1 Samuel 7 - Chahta Holisso Holitopa 1886

¹ Mihma Kichalh‐chealim hatak ʋhleha hʋt ʋla cha, Chihowa im itombi holitopa ya̱ ant isht ona cha, Abinatab a̱ in chuka nʋnih paknaka talaia ya̱ isht ona mʋt, ushi Eleasa ak o̱ Chihowa im itombi holitopa ya̱ iesha chi̱ ho̱ hullochi tok.

² Atuk o̱ yakohmi tok, itombi holitopa yʋt Kichalh‐chealim talaia na hopaki tok; afʋmmi pokoli tuklo tok oka: mihma Islael in chuka achʋfa moma kʋt i̱ palatʋt Chihowa ya̱ im itʋnaha tok.

³ Mihma Samuel ʋt Islael in chuka achʋfa moma ka im anumpulit, Hʋchi chu̱kʋsh isht ai oklu̱hʋchit Chihowa ya̱ falamʋt hʋsh im ona hokmʋt, oklushi inla i̱ na holbʋt toba, micha Ashtalolh aiena ka̱ hʋch ititakla ya̱ hʋsh a kanchi cha, hʋchi chu̱kʋsh a̱ Chihowa ya̱ hʋsh im atahli cha, yʋmmak bano ho̱ hʋsh aiokpʋchashke; mikma Filistin okla ibbak a̱ akohchit hʋchi hlakoficha chi̱ hoke, achi tok.

⁴ Yʋmohmi ma Islael im ʋlla ʋhleha hʋt Baalim, micha Ashtalolh a̱ kanʋllichi cha, Chihowa ak bano ho̱ aiokpʋchi tok.

⁵ Mihma Samuel ʋt, Islael moma ka Mispeh ak o̱ hʋsh ai itʋnahlashke, mikmʋt ishit hʋchi anumpulit Chihowa ya̱ im ilbʋsha lashke, achi tok.

⁶ Mihma iti hoyot Mispeh ak o̱ itʋnaha cha, oka ya̱ ochi mʋt, Chihowa itikba ya̱ hlatʋbli tok; micha nitak yʋmma na hullochi cha, Chihowa ya̱ il i̱ yoshuba tuk oke, yʋmma ai achi tok. Mihma Samuel ʋt Islael im ʋlla ʋhleha ha̱ Mispeh ya̱ nan im ai apesa tok.

⁷ Atuk o̱ Islael im ʋlla ʋhleha hʋt iti hoyot Mispeh a̱ ai itʋnaha ka Filistin okla hʋt haklo mʋt, Filistin okla i̱ hochitoka yak osh Islael itibit ia tok. Atuk o̱ Islael im ʋlla ʋhleha hʋt haklo mʋt, Filistin ʋhleha ha̱ i̱ nukshopa tok.

⁸ Mihma Islael im ʋlla ʋhleha hʋt Samuel a̱, Isht ish pi anumpohonlit pin Chitokaka Chihowa ya̱ ish i̱ pa̱ha̱ya kʋt chik isso kashke, yʋmohmi na Filistin ʋhleha ibbak a̱ akohchit pi hlakofichashke, okla im achi tok.

⁹ Mihma Samuel ʋt chukfʋlhpoa ushi pi̱shi yo̱ ishi cha, hukmit isht aiokpʋchit mominchit Chihowa ya̱ im issa tok; mihma Samuel ʋt Islael a̱ isht anumpulit Chihowa ya̱ i̱ pa̱ha̱ya tok; mihma Chihowa ʋt i̱ haponaklo tok.

¹⁰ Mihma Samuel ʋt na hukmit isht aiokpʋchi yash im issʋt isht anta ma, Filistin ʋhleha hʋt Islael a̱ itiba chi̱ hosh akanʋllit bili̱ka ʋla tok; yohmi tuk kia Chihowa ʋt hilohhʋchit hiloha chinto ho̱ Filistin ʋhleha ha̱ et onochi cha, komuntʋchit yuhli tok; mihma Islael itikba ya̱ akakoha tok.

¹¹ Mihma Islael hatak ʋhleha hʋt Mispeh ya̱ kohcha cha, Filistin ʋhleha ha̱ hlioli cha, issot kanchit ishit ma̱yʋt Belhka nuta ya̱ ona tok.

¹² Yʋmohmi ma Samuel ʋt tʋli ishi cha, Mispeh micha Shen ititakla ya̱ hilechi cha, Ebenese hochifot, Ilʋppa ant ʋhli ka Chihowa ʋt pi apelʋshke, achi tok.

¹³ Yʋmohmit Filistin ʋhleha ha̱ imaiya na himmakma Islael im ai ʋhli ha̱ ik chukowo tok: mihma Samuel ʋt ahanta nitak moma ka Chihowa ibbak ʋt Filistin okla ha̱ i̱ sanali tok.

¹⁴ Mihma tʋmaha holihta puta Filistin okla hʋt Islael a̱ im ishi tok ʋt Islael a̱ i̱ falʋmminchi tok, Eklon ʋttʋt iʋt Kalh ont ʋhli tok; micha ai ʋhli ka Islael ʋt Filistin okla ibbak a̱ a mokofit im ishi tok. Mihma Islael, micha Amolait okla aiena kʋt it i̱ nanaiya tok.

¹⁵ Mihma Samuel ʋt okcha̱yʋt ahanta nitak moma ka Islael a̱ nan im apesa tok.

¹⁶ Mikmʋt afʋmmi hosh afʋmmikma iʋt Behlel, micha Kilkal, micha Mispeh aiena ka fullota cha, tʋmaha holihta yʋmma moma ka Islael a̱ nana im ai apesa beka tok.

¹⁷ Micha falamakmʋt, Lamah ak o̱ ona beka tok; yʋmmak o̱ in chuka yʋt talaia hatuk oka; micha yʋmmak o̱ Islael a̱ nan ai im apesa tok; micha yʋmmak o̱ Chihowa ya̱ alta ya̱ ai im ikbi tok.