2 Kolinhlian 12 - Chahta Holisso Holitopa 1886

¹ Nana ka isht ilauata la he okʋto ʋm ʋlhpesa keyu ak inli chishke. Nana ka Chitokaka yʋt sa pisachit ʋm otʋninchi tok ak o̱ isht anumpuli li la chi̱ hoke.

² Afʋmmi auah ushta atampa kash hatak Klaist ibai achʋfa ka ithanali tok; yʋmmʋt haknip o̱ a fohka hokmá nana tok chishba, ak ithanoshke; keyukmʋt haknip a̱ ai i̱ filʋmmi hokmá nana tok chishba, ak ithanoshke; Chihowa ak osh ithana; yʋmmak atuk ash o̱ hoklit ʋba ont atuchina ka isht ona tok.

³ Hatak yʋmma chohmi ka ithana li tok, haknip o̱ a fohka hokmá, haknip a̱ ai i̱ filʋmmi hokmá nana tok chishba, ak ithanoshke; Chihowa ak osh ithana hoke.

⁴ Yʋmmak ash o̱ hoklit Palatais a̱ isht ona na, anumpa he keyu puta hatak okʋt anumpula he ʋlhpiesa keyu ho̱ haklo tok.

⁵ Yʋmma chohmi kak o̱ isht ilauata la chi̱ hoke: yohmi kia ʋno ak inli hokʋno isht ilauata la he keyu, amba nan isht ik sa hlampko puta kak a hi oke.

⁶ Isht ilauata ik sa bʋnna hoh kia, ʋm anukfila hokʋto iksho ka he keyu hoka; a̱hli ho̱ miha la hi okʋt; yohmi kia ilolambi lishke; keyukma hatak kʋna kia sa kaniohmi ho̱ sa pi̱sa, micha a sa ha̱klo kʋt, isht i̱ shahlichit isht si anukfilla hinla hoke.

⁷ Micha nana ʋm otʋni apakna pulla ho̱ isht chahʋt ak atapo ka chi̱ kak o̱, kʋti haknip shamʋlli, Setan in tishu mak o̱ ahama kʋt, isht chahʋt ak atapo ka chi̱ kak o̱, ishit saha̱so ya chi̱ hatok.

⁸ Ilʋppa pulla kak o̱ Chitokaka ya̱ hituchina ha im asilhha li kʋt, ilʋppak ash osh ʋm a filʋmma chi̱ kak atuk oke.

⁹ Mihma, Nan isht ʋm i̱ kana yʋt isht chim ʋlhpesa hoke; nan ʋm isht hlampko yʋt ik hlampko yak o̱ isht im ai ʋlhtaha yoka, ʋm achi tok. Yʋmohmi hoka Klaist isht i̱ hlampko yʋt si onʋtuyula chi̱ ka, nan isht ik sa hlampko isht ilauata li kak osh ʋm ʋlhpesa chi̱ hoke.

¹⁰ Yʋmohmi hoka Klaist pulla kak o̱ nan isht ik sa hlampko puta, nan isht sa hofahyali puta, nan isht hotopa puta, na palʋmmi atukonofa a hlakofa he keyu puta kak o̱, isht il ai yukpa li hoke, ik sa hlampko hok mak osh, sa hlampko hokʋt.

¹¹ Isht ilauahanta li kak osh ik hopoyukso yo̱ toba lishke; hʋs si atoblichi tuk oka; ahninchit isht hʋs si anumpula he ʋlhpesa tok oka: nana ho̱ si ahomba keyu kia, apostel ʋhleha i̱ shahli fehna kak kia a̱sha ka hikia li keyu hoka.

¹² Apostel isht atokowa yʋt hʋch itin takla ya̱ ai yʋmohmi kʋt, nan nuktaiyalʋt achunanchi, nan isht atokowa puta, nan isht nukhlakʋshli puta, na fehna yʋmihchi puta aiena moma ka, isht ai yʋmohmi mʋhli tok.

¹³ Nanta hak o̱ chʋch inla puta ka isht hʋch ik a lauwo tuk oh cho? nana ka ak hʋchi̱ kʋllo ilʋppak atuk ak o̱? ʋno fehna kʋt hʋchim ashʋchi li tok ilʋppak atuk ash hʋs sa̱ kashofashke.

¹⁴ Yakeh! ont isht atuchina mak o̱ hʋch im ona la chi̱ kʋt ʋm ʋlhtahʋshke: yohmi kʋt hʋchi̱ kʋllo la chi̱ keyu; na hʋchimmi hak o̱ keyu, amba hʋchishno yak o̱ hoyo li hokʋt. Ʋlla yak osh i̱ki micha ishki ita tuklo ka nana im ahayucha he ʋlhpesa keyu, amba i̱ki micha ishki ita tuklo kak a hetuk oke.

¹⁵ Micha hʋchishno pulla kak o̱ a lushumichit ik si ataha kia sai yukpa fehna hi oke: hʋchi̱ hullo li kʋt isht i̱ shahlichi li fehna kia, ik lauwot hʋchim a holitopa li hoke.

¹⁶ Yohmi kia ant ik yohmí, hʋchi̱ kʋllo li tok keyu: yʋmohmi kia i̱ kostini li hatuk osh, a haksichit hʋchim ishi li tuk o̱, achi hoke.

¹⁷ Hʋchi̱ pila li tuk yʋmmak ash o̱ kanimi ka nan isht hʋch im ai ishit il ahayuchi li tuk o̱?

¹⁸ Titʋs ʋt hʋchim ona he, ahni lish, itibapishi ma aieninchit pila li tok. Titʋs ʋt na hʋchim ai ishit il ahayuchi tuk o̱? anukfila achʋfʋt il itʋnowa tuk keyu̱? ata̱ya achʋfa ho̱ il ai itʋnowa tuk keyu̱?

¹⁹ Anonti nana isht hʋchim il il a miha, hʋchim ahoba cho? Klaist a̱ iba foyuka hosh Chihowa itikba ya̱ il anumpulishke, yohma kʋt nana moma e yʋmihchi kʋt, pi̱ holitopa fehna ʋhleha ma! isht hʋsh a hlampka he ak oke.

²⁰ Yʋmmak keyukma ona likmʋt, itachowa, it i̱ potʋnno, it i̱ nokowa, it i̱ nukhobela, a̱shaka nana a mihachi, iti̱ shukshoʋt na mihachi, ilefehnʋchi, itakʋshkoa, hʋsh aiena cha ʋlhpesʋt hʋsh ma̱ya na, hʋchi ahayuchi la hetuk ash osh keyu ho̱ hʋchi ahayuchi li, yohmikmʋt a kaniohmi li̱ hʋs sa pisa hetuk ash o̱ keyu hosh, hʋchim otaiyani la he ká, ahnit sa nukshohumpa:

²¹ Yohmi ka anonti ona likma, an Chihowa yʋt a hʋchim itin takla a si akanlosechi na nan ai ashʋchi ma̱shko tuk ʋt na liteha, micha na haui, micha chukʋsh nan isht haui aiena ka yʋmohmi tuk ʋt, i̱ filʋmmit ik ile kostinincho ki̱sha tuk o̱ isht yaha̱ya li yoba ná.