1 Timohli 4 - Chahta Holisso Holitopa 1886

Nan ai yimmika ya̱ i̱ filʋmmit akakoha hi a̱ tikbanli anoli, 1; 6 nana ka a yʋmohma he ʋlhpiesa ka mominchit yʋmihcha hi a̱ anumpa ʋlhpisa il aiyukali isht i̱ miha.

¹ Shilombish Holitopa yʋt otʋninchi fehna hosh anoli kʋt, himak a pilla ka kaniohmi kʋt ʋbanumpa yimmi tuk ʋt issa cha, shilombish na yoshubli im antiʋt, nan isht ahullo okpulo ʋhleha imma isht ʋlbʋchi ka yimmit,

² Nan ilahobi holabi hosh anumpohonli kʋt, isht il akostininchi mʋt tʋli lʋshpa isht luʋt yikotʋt kʋnia hatuk osh;

³ Nan‐itauwaya im olʋbichi, micha ilhpak kaniohmi ka ik po ka he aiena ka im apihi̱sa he; ilhpak yʋmmak oka anumpa a̱hli ithana, micha i̱ yimmi aiena hokʋto yak oke ai ahnit, habena he mak o̱, Chihowa hʋt ikbi tok oke.

⁴ Yohmi ka Chihowa hʋt nana moma ikbi tok a̱ achukma bano, yak oke ai ahnit habena hokʋto, ik ahnincho ka hi a̱ nana kʋt ikshoshke.

⁵ Yohmi ka Chihowa im anumpa, micha anumpa ilbʋsha ita tuklo atuk mak o̱ yʋmmak ash ot isht a pim ʋlhpiesa hoke.

⁶ Ilʋppak o̱ itibapishi ʋhleha hʋt ithaiyana he mak o̱ ish nukfoyuki hok mʋt, Chisʋs Klaist im anumpa isht ʋtta achukma chia mak a he, na yimmi, micha nan ʋlbʋchi achukma ita tuklo isht anumpa ka isht chim ʋlbʋchit a chi anukfoyuka hoke.

⁷ Anumpa kʋllakshi shukanumpa, ohoyo sipokni nan anoli chohmi ka chik ahnincho hosh, amba Chihowa holitoblit isht ahantashke.

⁸ Haknip nan isht ʋtta isht ai achukma hokʋto mishema he keyu hoke: amba Chihowa holitobli nana moma ka isht im ai achukma kʋt, yakni paknaka nan ai isht ai yukpa, micha yakni inla ʋla he mihinti ita tuklo ka isht ai yukpa he im issa hoke.

⁹ Anumpa ilʋppʋt ai a̱hli fehna ka, ʋlhpesa ahnit, ai okpancha he ʋlhpiesa hoke.

¹⁰ Yohmi ka ilʋppak osh yohma chi̱ ho̱, e toksʋlit pi hoyʋblit, isht a hofahya anumpa aiena kʋt pi onʋtohonla kʋt, Chihowa okcha̱ya ak o̱ il anukchieto ka; yʋmmak osh hatak moma okchalinchi, yʋmma i̱ yimmi hok mak heno a̱hli fehna hosh okchalinchi yoke.

¹¹ Ilʋppa puta ka im apesʋt ish im abahanchashke.

¹² Chi himita kak o̱ isht ik chi̱ yukpo kʋt kʋna kia ik anto kashke; amba nan ish a kaniohmi, ish anumpuli moma, ish i̱ hullo, chu̱kʋsh nan isht ish ai ahni, na chi yimmi, haui imma anukfila iksho, ilʋppa puta ka ish yʋmohmi pulla na na‐yimmi ʋhleha hʋt chim ai ithʋnʋt chiakaiyashke.

¹³ Holisso it im annmpulit nan atohnochit, ʋbanumpa im abʋchit isht ish ahanta na ona lashke.

¹⁴ Na hʋlbina chimmi ha he nitak hopaki pilla kash annoho̱wa tok o̱, ʋbanumpa isht ʋtta ʋhleha hʋt ibbak chi onochi na chim ai a̱hli tok ʋt, chi anukfoyuka kʋt isht chik ahanto ki ná.

¹⁵ Ilʋppa ish anukfihinli cha, chim anukfila ha̱ a mominchit isht ish ahantʋt, nana ka i̱ shahlit ish ma̱ha̱ya ka nana moma ka ai otʋnashke.

¹⁶ Ahah! ish il ahnashke, micha nana ish abahanchi kʋt ahah! ish ahnashke: yohmi kʋt yʋmma achunanchit isht ish ma̱ha̱yashke: ilʋppak o̱ ish yʋmohmi hokmak osh, ish ile okchalinchikmʋt, anonti inlʋt chi haklo aiena ka ish okchalincha hinla hoke.