1 Timohli 3 - Chahta Holisso Holitopa 1886

Bishop, micha iksa nan isht im ʋtta, micha im ohoyo aiena kʋt nana hosh im ʋhltaiyaha he, 1; 15 Chihowa in chʋch, micha nan ai a̱hli ʋt ai ʋlbʋchi ka isht im anumpuli.

¹ Anumpa ilʋppʋt ai a̱hlishke, yohmi kʋt hatak kʋna hosh bishop nan ai isht ʋtta ishi bʋnnakmʋt, nan ai isht ʋtta achukma ho̱ ishi bʋnna hoke.

² Yohmi ka bishop ʋt anumpa ik achukmo nana kia onʋtula he keyu, tekchi achʋfa i̱ hatak, nana ka ahah! ahni, ile oktampli, nana a kaniohmi mʋt achukma, hatak ik ithano moma ka i̱ kana, nana im abʋchi kʋt imponna,

³ Oka homi ishko shahli keyu, na fahama keyu, ai ʋlhpiesa keyu isht a hofahya he nan isht ahayuchi bʋnna keyu; amba nuktanlʋt, ik itachowo, tʋli holisso i̱ hullo keyu;

⁴ Yohmi kʋt ilap in chuka chʋfa ya̱ pehlichi kʋt imponna, im ʋlla ʋhleha hʋt im antia achukma chi̱ ka yopunla keyu hosh im anukfila nuktanla achukma hosh nana im apihi̱sashke:

⁵ Yohmi ka hatak in chuka chʋfa pehlichi ik ithano kʋt, katiohmit Chihowa in chʋch a̱ apesʋchi imponna hinla ho̱?

⁶ Himona ʋbanumpuli toba keyu hashke; yohmi hatuk mʋt ilefehnʋchi isht a wakayʋt hikia hokmʋt, nan isht ahullo okpulo nan isht ilbʋsha im ʋlhpisa tok a̱ chiyuhmit im ʋlhpisa hinla hoke.

⁷ Anonti ʋbanumpuli keyu aiasha im annoa achukma kʋt ieshashke; keyukmʋt isht a hofahya, micha nan isht ahullo okpulo nan isht haksichi aiena ka pit itula hinla hoke.

⁸ Anonti chʋch nan isht im ʋtta yʋt yopunla iksho hosh im anukfila nuktanla achukmashke, im anumpa tuklo keyu, oka homi ishko shahli keyu, ai ʋlhpiesa keyu isht a hofahya he nan isht ahayuchi bʋnna kʋyu;

⁹ Nan ai yimma hi ʋt ʋbanumpa a luma hatok a̱ im anukfila kashofa achukma hosh isht ieshashke.

¹⁰ Yʋmmak ash o̱ ti̱kba imomaka pisashke; yohmi kʋt anumpa ik achukmo onʋtuyula iksho hok mak osh, chʋch nan isht im ai ʋtta ya̱ isht ʋttashke.

¹¹ Tekchi ak kia yopunla keyu hosh im anukfila nuktanla, hotopali bʋnnʋt na‐mihachi keyu, nana ka ahah! ahni, nana moma ka ai a̱hli banashke.

¹² Chʋch nan isht im ʋtta yʋt tekchi achʋfa i̱ hatak osh, im ʋlla ʋhleha, micha ilap in chuka chʋfa ya̱ ai ʋlhpiesa hosh pehlichashke.

¹³ Yohmi ka chʋch nan isht im ʋtta nan‐ai isht‐ʋtta isht ʋtta ai a̱hli yʋmmak osh ilap isht hohchifo achukma ka ishi hoke; yohmi cha Klaist Chisʋs isht ai yimmi kʋt nukwa̱ya iksho hosh anukfoyukʋt ahantʋshke.

^14-15 Chekosikma chim ona la chi̱, ahni li; yohmi kia anta li̱ hopaki hokma, Chihowa im aboha anu̱kaka, yʋmmʋt Chihowa okcha̱ya in chʋch okʋt, ʋbanumpa a̱hli ka in toni̱k, micha in tolahpi yoka, ish a kaniohma he puta kʋt ish ithaiyana he mak o̱, ilʋppa puta ka pit chi̱ holissochi lishke.

¹⁶ Mikma moyuma kʋt ilʋppa ai a̱hli ai ahnishke; ʋbanumpa nan otʋninchi kʋt na chinto fehna; yohmi kʋt Chihowa hʋt haknip o̱ isht otʋnit, Shilombish Holitopa ka isht ai a̱hlit, enchil ʋhleha ha̱ im a haiakʋt, Chentail ʋhleha ha̱ isht im anuhumpa tok, mihma yakni paknaka ya̱ ai i̱ yihimmi tok o̱, ʋba a holitopa ka ik chukowá im ai ahni na pit chukowa tok.