2 Kolinhlian 1 - Chahta Holisso Holitopa 1886

Pal ʋt ilap nan isht im apalʋmi ka isht hopoho̱hla kʋt achi; mihmʋt ʋbanumpuli Kolinhla ai asha ka nan isht hopohla tok ash inli ho̱ isht hopohlahan li kʋt Chihowa ya̱ yak oke im ai ahni, 1; 15 nana hosh kaniohmi ho̱ ik im ʋlo ki tok ʋt anoli; 23 i̱ kana kak a tok.

¹ Chihowa nan ai ahni atuk pulla mak o̱ Chisʋs Klaist im apostel Pal, micha il itibapishi Timohli ita tuklo kʋt Chihowa in chʋch, yʋmmʋt Kolinhla a hikia, mikmʋt na yimmi a̱hli moma yʋmmʋt Akaia moma ka ai asha ka aieninchit pit aiokpʋchi kʋt,

² Piki Chihowa, micha Chisʋs Klaist ita tuklo nan isht i̱ kana, micha isht it i̱ nanaiya ita tuklo kʋt hʋchi anukfoyukashke, hʋchim ahnishke.

³ Pin Chitokaka Chisʋs Klaist I̱ki, Chihowa, nan i̱ nukha̱klo fehna I̱ki, micha nan isht anuktanla moma in Chihowa yʋt holitopashke.

⁴ Yʋmmak osh nan isht il ai ilbʋsha moma ka pi nuktalahanli; yohmi ho̱ pishno ʋt Chihowa hak o̱ nan isht im anuktaiyala ya̱ isht a pi nuktaiyala cha, kʋna hoh kia ilbaiyasha hokma, e nuktalahanla hinlʋshke.

⁵ Klaist pulla hatuk mak o̱ nan isht ilbʋsha yʋt pim a laua; yohmi hokʋt Klaist pulla hatuk mak o̱ nan isht a pi nuktaiyala yak kia lauʋshke.

⁶ Yohmi ka nan isht a pilbaiyasha hoh kia, hʋchishno ano nan isht hʋchim ahopohla, micha nan isht hʋchim ai okcha̱ya chi̱ kʋt, nan ilbʋsha yʋmmak o̱ pishno ʋt isht a pilbʋsha tuk ak inli chohmi ka isht a hʋch ilbʋsha hokmak osh nan isht hʋchim ai a̱hli hoke; anonti pishno ʋt isht a pi nuktaiyala hok mak heno, yʋmmʋt nan isht a hʋchim a hopohla, micha hʋchim ai okcha̱ya mak oke.

⁷ Yohmi ka nan ilbʋsha puta ka hʋsh ibai ishi, yohmi hatuk okʋt na hopohla ma hʋsh ibai isha chi̱ ka il ithaiyana kak osh nan isht e hʋchim anukfilli kʋt kʋllo fehnʋshke.

⁸ Iloh itibapishi ʋhleha ma! nan isht a pilbʋsha yʋmmʋt Asia yakni ya̱ a pi onʋtula; yohmi mʋt pim isht hlampko hash imaiyachi na na pi̱ weki fehna mʋt; okcha̱ya he yak kia kil ahno ke tuk a̱, hʋch ik akostinincho ka hi a̱ e hʋchim ahni keyu hoka:

⁹ Yohmi ka illa he anumpa il il ai eshi, yohmi kʋt pishno ak inli ka il anukchieta he keyu; amba illi tanichi Chihowa yak a hetuk oke.

¹⁰ Yʋmmak osh nan illi chinto fehna kash a pi hlakofichi tuk osh, a pi hlakofichi moma: yohmi kʋt yʋmmak ash osh pi a hlakofihincha chi̱ ka yʋmmak o̱ il anukchieto hoke.

¹¹ Hatak laua pulla kak o̱ nan isht i̱ kana pi onʋtuyula tuk a̱, hʋchishno ak kia itapelʋt anumpa ilbʋsha isht hʋsh pi anumpohonli; yohmi ho̱ pishno pulla kak o̱ yak oke Chihowa ya̱ im ahni kʋt laua hi oke.

¹² Isht il il akostininchi isht im ai atokowa kʋt haknip imma isht hopoyuksa keyu, amba Chihowa nan isht i̱ kana pulla hatuk mak o̱ nan anukfila apissali achʋfa, micha Chihowa anukfoyuka ai a̱hli hosh yakni paknaka il ai ahanta hatuk: yohmi hokʋt hʋchishno yak heno i̱ shahlichit il a hʋchi̱ yʋmohmi, ilʋppak osh nan isht il il aiyukpa hoke.

¹³ Nana ka hʋsh it im anumpuli; micha a̱hli hʋsh akostininchi fehna tuk yʋmmak keyukma nana inla yo̱ e hʋchi̱ holissochi keyu hoke; yohmi hoka a̱hli ahnit, akostininchit ma̱ha̱yʋt ont ai ʋhli ka hʋsh ona hi a̱ hʋchim ai ahni lishke:

¹⁴ Chitokaka Chisʋs i̱ nitak ʋt ʋlakma, nan isht pim ilaiyukpa hʋchia ha chi̱ kʋt, yʋmmak inli ho̱ chohmit nan isht hʋchim ilaiyukpa pia ha chi̱ ka, hʋsh kanimi kʋt a̱hli hʋsh pi akostininchi ak inli tuk oke.

^15-16 Yohmi ka yakohmi tok ak o̱ na yimmi hosh atukla ma nan isht ilaiyukpa ka hʋsh isha hi a̱ ti̱kba hʋchim ona la he ahnit, anonti ont iʋt, Masetonia yakni ona li tuk mʋt, anonti Masetonia yakni yash o̱ akohchʋt atuklant hʋchim a̱ya li hok mak osh, Chutia imma a̱ya la chi̱kma, hʋs si apelʋcha hi a̱ ʋm anukfila tuk oke.

¹⁷ Yʋmohmi kʋt yakohmit ʋm anukfila mʋt, ʋm anukfila hʋt fitekʋchi hosh yʋmihchi li tuk o̱? yʋmmak keyukmʋt ʋno ʋto yau, yau, mikmʋt keyu, keyu, achi la hi osh nana ka ahni li kʋt, haknip nan ai ahni ho̱ isht anukfilli li tuk o̱?

¹⁸ Yohmi ka Chihowa hʋt ai a̱hli yatuk o̱, pim anumpa nan isht e hʋchim achi tuk a̱ yau yatuk osh anonti keyu, yatuk keyushke.

¹⁹ Ʋno, mikmʋt Silfanʋs, micha Timohliʋs aiena pulla kak o̱, Chihowa Ushi Chisʋs Klaist, yʋmmʋt hʋchim anuhumpa kʋt, yau yatuk osh, anonti keyu yatuk keyushke, amba yʋmmak okʋt yau yatuk oke.

²⁰ Yʋmmak atuk pulla mak o̱ Chihowa hʋt nana im ihi̱sa tuk moma kʋt yau okma, anonti yʋmmak atuk mak o̱ Amen oke, yohmi kak o̱ pishno ma Chihowa nan isht im a holitopa yoke.

²¹ Yʋmohmi ka Klaist a̱ iloh ibai achʋfa chi̱ ka, hʋpi hlampkohonchi cha, na pi a hʋmmi kʋt, yʋmmʋt Chihowa ak oke.

²² Mihmʋt ilap immi pia ha chi̱ ka, yʋmmak ash osh pi ai a̱hlichi mʋt, ai okcha̱yʋt bilia e pisa he pim ai a̱hlichi kʋt, Shilombish a̱ pi anukfohkechi tuk oke.

²³ Yʋmohmi hoka hʋchi̱ kanʋt na hʋchim anukfilli la chi̱ kak osh, Kolinhla ya̱ ak ono ki̱sha hatuk a̱ Chihowa hʋt ʋmi shilombish a̱ atokowʋt ʋm ithana ya chi̱ ka hoho̱yo lishke.

²⁴ Na hʋchi yimmi ka il i̱ shahli hatuk keyu hoka, amba na hʋchim ai yukpa apelʋchi pia hoke; na yimmi pulla hatuk mak osh hlampkot hʋsh hikia hoke.