2 Hlessalonian 1 - Chahta Holisso Holitopa 1886

Hlessalonian okla hʋt ʋbanumpa anukfohka ai a̱hli ahnit, yimmit miha, 1; 7 nan i̱ pʋlammit ma̱ya ka ʋba afoha he isht hopohlahanli; mihmʋt nana kʋt isht ai ʋhlpiesa ho̱ nan ʋlhpisa pʋlammi kʋt i̱ nukkilli ʋhleha ha̱ onʋtuyula he isht miha.

¹ Pal, micha Silfanʋs, micha Timohliʋs pia hʋt Chʋch Hlessalonika a hikia Pi̱ki Chihowa, micha Chitokaka Chisʋs Klaist ibafoyuka ka pit il aiokpʋchi kʋt,

² Pi̱ki Chihowa, micha Chitokaka Chisʋs Klaist ita tuklo nan isht i̱ kana, micha isht it i̱ nanaiya ita tuklo kʋt hʋchi anukfoyukashke, e hʋch im ahnishke.

³ Hʋchi ai yimmi ka yʋt chitot isht i̱ shahli fehna, micha hʋsh moma kʋt hʋsh it i̱ hullo kʋt laua fehna hoka, itibapishi li ʋhleha ma! isht ai ʋlhpiesa ho̱ hʋchishno pulla kak o̱ Chihowa ya̱ yak oke il im ai ahni na bilia hi atuk oke:

⁴ Yʋmohmi kʋt pishno ʋt ai ilbʋsha, micha na palʋmmi puta aiena kʋt hʋchi onʋtuyula kʋt, hʋchi nuktaiyalʋt, na hʋchi yimmi kak o̱, Chihowa in chʋch puta ka a hʋchi anolit isht e hʋch ilauata hoke.

⁵ Yʋmmak okʋt Chihowa hʋt ai ʋlhpiesa apesʋt onochi ka isht otʋni, yohmi ho̱ Chihowa im apehlichi ka ya̱ hʋsh isha he ʋlhpiesa ka hʋchi ahna hi atok, yʋmmak a he mak o̱ hʋch ilbaiyʋsha hoka.

⁶ Chihowa hʋt hʋch ilbʋshali ya̱ i̱ falaminchit na palʋmmi ho̱ onocha hi ʋt ʋlhpesa;

⁷ Micha hʋchishno ʋt hʋch ilbʋsha kʋt, hʋsh pibafoha hi a̱ hʋchim ahna hi ʋt ʋlhpesa hoka, nitak yʋmma fehna Chitokaka Chisʋs ʋt enchil hlampko puta ka il ai eshit,

⁸ Ʋba mintit luak libbi biekʋt haiakʋt, Chihowa ik ithano, micha Chitokaka Chisʋs Klaist im ʋbanumpa ik im antio aiena ka isha he ʋlhpesa mak o̱ im apesʋt onochikma;

⁹ Yʋmmak okʋt Chitokaka, micha nan isht im ai a̱hli holitopa itikba ai i̱ filʋmmit na palʋmmi a bilia isht im ʋlhtobʋt ilbʋsha he;

¹⁰ Yʋmmak okʋt ʋla cha, ʋbanumpa yimmi puta ka isht a holitopa he, mikma i̱ yimmi puta kʋt okokko! ahnit aiokpahancha he nitak yʋmmak ok mak o̱ yakohma he, atokolit il anoli tok a̱ hʋchi yimmi tok oka.

¹¹ Yʋmohmi hoka anumpa ilbʋsha isht e hʋchim anumpohonli na bilia kʋt, pin Chihowa yʋt nan isht ilaiyukpa ilʋppak ash hʋsh isha hi a̱ ʋlhpesa hʋchi ahni cha, ilap nan isht i̱ kana aiokpancha he achukma moma, micha ai yimmi a toksʋli nan isht im ai a̱hli aiena ka isht hʋchim atahli hokbano il ai ahni hoke.

¹² Yʋmohmi ka pin Chitokaka Chisʋs Klaist hohchifo hʋt, hʋchi a holitopakma, pin Chihowa, micha Chitokaka Chisʋs Klaist nan isht i̱ kana pulla ho̱ yʋmmak ash hʋchi a holitopashke.