he ilʋppak kia e hʋchim ai ahni hoke.

¹⁰ Yʋmohmi ka ik saksho hosh ilʋppa puta ka hʋchi̱ holissochi lishke, ilʋppak atuk keyukmʋt ont hʋch iba takla anta likmʋt, Chitokaka isht im ai a̱hli isht hlampkochi la he, micha isht okpʋni la he ak keyu ho̱ ʋma tok ak o̱ anumpa ishit halupʋchi la hetuk yoba ká.

¹¹ Ishtaiyopi ka itibapishi li ʋhleha ma! na hʋchi yukpashke. Ai a̱hlit hʋchim ʋlhtahashke, ahopohla achukmʋt hʋchim anukfila achʋfʋt, it i̱ nanaiyʋt hʋsh ai ashashke; mikma Chihowa holitoblit nan isht it i̱ nanaiyʋchi yosh hʋchi anukfoyuka chi̱ hoke.

¹² Su̱ksowa holitopa yo̱ isht hʋsh it aiokpʋchashke.

¹³ Ʋbanumpi yimmi a̱hli puta kʋt pit hʋchi aiokpʋchishke.

¹⁴ Chitokaka Chisʋs Klaist nan isht i̱ kana, micha Chihowa isht i̱ hullo micha Shilombish Holitopa ai itibai achʋfa aiena kʋt hʋsh moyuma ka hʋchi anukfoyukashke. Amen.