2 Hlessalonian 3 - Chahta Holisso Holitopa 1886

Ʋba isht anumpohonla hi a̱ im a sihlha, 1; 6 nan ai ʋlhpiesa ik shana iowo ka he i̱ miha; nan in takobi, micha nan ik ʋlhpeso aiena ka ik ai itapeho ka he, 16 isht aiyopichi kʋt ʋba asihlha.

¹ Ishtaiyopi ka itibapishi li ʋhleha ma! anumpa ilbʋsha isht hʋsh pi anumpohonli na Chitokaka im anumpa yʋt mʋlihinlit a̱yʋt, holitopa kʋt, hʋchim ai yʋmohmi kak inli ho̱ chohmashke:

² Yohmi ho̱ hatak ik ʋlhpeso, micha hatak nan ashʋchi atampa aiena ka il i̱ hlakofa he ak o̱, hatak moma kʋt ai yimmi ka i̱shi keyu hoka.

³ Yohmi kia Chitokaka yʋt na mihʋt ai a̱hlichi, yʋmmak osh hʋchi hlampkochi cha, nan okpulo ya̱ hʋchi a filʋmmichit hʋch iesha hi oke.

⁴ Micha hʋchishno pulla hokʋno Chitokaka ya̱ isht il anukchieto kʋt, nana e hʋchim apesa tok a̱ hʋsh yʋmihchi kʋt, anonti hʋsh yʋmihincha chi̱ mak oke.

⁵ Mikma Chitokaka yʋt hʋchi chu̱kʋsh a̱ apissʋlechi na Chihowa ya̱ hʋsh i̱ hullo, Klaist atok a̱ chiyuhmit nuktaiyalʋt hʋsh achunanchashke.

⁶ Yohmi ka itibapishi li ʋhleha ma! pin Chitokaka Chisʋs Klaist a̱ hochihi̱fot isht e hʋchim apesa kʋt, itibapishi kʋna hosh ai ʋlhpesa keyu ho̱ a̱ya, micha anumpa ʋlhpisa pim ai ishi tok ak keyu hokʋno, hʋsh i̱ filʋmmashke.

⁷ Hʋchishno ak inli kia kaniohmit hʋsh pi ahobacha he ʋlhpesa kʋt hʋsh ithanʋshke: hʋchi takla il a̱shwa mʋt, ai ʋlhpesa keyu ka a pi yʋmohmi tok keyu:

⁸ Micha pilla hatak inla i̱ pʋska e pa tok keyu, amba ninak, micha nitak moma ka toksʋlit, hoyublit pi̱ palʋmmi tok, yʋmmʋt hʋsh kanima kia nana kʋt ik hʋchi̱ kʋnio ka chi̱ kak atok.

⁹ Yohmi kʋt e yʋmohma he ʋlhpesa keyu nana tok keyu: amba hʋsh piakaiya hi o̱ e hʋchim ile haiakʋchi hatuk oke.

¹⁰ Hʋchi takla il a̱shwa mʋt kʋna kia toksʋla he keyukmʋt impa he ʋlhpesa keyu, ilʋppak oka e hʋchim apesa tok.

¹¹ Kanimi kʋt hʋchi takla ai ʋlhpesa keyut a̱ya mʋt, toksʋla he keyu kʋmohmit, nan isht ahalaia keyu kia isht ʋttʋt fullokahanchi ka e haklo hoka.

¹² Yʋmma chohmi puta kʋt nuktanlʋt ahanlʋt, toksʋlit, ilap i̱ pʋska ʋpa he ak o̱ im apesʋt, pin Chitokaka Chisʋs Klaist puyulla mak o̱ il in tonohonchishke.

¹³ Yohmi kia itibapishi li ʋhleha ma! nana achukma ka hʋsh yʋmohmi kʋt ik hʋch in takobokashke.

¹⁴ Micha hatak nana hosh pim anumpa holisso ilʋppa ik im antiokma, yohmi hʋsh ahni cha, takla hʋch ik a̱yo ki̱ hofahyashke.

¹⁵ Yohmi kia hʋchin tʋnʋp o̱ ahnit hʋchik anukfillo hosh, amba itibapishi ha̱ chohmichit nana hʋsh i̱ mihashke.

¹⁶ Chitokaka it i̱ nanaiyʋchi ilap ak osh ik kaniohmi kia isht it i̱ nanaiya ya̱ hʋch ima na biliashke. Chitokaka yʋt hʋsh moma ka hʋch ibafoyukashke.

¹⁷ Pal sia hʋt sʋbbak fehna ho̱ isht hʋchi aiokpʋchi li ka, yʋmmʋt a̱ holisso puta ka isht ithʋna mak oke: yakohmi ho̱ holissochi lishke.

¹⁸ Chitokaka Chisʋs Klaist nan isht i̱ kana yʋt hʋsh moyuma ka hʋchi anukfoyukashke. Amen.