2 Kolinhlian 10 - Chahta Holisso Holitopa 1886

¹ Yʋmohmi kʋt Klaist chu̱kʋsh yohbi, micha chu̱kʋsh nukhobela iksho pulla ho̱, ʋno Pal sia hʋt hʋchi̱ kanʋt hʋchi tohono lishke; hʋchi takla antakmʋt, im anukfila akanlosi, amba hʋchi̱ filʋmmikmʋto, hʋchi̱ nukwa̱ya iksho sia mak oke.

² Yohmi kʋt haknip imma nan ahni ho̱ nana ka e yʋmihchi tuk a̱ kanimi kʋt pi ahobachi, yʋmmak okʋno nukwa̱ya ikshot i̱ kʋllo li kʋt hʋchi takla ont anta li hokmʋto, nukwa̱yʋt ak hʋchi̱ kʋllo ka he ak osh hʋchim asilhha lishke.

³ Yohmi kʋt haknip o̱ il ai ahanta kia, haknip imma nan ahni yo̱ ai isht e tanahampi keyu.

⁴ Nan isht e tanampi yokʋto hatak osh nan isht tanampi yo̱ chohmi keyu, amba Chihowa pulla hatuk mak o̱ kʋllo ai a̱hli hosh nan a holihta kʋllo puta hatuk a̱ yuhlichi yoka.

⁵ Nan anukfilli ik ʋlhpeso puta, mikmʋt nan anukfilli chaha, yʋmmak okʋt Chihowa nan ithana ya̱ i̱ sanalit ilap inli ile chahʋchi moma ka ishit e kanchi, mikmʋt Klaist a̱ im antia chi̱ ka, nan isht pim anukfila moma ka e yukahanchi yoke.

⁶ Yohmi ka na hʋsh im antia he tuk ʋt ont a hʋchim ai a̱hlikma, nan ik im antio moma kʋno nana kʋt isht ai im ʋlhpiesa mak o̱ isht il i̱ yʋmihcha he ʋt pim ʋlhtaha hoke.

⁷ Nashuka yo̱ chohmichit nana ka hʋsh pihi̱sa ho̱? Kʋna kia Klaist immi sia, ahnit ilap inli il anukchieto hokmʋt, atuklant ilap ak inli hosh ilʋppak ash ik anukfillí, yʋmmak ash ot immi sia, ahni ka, yʋmmak inli ho̱ chohmit pishno kia Klaist immi pia, il ahni hoke.

⁸ Yohmi kʋt nana a pi ʋlhtoka tuk pulla ho̱ nana ka i̱ shahlichit isht ilauwaiyata li ka isht ik hʋchi okpulo hosh, achukma i̱ shahlit hʋsh ma̱ha̱ya hi o̱, yʋmmak ash Chihowa yʋt pima hatuk oka, sa hofahya he keyu hoke.

⁹ Yohmi kʋt holisso ho̱ isht a hʋchi nukshopli la he, ahni li tuk a̱ ik si ahobo ka chi̱ kʋt, ilʋppak o̱ yʋmihchi li hoke.

¹⁰ I̱ holisso hokʋto weki, micha kʋllo, yohmi kia ilap haknip fehna otaiyani hokmʋto ik kʋllo, micha im anumpa mʋt ik ahobo hoka, yʋmmak ash ot achi.

¹¹ Yʋmma chohmi tuk ak osh ilʋppa ik anukfillí, yohmi ka il i̱ filʋmmik mak osh holisso pulla ho̱ anumpa yakohmi ka e yʋmihchi kʋt, pishno fehna il otaiyani hokmak heto, nan isht il anta kʋt, yʋmmak ash atuk ak inli ho̱ e chohma hi oke.

¹² Kanima kʋt ilap inli il ahninchi ʋhleha, yʋmma pishno ʋt isht il iba hotehnachit, isht il it apesa keyu; yohmi ka ilap inli ahninchit nan isht il apesa ʋhleha, micha ilap inli ka isht il it apihi̱sa ʋhleha aiena hokʋto hopoyuksa keyu hoke.

¹³ Yohmi ka nan isht a pim ʋlhpisa ya̱ ont atampa hokʋno nan isht il ilauwaiyata he keyu; amba nan isht ʋlhpisa pulla yʋmmʋt hʋchishno ak kia hʋchim ona he, nan ʋlhpisa yo̱ Chihowa yʋt pim apesa tok ak oke.

¹⁴ Ik hʋchim ono ke tuk ak inli ho̱ chohmit nan isht a pim ʋlhpisa ya̱ pit il atamplit il ile mahampli keyu; Klaist im ʋbanumpa isht anumpohonli ak inli hosh hʋchishno a̱ e hʋchim ona hatok:

¹⁵ Nan a pim ʋlhpisa, yash pit atamplit hatak inla im a pilesa yokʋno nana ka isht il ilauwaiyata he keyu; amba na hʋchi yimmi hatuk ʋt i̱ shahlit hlampko na nan isht a pim ʋlhpisa hash o̱, hʋchishno pulla ho̱ isht a pi chito fehna he ak o̱ il ahni.

¹⁶ Yohmikmʋno hʋsh ai asha ka misha ʋbanumpa isht il anumpohonli kʋt, hatak inla nan isht im ai ʋlhpisa ai ʋlh taiyaha ho̱ isht kil ilauwaiyato ka chi̱ hatuk.

¹⁷ Yohmi ka kʋna hosh ilauwaiyata hokʋto, mihi yosh Chitokaka yo̱ isht ik ilauwaiyatá.

¹⁸ Kʋna hoh kia ilap inli il ahninchi kak osh mihi yosh holitopa keyu, amba kʋna ho̱ Chitokaka ak osh ahninchik mak oh chatuk oke.