2 Hlessalonian 2 - Chahta Holisso Holitopa 1886

Nan ai a̱hli ya̱ a kʋllot iesha hi a̱ i̱ miha; nan ai a̱hli laua kʋt ai i̱ filʋmma he, mikma Klaist i̱ sanali ʋt Chitokaka yʋt ik lo ki̱sha ka, otaiyana hi a̱ anoli; 15 ʋba isht anumpohonli.

¹ Yohmi ka itibapishi li ʋhleha ma! pin Chitokaka Chisʋs Klaist ʋt ʋla he, micha il im itʋnaha he ak o̱ isht e hʋchim asilhhʋshke.

² Yohmi ka chekosi, shilombish tikbanli anoli yokmá, ʋbanumpa tosholi yokmá, pi̱ holisso hak okmá, nana hoh kia Klaist i̱ nitak ʋt auet olanlosi hʋchi̱ chohmit, hʋchim anukfila hʋt ik shanaiowot ik hʋchi komunto kashke.

³ Hatak nana kia kaniohmit ik hʋchi haksecho kashke: ʋbanumpa ha̱ i̱ filʋmmit ik a̱sho ki̱sha, micha nan okpʋni ushi, hatak nan ashʋchi yʋmmʋt ik haiako ki̱sha ka, nitak yʋmmʋt ʋla he keyu.

⁴ Yʋmmak okʋt Chihowa hohchifo, micha i̱ shahli ikbit aiokpʋchi puta ka i̱ sanalit ile chahʋchit, il i̱ shahlichi yoke: yohmi hosh yʋmmʋt Chihowa chohmit, Chihowa in tempel a̱ binilit, Chihowa ile mihʋt ile haiakʋchi hoke.

⁵ Hʋchi takla anta li moma mʋt, ilʋppa puta ka hʋchim anoli li tok a̱ hʋch ik ithaiyano ho̱?

⁶ Yohmi ka himak ano nitak ʋt im ʋlhpiesakmʋt otʋna hi a̱, nana hosh halʋlli ka, hʋsh ithaiyanʋshke.

⁷ Na luma chito ik ʋlhpeso yʋt tobʋt isht ia ma̱shko hoke: himak a̱ halʋlli kʋt halahanla chi̱; atuk o̱ yʋmmak ash o̱ ishit i̱ kanʋllichik mak a hi oke.

⁸ Mikma yohmikmak o̱ nan ashʋchi yʋmmak ash ot otʋna hi oke; yʋmmak oka Chitokaka yʋt itih ilhfiopak isht illicha he, micha shohpakali hosh ant haiakakmʋt, yʋmmak ash o̱ akshocha hi oke.

^9-10 Yʋmmak okʋt Setan nan akaniohmi yo̱ iakaiya kʋt, nan isht im ai a̱hli, nan isht atokowa puta, micha na holabi isht nukhlakancha, mikmʋt nan ik ʋlhpeso isht yoshubli aiena ho̱ il ai i̱shit illi na bilia he puta ai itin takla ya̱ a̱yʋt otaiyani yʋmmak a he oke; okcha̱ya hi atuk kia ʋbanumpa a̱hlika ya̱ holitoblit ik yimmo tok okʋt.

¹¹ Mikma yakohmi kak o̱ Chihowa yʋt nan isht a yoshuba kʋllo kʋt ik onʋtula im ahni na na‐holabi kia i̱ yimma he:

¹² Yʋmohmi pulla hosh anumpa a̱hli ik yimmo hosh, amba nan ik ʋlhpeso aiokpanchi tuk ʋt momʋt nan im ʋlhpisʋt na hotopa hi atok.

¹³ Yohmi kia itibapishi li Chitokaka i̱ holitopa hʋchia ma! hʋchishno pulla kak o̱ Chihowa ya̱ yak oke il im aiahnit bilia he ʋlhpesa hoke. Shilombish isht a kashofa, micha anumpa a̱hli yimmi pulla hosh hʋchi okcha̱ya he ai ʋmmona ka hʋchi atokoli tok oke:

¹⁴ Yʋmmak a hi o̱ pin Chitokaka Chisʋs Klaist isht a holitopa ya̱ hʋsh isha hi a̱, yʋmmak ash ot pim ʋbanumpa isht hʋchi hohoyo tok oke.

¹⁵ Yʋmohmi hoka itibapishi li ʋhleha ma! kʋllot hʋsh hielashke, micha anumpa ʋlhpisa puta ʋbanumpa toshowa hokmá, keyukmʋt pi̱ holisso hokmá, nana ho̱ hʋsh ai ithʋna tuk ʋt hʋsh ieshashke.

¹⁶ Mikma pin Chitokaka Chisʋs Klaist ilap inli, micha Pi̱ki Chihowa, yʋmmʋt pi̱ hullo, micha nan isht i̱ kana pulla hosh chu̱kʋsh isht a nuktaiyala bilia, micha nana isha he ahni achukma ya̱ pihi̱ma tok ʋt,

¹⁷ Hʋchi chu̱kʋsh a̱ hopohlʋli cha, anonti anumpa achukma puta, micha nan toksʋli achukma aiena ka isht a hʋchi hlampkohonchashke.