1 Timohli 2 - Chahta Holisso Holitopa 1886

Hatak moma ka ʋba isht anumpohonla he, mihmʋt nana kʋt kaniohmi kak o̱ yakohma hi a̱ anoli, 1; 9 kaniohmit ohoyo hʋt shema he: 12 ohoyo hʋt ʋba anumpa isht anumpula he keyu, yohmi kia na yimmi a̱hli hokmʋt, okcha̱ya he.

^1-2 Yohmi hoka nana ish a yʋmohma he ʋmmona kʋt, Chihowa hʋt hatak puta ka i̱ nukha̱klo ka yak oke pit im ai ahnit, anumpa ilbʋsha ish anumpuli kʋt, Chihowa hʋt hatak puta i̱ kanʋt, mi̱ko ʋhleha, micha nan ʋlhtoka ʋhleha aiena ka hopoyuksiacha he ak o̱ ish im asihi̱hla he chi atohno lishke; yohmi kʋt Chihowa ya̱ e holitobli, micha hatak nana il ai it i̱ kaniohmi puta kʋt a̱hli achukma hosh il ahanta hok mak osh pi okcha̱ya ta̱kla kʋt, it i̱ hullot it i̱ kanʋt il aha̱shwa hinla hoke.

³ Ilʋppak okʋt achukma hoke; yohmi ka pi Okchalinchi Chihowa hʋt pisa kʋt ahninchi hoke:

⁴ Yʋmmak okʋt hatak puta kʋt ʋbanumpa a̱hli yoka nukfoyuka cha, okcha̱ya he ak o̱ im aiahni hoke:

⁵ Yohmi ka Chihowa hʋt achʋfa, micha hatak, Chihowa ita tuklo it i̱ nanaiyʋchi yʋt achʋfa, hatak Klaist Chisʋs ak oke.

⁶ Yʋmmak okʋt moma ka ʋlhtoba mak osh ilap inlit il im issa kʋt, anumpa a̱hli ilʋppʋt ont ai ʋlhpiesakma anoho̱wa hi a tok oke.

⁷ Yʋmmak atuk mak o̱ apostel, micha ʋbanumpa isht ʋtta ita tuklo ka si ʋlhtoka tok oke; yohmi kʋt anumpa a̱hli, micha na yimmi imma aiena ka Chentail okla im abʋchi sia hosh, holabi keyu hosh Klaist isht anumpa a̱hli mak o̱ anumpuli lishke.

⁸ Yohmi ka anuktuklo, micha anukhobela aiena iksho hosh, ibbak mʋt kashofa achukma bieka hosh ʋba pit welit, kanima moma ka hatak puta kʋt anumpa ilbʋsha ai anum pohonla hi a̱ im ai ahni lishke.

⁹ Anonti yʋmmak ash inli ho̱ chiyuhmit, ohoyo puta kʋt ilefoka ai ʋlli chito, pʋl, tʋli holisso lakna aiena ka isht ik shemo ka he, micha pa̱shi aiena ka yikyuachit ik shemacho ka he; amba im anukfila puta kʋt ile oktamplit, hatak ma ik ai okchifelo hosh nuktanlʋt, ilap isht a shema he ai ʋlhpiesa ka isht shema he im ai ahni lishke.

¹⁰ Amba ohoyo puta kʋt Chihowa holitobli kʋt, si anukfoyuka ahnit il anoli kʋt, ai yʋmohma he ʋlhpesa, nan isht ʋtta achukma kak o̱ yʋmohmashke.

¹¹ Ohoyo hʋt ai a̱hlit im antiʋt, lumʋt ma̱ya hosh nana ka ithʋnashke.

¹² Yohmi ka hatak a̱ ohoyo hʋt i̱ shahlit, nana ka im abʋchit ahanta he ak im ahnoshke; amba lumʋt ai asha he im ai ahni lishke.

¹³ Yohmi ka Alʋm ak osh If a̱ ti̱kba toba hatok oka.

¹⁴ Mihma Setan ʋt Alʋm a̱ haksichi tok keyu, amba ohoyo hak o̱ haksichi na ai ashʋchika ya̱ yʋmohmi tok.

¹⁵ Yohmi kia ʋlla ishi kʋt okcha̱ya he, yohmi kʋt na yimmi kʋt ik isso hosh, i̱ hullo, micha chu̱kʋsh kashofa ho̱ isht holitoblit, ile oktampli hok mak osh okcha̱ya hi oke.