1 Samuel 9 - Chahta Holisso Holitopa 1886

¹ Mihma Benchamin hatak, Kish hohchifo, hatak holitompa fehna im ila̱yak chito hosh anta tok; yʋmmʋt Abiel ushi yokma, yʋmmʋt Selo ushi yokma, yʋmmʋt Becholah ushi yokma, yʋmmʋt Benchamait Aphiah ushi atok.

² Mihma yʋmmʋt Sal hohchifo hosh ushi ʋt im anta tok, hatak himita achukma, micha pisa aiokli hatok; Islael im ʋlla ʋhleha ha̱ hatak aiokli yʋmma achukma i̱ shahli kʋt iksho tok: tahchi ʋttʋt ʋba ia kʋt chaha kʋt okla moma ka i̱ shahli tok.

³ Atuk o̱ Sal i̱ki Kish im issuba haksobish falaia ʋt tamoa tok: mihma Kish ʋt ushi Sal a̱, Himak a̱ tishu ʋhleha ha̱ achʋfa ka ish ishi cha, wakayʋt, iʋt issuba haksobish falaia puta kash hoyot hʋsh iashke, im achi tok.

⁴ Mihma Eflaim nʋnih ha̱ hlopullit, Shalisha yakni ya̱ hlopullit a̱ya kia, ik ahayuchot okla tok; yohmi mʋt Shalim yakni ya̱ hlopullit a̱yʋt okla ma, yʋmma iksho tok; micha Benchamait ʋhleha i̱ yakni ya̱ hlopullit a̱ya kia, ik ahayuchot okla tok.

⁵ Atuk osh Suf i̱ yakni ya̱ ona ma, Sal ʋt in tishu awant a̱ya tuk a̱, Inta! e falamashke; a̱ki ʋt issuba haksobish falaia puta anukfilli kash osh issa cha, pishno ak o̱ nukha̱klot pi anukfilli yoba ná, im achi tok.

⁶ Mihma, Yakeh! himak a tʋmaha holihta ilʋppa hatak Chitokaka im antia hosh anta kʋt hatak holitompa hoke; nana moma ahanchi kʋt ont ai a̱hli pulla chatuk oke: himak a̱ yʋmmak o̱ il iashke; hina il atia he ʋlhpesa pim anola hinla yoba ká, im achi tok.

⁷ Yohmi ma Sal ʋt in tishu ha̱, Yohmi kia yakeh! il iakmʋt, hatak a̱ nanta ho̱ isht il im ona chi̱ cho? pʋska ʋt pim ai ʋlhto ya̱ tahʋshke, mikma hatak Chitokaka im antia ya̱ nana kia isht im onʋt e habenʋcha hi ʋt ikshoshke; nanta ho̱ il i̱shi cho? im achi tok.

⁸ Mihma tishu hash osh afalamichit anonti Sal a̱, Yakeh! tʋli hʋta shekel kʋshkoa ai ushta kʋt ilʋppa sʋbbak fohkʋshke; yʋmmak o̱ hatak Chitokaka im antia hʋt hina il atia chi̱ ka pim anola chi̱ ka ima lashke, im achi tok.

⁹ (Nitak ti̱kba ka hatak ʋt Chitokaka ya̱ i̱ ponaklot iakmʋt, Inta! napisa yak o̱ kil im oná, achi beka tok: himak a̱ hopaii achi ʋt cha̱shpo hokʋno napisa achi beka tok.)

¹⁰ Yʋmohmi ma Sal ʋt in tishu ha̱, Anumpa hʋt achukmʋshke; inta! kil iá, im achi tok. Yohmi ma itiachit tʋmaha holihta hatak Chitokaka im antia aiʋtta ya̱ it onachi tok.

¹¹ Atuk osh nʋnih ha̱ oiyʋt tʋmaha holihta ia hosh ma̱ya mʋt, ohoyo himithoa yosh oka ochit kohchʋt a̱ya ho̱ pisa tok; micha, Napisa ʋto anta cho? im achi tok.

¹² Mihma okla afalamichit, Antʋshke; yakeh! hʋchi tikba anta hoke: himak a̱ hʋsh tu̱shpashke, himak nitak ak o̱ tʋmaha holihta ya̱ ʋla hoka; okla hʋt nan ʋbit isht aiokpʋchi ya̱ himak nitak a̱ achahaka ya̱ isht a̱sha hoka.

¹³ Tʋmaha holihta ya̱ ont hʋsh chukowa mak inli hosh achahaka ya̱ oiyʋt impʋt ik aiyo ki̱sha ho̱ hʋsh ahayucha chi̱ hoke: ik lo ki̱sha ka okla hʋt impa he keyu hoka, nan ʋbit isht aiokpʋchi ya̱ aiokpʋchi chatuk oka; mikma i̱ himmak o̱ im annoa tuk ʋt impa chatuk oke. Yohmi hoka himak a̱ hʋsh oiyashke; himak a̱ foka kak o̱ hʋsh ahayucha hinla hokʋt, im achi tok.

¹⁴ Mihma pit oiyʋt tʋmaha holihta ya̱ chukowa tok: micha tʋmaha holihta ya̱ ont chukowa ma, yakeh! Samuel ʋt achahaka yash ona chi̱ hosh kohchʋt ont afama tok.

¹⁵ Nitak achʋfa tikbanli Sal ʋt ik lo ki̱sha ho̱, Chihowa ʋt Samuel a̱ haksobish a̱ haklochit,

¹⁶ Onnaha himak a̱ chohmi fokakma Benchamin i̱ yakni ya̱ a kohchit hatak a̱ et chi̱ pila la chi̱ hoke; mikma yʋmma bila ahʋmmit ish atokoli na ʋm okla Islael a̱ pehliechi cha, ʋm okla ha̱ Filistin okla ibbak a̱ a mokofit hlakofichashke: pa̱ha̱ya kʋt ʋm ahanla hatuk o̱, ʋm okla ha̱ pihi̱sa li hoke, achi tuk atok.

¹⁷ Atuk o̱ Samuel ʋt Sal a̱ pisa ma, Chihowa ʋt, Yakeh! hatak chim anoli li kash pisá; ilʋppa fehna hosh ʋm okla ha i̱ mi̱ka chi̱ hoke, im achi tok.

¹⁸ Mihma Samuel ʋt holihta okhissa hikia na Sal ʋt i̱ bili̱ka ona cha, Ʋm anolí, chim asilhha lishke, katima yak osh napisa in chuka yoh cho? achi tok.

¹⁹ Mihma Samuel ʋt afalamichit Sal a̱, Ʋno ak osh napisa sia hoke: sa tikba iʋt achahaka yash ish onashke; himak nitak a̱ is sʋbai impa chi̱ hoka: atukma onnakma ik iá, chim ahni la chi̱ hoke; micha nana moma chi chu̱kʋsh fo̱ka ka chim anoli la chi̱ hoke.

²⁰ Yohmi ka chim issuba haksobish falaia nitak tuchina kash tamoa tuk ak heno chik anukfillo kashke; haiaka tuk oka. Yohmi ka Islael moma aiahni kʋt kʋta hak oh cho? Chishno, micha chi̱ki in chuka achʋfa kak keyu cho? achi tok.

²¹ Mihma Sal ʋt afalamichit, Ʋno ʋt Benchamait sia keyu̱? Islael apehlichi puta ka moma ik lauwo keyu cho? micha Benchamin apehlichi chuka achʋfa puta ka an chuka achʋfa ak osh moma ik lauwo keyu cho? yohmi ka nanta katiohmi ho̱ yakohmichit is sʋm anumpuli cho? achi tok.

²² Mihma Samuel ʋt Sal, micha in tishu pehlichit ai impa aboha isht ona cha, im annoa tuk ʋt hatak pokoli tuchina foka hosh chieya ka ai ititakla ai ombinili holitopa i̱ shahli kak o̱ binohlichi tok.

²³ Mihmʋt Samuel ʋt hoponi ya̱, Kʋshkoa achʋfa ka chima lish, Naksika talalí, chim achi li kash isht ʋlá, im achi tok.

²⁴ Mihma hoponi yash osh fullup a̱, micha nana onʋtola tuk a̱ aiena ka ishi cha, Sal a̱ itikba talali tok. Mihma Samuel ʋt, Yakeh! yʋmma il atomba tuk mak oke; chi tikba talali cha, impá: chishno ak o̱, Okla ha̱ hoyo lishke, achi li tuk itintakla ka chin talaia tuk oke, achi tok. Yohmi ho̱ Sal ʋt nitak yʋmma Samuel a̱ ibai impa tok.

²⁵ Atuk osh achahaka ya̱ akowʋt tʋmaha holihta ya̱ chukowa ma, Samuel ʋt aboha pakna ai itim anumpuli tok.

²⁶ Atuk osh onnahinli fehna ho̱ wakayʋt okla tok: atuk o̱ yakohmi tok, nitak ʋt onnʋt mihinti foka ma, Samuel ʋt aboha paknaka Sal a̱ ai i̱ howʋt, Wakayá, yohmi na chi pila likma, ish a̱yashke, achi tok. Mihma Sal ʋt wakaya ma, itatu̱klot kohchʋt it iachi mʋt, yʋmma, micha Samuel itatu̱klot yakni haiaka itonachi tok.

²⁷ Atuk osh okʋtahʋt iʋt tʋmaha holihta ai ʋhli ka ona ma, Samuel ʋt Sal a̱, Tishu ha̱ tikba ia chi̱ ka, i̱ mihá, (mihma ia tok:) amba chishno ʋto lumʋt hikia na Chitokaka im anumpa ha̱ chim anoli lashke, im achi tok.