1 Timohli 6 - Chahta Holisso Holitopa 1886

Yuka hʋt nana ka isht ahanta he ʋlhpesa ka anoli, 1: 3 ilap ʋt nan isht ithʋnachi tuk a̱ keyu ho̱ kʋna hosh isht ithʋnachi hokʋno i̱ filʋmma he. 6 Chihowa anukfoyuka hokʋto nan il ahayuchi, 10 tʋli holisso i̱ hullo kʋt nan ik ʋlhpeso yo̱ hakshish; 11 nana ho̱ Timohli ʋt i̱ filʋmmi cha, anonti nana ho̱ im antia he: 17 nan inlaʋa ya̱ nana ho̱ im acha hi a̱ im achi.

¹ Yuka puta ikunla abana nuta ahanta kʋt, ilap i̱ na hullo isht a holitopa he ʋlhpiesa ka isht holitobli na Chihowa hohchifo, micha im ʋbanumpa aiena kʋt isht ik kʋllaksho kashke.

² Mikma i̱ na hullo ʋbanumpuli yosh a̱sha hokʋt itibapishi hokʋt, isht ik i̱ ahno ka he ʋlhpesa keyushke; amba i̱ na‐hullo yʋt na‐yimmi, micha Chihowa i̱ holitopa, micha nana isht ai yukpa ʋba minti ka it ibai ishi yoka, aiokpanchit nana ka isht im ahantashke. Ilʋppa puta kak o̱ im abʋchit ish atonohonchashke.

³ Yohmi ka hatak kanima hosh nana inla ho̱ abʋchi, micha isht ai achukma anumpa Chitokaka Chisʋs Klaist im anumpa, micha Chihowa holitobli nan isht ʋlbahanchi aiena ka ʋlhpesa ik ahnot,

⁴ Ilefehnʋchi isht alotʋt, nan ithana keyu, amba tasimbot nan isht a ponaklo ak bano isht anumpohonli, micha anumpa isht itachowa aiena yʋmmak o̱ a minti hosh nan it i̱ potʋnno, it i̱ nukowa anumpa, kanimanchit isht anumpuli, anukfila okpulo,

⁵ Micha hatak im anukfila ik achukmo, micha ʋbanumpa a̱hli kʋt ik im iksho cha, nana ahayuchi kak osh Chihowa holitobli im ahoba hosh, it i̱ kʋllot anumpuli aiena hoke; yʋmma chohmi ka ish il i̱ filʋmmichashke.

⁶ A nuktanla hosh Chihowa holitobli kʋt nana a fehna ahayuchi hoke.

⁷ Yohmi ka yakni ilʋppa nana il i̱shi hosh e la tok keyu; yohmi kʋt nana i̱shit il ia he keyu kʋt ai a̱hlishke.

⁸ Yohmi kʋt nan ilhpak, micha ilefoka aiena il i̱shi kʋt, yʋmmak oka isht pim ai ʋlhpiesashke.

⁹ Amba nan in laua he ak bano bʋnna fehna hokʋto, nan isht hokli, nan isht anukpʋli, micha anukfila ik hopoyukso, micha anukfila okpulo isht ile okpʋni aiena ka chukowa, yʋmmak ash ai okpuloka chinto ka hatak a̱ okai ahambi hoke.

¹⁰ Yohmi ka tʋli holisso i̱ hullo kak osh nan ik achukmo moma ka hakshish isht a toba hoke; yʋmmak o̱ kaniohmi kʋt anuksitiʋt hoho̱yo kak osh, ʋbanumpa ha̱ i̱ filʋmmi cha, nan isht a nukha̱klo laua ka isht ile nʋhlit ile hlopullihinchi tok oke.

¹¹ Amba chishno Chihowa immi chia ma! ilʋppa puta kano ish i̱ filʋmmashke: micha ai ʋlhpiesa yʋmohmi, Chihowa holitobli, na yimmi, i̱ hullo, nuktanlʋt achunanchi, anukfila yohbi aiena hak o̱ ish hoho̱yashke.

¹² Na‐yimmi isht itibi achukma yʋmmak o̱ isht ish itihimbashke; ai‐okcha̱yʋt bilia ak o̱ kʋllo hosh ish ieshash ke, yʋmmak o̱ chishno ak kia isht chi ʋlhtoka tok, micha nan atokowa anoli la̱wa ka itikba yo̱ ʋbanumpa yimmi isht anoli achukma ka ish il apesa tuk mak oke.

¹³ Chihowa yʋmmak osh nana moma ka ik okcha̱yá, im ahni na okcha̱ya, micha Chisʋs Klaist, yʋmmak okʋt Pontiʋs Pailat itikba hikia mʋt, ai atokowa a̱hli achukma ka il anoli tok ita tuklo itikba ya̱ hikia li hosh nana chim apihi̱sa li kʋt;

¹⁴ Chishno yʋt na‐liteha iksho, anumpa ik achukmo chi onʋtula he kia iiksho hosh, nan ʋlhpisa ilʋppa holitoblit ish ahanta na pin Chitokaka Chisʋs Klaist okʋt haiakashke:

¹⁵ Ai yʋmohma he apesa tok nitak yʋmma ilap ak bano hosh ithana hosh yʋmmak oka haiakʋcha he; yohmi kʋt ilap ak osh nayukpa Mi̱ko ak bano, mi̱ko moma ka i̱ Mi̱ko, micha chitokaka moma ka in Chitokaka yoke.

¹⁶ Yʋmmak okʋt ai illa hi ʋt ik im iiksho, micha tohwikeli yʋmmak oka hatak nana hosh ai ona he keyu ho̱ anu̱kaka ai ahanta hoke; yohmi ka yʋmmak oka hatak nana hosh pisa chatuk keyu, micha pisa hi o̱ keyu; yʋmmak okʋt isht a holitopa, micha nana moma isht imaiya bilia ita tuklo kʋt immi hashke. Amen.

¹⁷ Himonasi im ila̱yak laua aiasha ka nana ish im apihi̱sa kʋt, im anukfila chahʋt ik ai asho ka he, micha im ila̱yak aí a̱hli keyu ka ik anukchieto hosh, amba Chihowa okcha̱ya, yʋmmak osh nana isht pim ai achukma he moma ka lauachit pihi̱ma kak ashke:

¹⁸ Yohmi kʋt nana achukmʋli kʋt nan isht ʋtta achukma ka isht ahanta fehna kʋt, hopela hi ʋt im ʋlhta̱ha, habenʋcha he ʋt ahni kʋt;

¹⁹ Nitak himak a pilla mihinta he ak pulla tuk mak o̱ im ila̱yak achukma ilap immi mak osh intolahpi bohonli na ai okcha̱yʋt bilia ya̱ isha he mak o̱, ish i̱ mihi̱hashke.

²⁰ Timohli ma! nana chim ʋlhpihi̱sa tok ʋt ish holitobli kʋt, ʋbanumpa isht ik ahalaio isht anumpa, isht ik ahobo anumpa, micha nan ithana a̱hli keyu it i̱ chilitʋt isht it im anumpuli aiena ka chik ahalaio kashke.

²¹ Yohmi ka kaniohmi kʋt yʋmmak o̱ iakaiya miha hosh, ʋbanumpa ha̱ i̱ shanaiyʋt ashʋchi tok oke. Isht i̱ kana yʋt chi anukfoyukashke. Amen.