2 Chan 1 - Chahta Holisso Holitopa 1886

Nan isht ai i̱ hullo a kʋllot achunancha chi̱ ka ohoyo holitopa, im ʋlla aiena ka i̱ miha, 1; 10 Klaist im ʋbanumpa ha̱ isht a̱ya keyu yʋt na yoshublichi yoka yʋmma hʋchik ahalaio kashke.

¹ Ʋbanumpeshi sipokni yokʋt ohoyo ʋlhtoka, micha im ʋlla ʋhleha aiena ka pit ai okpʋchishke, yʋmmak ash o̱ ʋno ʋt ai a̱hli hosh i̱ hullo li chatuk; mikmʋt ʋno ak bano chatuk keyu; amba nan ai a̱hli ka akostininchi tuk okʋto i̱ hullo ak inli chatuk;

² Nan ai a̱hli ka yʋt a pi nukfoyuka kʋt a pi nukfoyukʋt bilia chi̱ pulla ho̱ yʋmohmi hoke.

³ Hʋch i̱ hullo li ai a̱hli mak osh I̱ki Chihowa, mikmʋt I̱ki a̱ Ushi, Chitokaka Chisʋs Klaist ita tuklo a mihinti nan isht i̱ kana, mikmʋt ai i̱ nukha̱kloka, micha nan isht it i̱ nanaiya aiena kʋt hʋchi anukfoyuka hi a̱ ahni lishke.

⁴ Anumpa ʋlhpisa Pi̱ki ʋt pima tok mak o̱, chim ʋlla ʋhleha hʋt nan ai a̱hli ka mak o̱ ai itʋnowa na pisa li kʋt, sa yukpa fehna tuk oke.

⁵ Yʋmohmi ka ohoyo ma! anumpa ʋlhpisa himona nana ho̱ pit chi̱ holissochi li ho̱ keyu: amba ʋmmona mak inli ho̱ hʋpin tonla tok ash iloh it i̱ hulla he yak o̱ chim ai ahni lishke.

⁶ Micha im anumpa ʋlhpisa yak o̱ ai iakaiyʋt il itʋnowa ilʋppak osh nan i̱ hullo mak oke. Ilʋppak osh anumpa ʋlhpisa mak oke; ʋmmona mak inli ho̱ hʋsh haha̱klo tok ʋt, yʋmmak o̱ hʋsh ai itʋnowa he tuk oke.

⁷ Na yoshubli laua kʋt yakni a̱ atiapa cha, Chisʋs Klaist ʋt haknip a̱sha hosh ʋla tok a̱ atokowa anoli keyushke. Ilʋppak osh na yoshubli, micha Klaist i̱ sanali aiena mak oke.

⁸ Hʋsh il apesahanchi pulla na nana ka iloh atahli tuk ʋt ik hʋp i̱ kʋnio hosh, amba ai ʋlhtoba ʋlhpiesa ka iloh ishashke.

⁹ Kʋna hosh ashahanchi cha, Klaist im anumpa anukfoyukʋt a̱ya keyu hokʋto, Chihowa ya̱ pit ai ibai achʋfa ho̱ keyu hoke. Kʋna hosh Klaist im anumpa ha̱ afoyukʋt a̱ya hokʋto, mihi yosh I̱ki, micha Ushi aiena ka pit ai ibai achʋfa hoke.

¹⁰ Kanima kʋt a̱yʋt hʋchim ʋla kʋt, anumpa ilʋppak o̱ isht a̱ya keyukma, hoyot hʋchim aboha ya̱ hʋch ik chukowachokmʋt, hʋch ik ai okpacho kashke.

¹¹ Kʋna hosh yʋmma ai okpʋchi hokʋto, nan ik ʋlhpeso a yohmi ya̱ pit ahalaia mak oke.

¹² Nana ka pit chi̱ holissochi la hi ʋt lauʋt a̱sha; yohmi kʋt holisso tohbi, micha isht holissochi okchi aiena ho̱ isht a pit holissochi la he keyushke; amba nashuka bi̱ka it atokowʋt anumpulit a pi yukpa fehna chi̱ ka, ʋno ʋt a̱yʋt chim ona la chi̱, ʋm ahoba hoke.

¹³ Chitibapishi ohoyo ʋlhtoka ya̱ im ʋlla ʋhleha hʋt pit chi ai okpʋchishke. Amen.