1 Timohli 5 - Chahta Holisso Holitopa 1886

Hatak ilaiyuka ka kanimihchit nan i̱ miha he anoli, 1: 5 ohoyo i̱ hatak illi ya̱ nan isht i̱ miha: 17 iksa nan isht im ʋtta, 23 Timohli abekoma chohmi aiena ka nan isht miha, 24 kanimi ka nan im ashʋchika yʋt tikba iʋt nan ʋlhpisa ka ona, mikma kanimi nan im ashʋchika yʋt himmak o̱ iakaiʋt nan ʋlhpisa ka ona.

¹ Hatak asʋnochi ka anumpa kʋllo isht chik im alʋmmicho hosh, amba i̱ki chohmichit i̱ kanʋt nana ish i̱ mihashke; micha hatak himita ʋhleha hokʋno itibapishi chohmichit i̱ kanʋt nana ish i̱ mihakmʋt,

² Ohoyo sipokni ʋhleha hokʋno ishki chohmichit i̱ kanʋt nana ish i̱ mihakmʋt, anonti ohoyo himita ʋhleha hokʋno haui imma anukfilli iksho hosh, in tek chohmichit i̱ kanʋt nana ish i̱ mihashke.

³ Ohoyo i̱ hatak illi ʋhleha hʋt i̱ hatak illi a̱hli pulla ka ish holitoblashke.

⁴ Amba ohoyo i̱ hatak illi kaniohmi kʋt im ʋlla, keyukmʋt ipok ʋhleha hʋt a̱shakmʋt, ʋmmona nan ithʋna kʋt, in chuka ma̱yʋt nana achukma ka yʋmohmashke; micha ipokni, ishki chohmi ka falaminchit im atobbashke: ilʋppʋt achukmʋshke, yohmi kʋt Chihowa itikba ya̱ ai ʋlhpiesa hoke.

⁵ Yohmi ka ohoyo i̱ hatak illi a̱hli pulla, micha ʋlhtakla hokʋto, Chihowa ak o̱ anukchieto kʋt, nitak, ninak ita tuklo ka anumpa ilbʋsha anumpohonlit a bilia hoke.

⁶ Amba ohoyo i̱ hatak illi yʋt haknip nan isht ai yukpa isht ai yukpʋt ahanta hokʋto, okcha̱ya ta̱kla kʋt illi yoke.

⁷ Yohmi ka ilʋppa puta ka ish im apihi̱sa na anumpa ik achukmo kʋt ik onʋtulo kashke.

⁸ Amba kanimi kʋt ilap immi, micha ilap in chuka chʋfa a fehna aiena ka ik im atahlo hokmʋt, ʋbanumpa ha̱ ik holitoblo kʋt, nan ik yimmo ak kia ik achukmo kʋt i̱ shahli hoke.

⁹ Ohoyo i̱ hatak illi yʋt afʋmmi pokoli hannali ka ik ono hokʋto, ik iba holisso kashke,

¹⁰ Yʋmmʋt hatak achʋfa tekchi atok, nan isht ʋtta achukma ka isht annoa achukma, ʋlla achukmalit hofantihinchi, hatak ik ithano nowʋt a̱ya ka nan im atahanli, ʋbanumpuli holitopa iyi kia im achihi̱fa, ilbʋsha ya̱ apelahanchi, nan isht ʋtta achukma puta ka achunanchi biekʋt isht ahanta cha tuk mak osh iba holissashke.

¹¹ Amba ohoyo i̱ hatak illi himita ʋhleha hokʋno ish im olʋbichashke; yʋmmak okʋto Klaist im antia ik bʋnnot, yakni paknaka nan isht ai yukpa ahnit isht iakmʋt, hatak auwaya bʋnna hinla hoke:

¹² Yʋmmak okʋt na yimmi ʋmmona tuk ʋt issa hokʋt, isht ilbʋsha anumpa hʋt onʋtuyula hoke.

¹³ Mikmʋt anonti nan isht ʋtta intakobi kʋt, chuka abaiyʋchi banot itʋnoho̱wa; micha nan isht ʋtta intakobi kak bano keyu, amba anumpa chukushpali aiena, micha inla nana im a kaniohmi kak bieka isht ahantʋt, nana isht anumpula he ʋlhpesa keyu kia isht anumpuli hoke.

¹⁴ Yohmi hoka ohoyo i̱ hatak illi himita ʋhleha hʋt hatak auwayakmʋt, ʋlla ishki tobʋt, chuka apesʋchit anta kʋt, nana ik achukmo nana kia yʋmohmi na ʋbanumpa i̱ sanali ʋhleha hʋt hofahyalit isht ik anumpulo ka he, im ai ahni lishke.

¹⁵ Himak a̱ kaniohmi hokʋto naksika filʋmmit Setan a̱ iakaiyʋt ia ma̱shko hoke.

¹⁶ Yohmi ka hatak, keyukmʋt ohoyo na yimmi kanimampo kʋt ohoyo i̱ hatak illi yʋt i̱ kanomi hʋt a̱sha hokmʋt, yʋmma apelahanchi na chʋch ak okʋto nan isht ik i̱ kʋnio kashke; amba ohoyo i̱ hatak illi a̱hli pulla hokʋno apelʋchashke.

¹⁷ Iksa pehlichi ʋhleha hʋt achukmalit iksa pehlichi kak osh holitopa kʋt i̱ shahlikma, anonti ʋbanumpa ithʋnanchit isht anumpuli hokak heto i̱ shahli fehnʋt holitopashke.

¹⁸ Yohmi ka Holisso Holitopa yʋt achi kʋt, Wak toksʋli ʋt onush nihechi ka itih ha̱ chik takcho kashke: micha, Na toksʋli ʋt im ʋlhtoba he ak osh ai ʋlhpiesa hoke, achishke.

¹⁹ Ʋbanumpa isht ʋtta yʋt nan ik achukmo kia yʋmohmi tok annoa ka ik chi yimmo kashke; amba nan atokowa anoli tuklo, tuchina kanima hosh anoli hok mak ashke.

²⁰ Amba ashʋchi hatuk o mʋhli hokmʋno, momʋt pi̱sa ho̱, ish im alʋmmichashke, yohmi na inla a̱sha kʋt nukshopa mak inlashke.

²¹ Nana chim apihi̱sa li kʋt, Chihowa, micha Chitokaka Chisʋs Klaist, micha enchil ʋlhtoka ʋhleha aiena ka itikba hikia li hosh, ilʋppa ish holitobli kʋt it i̱ shahsholechit, hatak achʋfona ho̱ i̱ kana i̱ shahlichit nana isht chik im ahanto ka he ahni lishke.

²² Hatak kʋna kia himak fokalechit ibbak onochit, inla nan ai ashʋchi ka chik iba ta̱klo kashke: yʋmohmi kʋt a kashofa hosh ish ahantashke.

²³ Himmakma oka kapʋssa chik ishko hosh, amba chikfoka ak atuk pulla mak o̱, micha chi abeka shahli aiena hokʋt oka‐pa̱ki kanomosi ka ish ishkashke.

²⁴ Hatak kaniohmi nan ai ashʋchi yʋt tikbanli otʋnit, nan ai ʋlhpisa itikba ya̱ oho̱na hoke; mikma hatak kaniohmi hokʋno iakaiya hoke.

²⁵ Anonti hatak kaniohmi nana achukma a yʋmohmi kʋt tikbanli otʋni akinlishke; mikma ik yohmo ke tuk ʋt luma he keyu hoke.