2 Kolinhlian 11 - Chahta Holisso Holitopa 1886

¹ Nan isht ilauwaiyata li kanomosi ka ant ik yohmi, hʋs sʋm ai ahnikbano hʋchim ahni li; yohmi ka ant ik yohmí, hʋs sʋm ahna chi̱ pulla hoke.

² Chihowa anukfoyukʋt nan isht i̱ hullo mak o̱ isht hʋchi̱ huhu̱lo li hokʋt: ohoyo himita hopoyuksa a̱hli hatak haleli keyu chohmi mak o̱, hʋch ishit Chisʋs a̱ im otʋninchi la hi mak osh, i̱ hatak achʋfa chi̱ ka hʋch it im apobʋchi li hatuk.

³ Yohmi tuk kia sinti okʋt ilap kostini pulla kak osh If a̱ haksichi tok a̱, chohmit na hʋchim anukfila hash ot shanaia na nan anukfilli apissali achʋfa, yʋmmʋt Klaist ak o̱ ai achʋfa yash o̱ hʋsh i̱ filʋmma hinla ka, sa nukshohumpa hoke.

⁴ Kʋna hoh kia Chisʋs inla yʋmma isht il anumpuli tuk ash keyu ho̱ isht anumpulit a̱ya, micha Shilombish inla yʋmma hʋchi anukfoyuka tuk ash keyu ho̱ hʋchi anukfoyuka, yʋmmak keyukmʋt ʋbanumpa inla yʋmma hʋsh aiokpʋchi tuk ash keyu ho̱ hʋsh aiokpʋchi hokmʋt, ant ik yohmí, hʋsh im ahni ʋlhpesa hoke.

⁵ Apostel moma i̱ shahli fehna kak kia ik alauecho sia keyu, ʋm aboha hoka.

⁶ Yohmi ka anumpuli hokʋt ik imponno sia, yohmi kia nan ithana kak o̱ keyu; yohmi kʋt hʋch itin takla ya̱ nana moma ka achukmalit isht e hʋchim otaiyani hatuk oke.

⁷ Nan isht hʋchi holitopa chi̱ ka il akanlosechi lish, Chihowa im ʋbanumpa ha̱ pilla isht hʋchim anumpohonli li kak osh nan ashʋchi li hatuk o̱?

⁸ Hʋchi apelʋchit nan isht hʋchim ahanta la chi̱ kʋt, chʋch hiohli inla yo̱ nan im ihi̱shi li kʋt, ilap ak osh nan atobbi ho̱ ishi̱shi li hatuk.

⁹ Yohmi kʋt hʋch iba takla ahantʋt na sa baiyʋnna kia kʋna hosh na hʋchi̱ kʋnia tuk keyu; nana kʋt ik sʋm ono ke tuk okʋno itibapishi li ʋhleha Masetonia minti hosh ʋm atahli tok; yohmi hoka nana moma ka isht ak hʋchim ile wekecho ke tuk; yohmi hokʋt yʋmmak o̱ a si yʋmohma chi̱ mak oke.

¹⁰ Klaist nan isht im ai a̱hli yʋt a sa nukfoyuka hosh, nan isht ilauwaiyata li ilʋppa kʋna hosh Akaia afullota anta kʋt, sʋssacha he keyu hoke.

¹¹ Nanta katiohmi ho̱? hʋchi̱ hullo li keyu kak o̱? Chihowa hʋt ithaiyanʋshke.

¹² Amba anumpa si onochi bʋnna kia, anumpa isht si onocha hi ʋt ik im iksho ka he; micha nana ka isht ai ilauata hatuk ʋt pishno ak inli ho̱ chohmit otaiyana chi̱ kak o̱, a kaniohmit ahanta li hatuk ʋt, yʋmmak o̱ ai yʋmohmit ahanta la chi̱ hoke.

¹³ Yʋmma chohmi kʋt ʋbanumpeshi a̱hli keyu hoke; na haksichi yosh Klaist nan isht im ʋtta ilahobi hoke.

¹⁴ Ilʋppʋt a yakohmi ka anukhlakancha he ʋlhpesa keyu; Setan ak fehna ak kia inlʋt tobʋt a tohwikeli ka im enchil ilahobi chatuk oka.

¹⁵ Yʋmohmi hoka yʋmmak ash in tishu ʋhleha ak kia inlʋt tobʋt, nan isht ai ʋlhpiesa in tishu ʋhleha ha̱ holba hokʋt na fehna keyushke; yʋmma im ishtaiyopi yʋt ilap ʋt nana a kaniohmi chatuk ak inli ho̱ chiyuhma hi oke.

¹⁶ Hatak nana kia im anukfila iksho ik si ahno kashke: yʋmmak keyukmʋt im anukfila iksho si ahni hoh kia, ʋlhpesa ʋm ahni; ʋno ak inli kʋt iskʋtinosi ka isht ilauata lashke, anonti achi lishke.

¹⁷ Ilʋppa puta anumpuli li kʋt Chitokaka ak o̱ iakaiya hosh anumpuli li keyushke; amba im anukfila iksho yo̱ chohmit nukwa̱ya iksho hosh isht ilauata ilʋppa anumpuli lishke.

¹⁸ La̱wa kʋt haknip imma ka isht ilauata kak o̱, ʋno ak kia isht ilauata li ak inla chi̱ chishke.

¹⁹ Hʋchishno ʋto hʋchi hopoyuksa kak osh, im anukfila iksho a̱ yukpa hosh ant ik yohmí, hʋsh im ahni hoka.

²⁰ Hatak okʋt yuka ho̱ hʋch ikbi hokmá, keyukmʋt ʋpʋt hʋchi tahli hokmá, keyukmʋt nana hʋchim ai ishi hokmá, keyukmʋt ile chahʋchi hokmá, keyukmʋt hʋchi nashuka ya̱ isso hokmá, nana kia ant ik yohmí, hʋsh im ahni hoke.

²¹ Ik ahobo hatuk osh isht a hofahya hi o̱ chohmichit anumpuli lishke. Yohmi ak inli hoh kia kanima kʋt nana ka isht ik nukwa̱yo kʋt a̱sha hokma, nan im anukfila iksho chohmit anumpuli hosh, ʋno ak kia isht ik sa nukwiyo ak inlishke.

²² Heblu okla ho̱? ʋno ak kia yʋmmak o̱ sia hoke. Islael okla ho̱? ʋno ak kia yʋmmak o̱ sia hoke. Eblaham ak o̱ isht atia ho̱? ʋno ak kia yʋmmak o̱ sia hoke.

²³ Klaist in tishu ho̱? im anukfila iksho chohmit anumpuli li kʋt, yʋmmak oka i̱ shahli li hoke; yʋmma i̱ shahlichit toksʋli li hoke, atampa ho̱ sa fahama hoke, aboha kʋllo foho̱ka li chatuk, a sʋlli naha kʋt laua chatuk oke.

²⁴ Chu okla ha̱ pokoli ushta chi̱ ma achʋfa hosh iksho ho̱ tahlapi ha im a sa fahama tok.

²⁵ Hituchina ha fuli isht sa fahama tok, himonna ka tʋli isht sa boa tok, hituchina ha, peni fohkʋt a̱ya li tok a̱ okpulo tok, ninak achʋfa nitak achʋfa aiena ka okhʋta pakna takakanli li tok.

²⁶ Anowa hopaki kia himonna̱ a noho̱wa li, oka kia isht ʋm a palʋmmi, na wehli kia isht ʋm a palʋmmi, a̱ yakni achʋfa okla hak kia isht ʋm a palʋmmi, ʋbanumpa ik ithano ma isht ʋm a palʋmmi, tʋmaha anu̱kaka kia isht ʋm a palʋmmi, yakni haiaka kia isht ʋm a palʋmmi, micha itibapishi li ilahobi ʋhleha kia isht ʋm a palʋmmi;

²⁷ Hoyohambli, na hotohompa, himonna̱ nusi ʋm okpohonlo fehna, himmonna̱ hohchʋfot, ituk shihinla, micha kapʋssa ka, haknip bieka aiena hosh isht ʋm a palʋmmi hatuk.

²⁸ Nana ilʋppa moyuma kʋt kochanli a mintit a si onʋtohonla ma, nitak moma ka chʋch hiohli puyuta nana isht anukfilli mʋt a si onʋtohonla hoke.

²⁹ Kʋta hak osh ik hlampko na ʋno ak osh sa hlampko ho̱? kʋta hak osh ibetʋbli na ʋno ak osh ik sa nuklibisho ho̱?

³⁰ Nana ka isht ilauata la he ʋlhpesa hokmʋt, nana kʋt isht a ik sa hlampko imma kak o̱ isht ilauata la chi̱ hoke.

³¹ Chihowa pin Chitokaka Chisʋs Klaist I̱ki, holitopa bilia yak osh, holabi li keyu ka ithaiyana hoke.

³² Hatak pehlichi mi̱ko Aletas nutaka ahanta tuk ʋt Tamaskʋs a̱ si ai yukachi bʋnna kʋt, Tamasenes tʋmaha ha̱ tʋshka chipota atonichi tok.

³³ Yohmi na kishi ho̱ fohkʋt tʋli holihta okhissushi a hlopullit aka ona hosh yʋmma ibbak a̱ i̱ hlakofi li tok.