1 Timohli 1 - Chahta Holisso Holitopa 1886

Timohli a̱ pit aiokpʋchi, mihmʋt nana ka isht atokoli tok ʋt isht i̱ mihi̱ha, 1; 5 nana ho̱ isht ai ʋlhpiesa hosh nan ʋlhpiesa yatuk a̱ anoli; 11 ilap ʋbanumpa nukfoka tok ʋt anoli.

¹ Pi Okchalinchi Chihowa, micha ai okcha̱ya bilia e pihi̱sa he ahnit il anukchieto, Chitokaka Chisʋs Klaist ita tuklo ka im anumpa pulla ho̱, Chisʋs Klaist im apostel Pal ʋt;

² Nan ai yimmi pulla ho̱ sʋso fehna Timohli ya̱ pit aiokpʋchi hoke; Isht i̱ kana, isht i̱ nukha̱klo, micha isht it i̱ nanaiya aiena kʋt Pi̱ki Chihowa, micha pin Chitokaka Chisʋs Klaist ita tuklo ka a mihinti kʋt chi anukfoyukashke.

³ Masetonia ya̱ ia li mʋt, Efesʋs a̱ ish anta cha, kʋna kia nana inla isht ik abacho ka chi̱ ka,

⁴ Mikmʋt anumpa ik ahobo, micha in tikba ai unchululit isht auehinchi isht annoa ataha iksho, yʋmmak okʋt Chihowa holitobli nan isht ai yimmi i̱ shahlichit nukfohkicha he keyu hosh, iti posilhhʋchit ai asha hi a̱ anukfohkichi yʋmmak oka isht ik ahanto ka chi̱ ka, ish im apihi̱sa he chim ai ahni li tok a̱, ish yʋmihchashke.

⁵ Ʋba nan ʋlhpisa yokʋto chu̱kʋsh kashofa, micha im anukfila achukma, micha na‐yimmi ai a̱hli aiena hosh it i̱ hulla he ak o̱, hoyo hoke:

⁶ Kanimi kʋt ilʋppa puta kak o̱ i̱ filʋmmit, naksika ia cha, anumpa nan ik ahobo anumpuli hoh mak osh;

⁷ Ilap okʋt nana ho̱ okla miha, micha nana ho̱ kʋllochit miha aiena kʋt akostininchi keyu kia, ʋba nan ʋlhpisa ithʋ nanchi o̱ toba bʋnna chatuk oke.

⁸ Yohmi ka hatak okʋt ai ʋlhpiesʋchi hosh isht ʋtta hokma, ʋba nan ʋlhpisa yʋt achukma hoka il ithanʋshke.

⁹ Ʋba nan ʋlhpisa yʋt hatak ʋlhpesa yak o̱ in toba tok keyu, amba ʋba nan ʋlhpisa ik ahninchot ik im antio, Chihowa ik holitoblo, nan ashʋchi, Chihowa ik im antio, ʋbanumpa ik ahobalo, i̱ki puta ʋbi ʋhleha, ishki puta ʋbi ʋhleha, hatak bi̱ka ʋbi ʋhleha.

^10-11 Haui puta, kʋna hosh ilap inli kʋt nakni bi̱ka isht ile litehli ʋhleha, hatak bi̱ka hu̱kopa ʋhleha, holabi ʋhleha, anumpa kʋllo il onochit ik a̱hlo ʋhleha, mikmʋt ilap inli isht ilaiyukpa Chihowa im anumpa holitopa, isht ʋm atokowa tok, nan ai a̱hli yʋmma i̱ sanali kia yʋmohmi ʋhleha aiena kak atok, ilʋppa il ithaiyanʋshke.

^12-13 Yohmi ka tikba ma ʋbanumpa ik ahobalo, micha na yimmi ʋhleha i̱ palʋmmihinchi, micha chu̱kʋsh hotopahanli sia yatuk kia, ai a̱hli la he ʋm ahnit, pin Chitokaka Chisʋs Klaist mihi yosh sa hlampkohonchi cha, ʋbanumpa isht im ʋtta yo̱ sa hilechi tok; yohmi ka nan ik yimmot nan ak ithano hatuk osh, nana ka yʋmihchi li tuk osh nan isht i̱ nukha̱klo a̱ ahayuchi li tuk ʋt, yak oke im ahni lishke.

¹⁴ Yohmi ka pin Chitokaka nan isht i̱ kana yʋt la̱wa fehna hatuk o̱, Klaist Chisʋs ai ibafoyuka hosh na sai yimmi cha, nan isht i̱ hullo li tok oke.

¹⁵ Nan ashʋchi ʋhleha yʋmma ʋno ak osh moma i̱ shahli li yatuk a̱, okchalincha chi̱ hosh Klaist Chisʋs ʋt yakni pakna ʋla tok, anumpa ilʋppʋt ai a̱hli fehna ka ʋlhpesa ahnit, aiokpancha he ʋlhpiesa hoke.

¹⁶ Yohmi ka nan ashʋchi moma i̱ shahli ʋno yak atuk osh nan isht i̱ nukhaklo ya̱ ahayuchi li tok, ilʋppak o̱ himak a pilla ai asha kʋt yʋmma i̱ yimmi cha, ai okcha̱yʋt bilia isha chi̱ ka, Chisʋs Klaist ʋt ʋno ak o̱ nan isht ahobʋcha he ak osh ilap nan isht i̱ sʋlahʋt i̱ nukha̱klo ya̱ otʋnihincha chi̱ ha tok.

¹⁷ Yohmi ka Mi̱ko okcha̱yʋt a bilia, illa he keyu, na holhponayo hʋt pisa he keyu, Chihowa hopoyuksa yak bano kak o̱ ahninchit holitohombli na bilia hosh ik biliá. Amen.

¹⁸ Ti̱kba nan atokowa isht a chi anoli kʋt, tikbalichit isht chi otʋnihinchi yʋmmak atuk pulla mak o̱, tʋshka a̱hli achukma hosh ish tanahampa chi̱ ka, sʋso Timohli ya̱ nan isht ish ahanta he ilʋppa chi atokoli lishke:

¹⁹ Ilʋppak ash im ai a̱hli achukma kʋt isht il akostininchi achukma ka ish ieshashke: yakohmit isht il ithaiyana he tuk ash osh kanimi kʋt kanchi kʋto, nan ai yimmi ka yash o̱ it a yuhli yoke.

²⁰ Yohmi ka kanimi kʋt Himeneʋs, micha Aleksanta ita tuklo kak atuk; yʋmmʋt ʋbanumpa ik ahobalot nan ik mihacho ka chi̱ ka yʋmmak o̱ ithʋna chi̱ ka, Setan a̱ im issa li tok oke.