1 Samuel 6 - Chahta Holisso Holitopa 1886

¹ Mihma Chihowa im itombi holitopa ʋt Filistin okla i̱ yakni ya̱ a̱ya na hʋshi untuklo tok.

² Mihma Filistin okla hʋt naholitompa isht asha ʋhleha, micha hatak fʋppo ʋhleha ha̱ i̱ howa cha, Chihowa im itombi holitopa ya̱ e katiohmicha chi̱ cho? pim anolí, katiohmit atalaia he ʋlhpesa ka e pila chi̱ cho? achi tok.

³ Mihma afalamichit, Islael in Chitokaka im itombi holitopa ya̱ hʋsh pila hokmʋt, nana iksho ka hʋch ik pelo kashke: amba ik kaniohmi kia nan ashʋchi isht ʋlhtoba ya̱ hʋsh i̱ falʋmminchi pullashke: yʋmohmikma hʋchi hlakofa hi oke; micha kaniohmi kak o̱ ibbak ʋt ik hʋchi̱ kanʋllo tuk a̱ hʋsh ithana hi oke, achi tok.

⁴ Mihma afalamichit, Nanta ho̱ nan ashʋchi isht ʋlhtoba ya̱ il i̱ falʋmmincha chi̱ cho? achi tok. Mihma afalamichit, Hlachowa yash tʋli holisso lakna yosh holbʋt toba tahlapi, micha tʋli holisso lakna yosh pinti holbʋt toba tahlapi, Filistin okla i̱ hochitoka ʋhleha holhtina kak inli chohmi ho̱ ililli okpulo achʋfa hosh hʋsh moma, micha hʋchi̱ hochitoka aiena ka onʋtoyula beka hatuk oka, achi tok.

⁵ Yʋmohmi hoka hʋchi hlachowa yash holba ho̱ ikbit, micha hʋchi̱ pinti yakni okpʋni yash holba ho̱ hʋsh ikbashke; micha Islael in Chitokaka ya̱ hʋsh holitoblichashke: yohmi na ibbak ʋt hʋchi onʋtoyula tuk ʋt shohhʋlachit hʋchi ai ishit hʋchi̱ naholbʋt toba puta ka ai ishit, micha hʋchi̱ yakni aiena ka ai ishi yoba ná.

⁶ Yʋmohmi hoka nanta katiohmi ho̱ Echip okla, micha Feleo aiena kʋt chu̱kʋsh kʋllochi tok chohmichit hʋchi chu̱kʋsh a̱ hʋsh kʋllochi cho? Ai ititakla ya̱ nana afehna ka yʋmihinchi ma, ik iá okla im ahni na ia tok keyu cho?

⁷ Yʋmohmi hoka himak a̱ itichanʋlli himona ikbi cha, wak tek pishinchi tuklo ikunla abana ʋt, onʋtola tok keyu yo̱ ishit, wak tek ash itichanʋlli ya̱ hʋsh a takchichashke; micha ushi ya̱ im ai ishit pehlichit i̱ holihta ya̱ isht hʋsh lashke.

⁸ Micha Chihowa im itombi holitopa ya̱ itichanʋlli ya̱ hʋsh on talali cha, nan ashʋchi isht ʋlhtoba tʋli holisso lakna yash hʋsh i̱ falʋmminchi kʋt itombi iskitini yo̱ ʋlhto ho̱ apotolit hʋsh talalashke; micha hʋsh pila na iashke.

⁹ Micha hʋsh pisashke; ilap im ai ʋhli Belh‐shemesh iakma, yohmikma nan ik achukmo fehna ilʋppa pi yʋmihchi tuk achi̱ hoke; amba keyu hokma, peh yohma he yoba tuk osh pi̱ yʋmohmi; yʋmma ibbak ak osh pisso tok keyu ka il ithaiyanashke, achi tok.

¹⁰ Mihma hatak ʋhleha hʋt yʋmihchi tok: micha wak tek pishinchi tuklo ho̱ ishi cha, itichanʋlli ya̱ a takchichi cha, ushi ano i̱ holihta apittʋt im okshilita tok.

¹¹ Mihmʋt Chihowa im itombi holitopa ya̱, micha itombi iskitini tʋli holisso lakna pinti, micha hlachowa holba ʋt ʋlhto yash aiena ka itichanʋlli ya̱ on talali tok.

¹² Mihma wak tek ash osh apissanlit Belh‐shemesh pilla ia tok; micha hina takla ya̱ woho̱hʋt a̱ya mʋt, isht impakimma, micha ʋlhfʋbekimma kia naksika pit fullota keyu hosh ia ma, Filistin okla i̱ hochitoka ʋhleha hʋt iakaiyʋt ia mʋt, Belh‐shemesh ai ʋhli ka ona tok.

¹³ Mihma Belh‐shemesh asha yʋt onush bʋshli hosh okfa ha̱ ma̱ya tok: atuk osh akachakali cha, itombi holitopa yash pisa mʋt, pisa kʋt na yukpa tok.

¹⁴ Mihma itichanʋlli ash osh Choshua Belh‐shemait im osapa yo̱ ont chukowa cha, tʋli chito ai itola ho̱ yʋmmak o̱ ont hikia tok: mihma itichanʋlli iti ya̱ pʋhli cha, wak tek ash hukmit isht aiokpʋchi yo̱ Chihowa ya̱ im issa tok.

¹⁵ Mihma Lefait ʋhleha hʋt Chihowa im itombi holitopa yash, micha itombi iskitini tʋli holisso lakna ai ʋlhto kash aiena ka akʋchi cha, tʋli chito ya̱ on talali tok: mihma Belh‐shemesh hatak ʋhleha hash osh nitak yʋmmak inli ka na hukmit isht aiokpʋchi, micha nan ʋbit isht aiokpʋchi ya̱ Chihowa ya̱ im issa tok.

¹⁶ Mihma Filistin okla i̱ hochitoka tahlapi kash osh pisa mʋt, mih nitak akinli ho̱ falamʋt Eklon a̱ ona tok.

¹⁷ Mihma tʋli holisso lakna yosh na hlachowa holbʋt toba ilʋppak o̱ nan ashʋchi isht ʋlhtoba ya̱ Chihowa ya̱ i̱ falʋmminchi tok: Ashtot a̱ achʋfa, Kasa ya̱ achʋfa, Ashkelon a̱ achʋfa, Kalh a̱ achʋfa, Eklon a̱ achʋfa tok.

¹⁸ Micha tʋli holisso lakna pinti ʋt Filistin okla in tʋmaha holihta moma holhtina ka ʋlhpi̱sa, hochitoka tahlapi ka immi, tʋmaha holihta kʋllo, micha kocha tʋmahushi aiena, tʋli chito Abel yʋmmak o̱ Chihowa im itombi holitopa on talali tok ont ai ʋhli ak atok oke; tʋli yʋmmʋt himak nitak a̱ Choshua Belh‐shemait im osapa ya̱ talaia hoke.

¹⁹ Mihma Belh‐shemesh hatak ʋhleha ha̱ Chihowa im itombi holitopa anu̱kaka ya̱ pisa tuk pulla mako̱, okla tahlepa sipokni pokoli tahlapi cha, pokoli untuklo ho̱ ʋbit tahli tok. Mihma Chihowa ʋt issot kanchi na illi kʋt laua fehna hatuk o̱, okla hʋt yaha̱ya tok.

²⁰ Mihma Belh‐shemesh hatak ʋhleha hʋt, Kʋta hosh Chitokaka Chihowa nan ashʋchi iksho ilʋppa itikba ya̱ hikia hinla cho? micha pissʋt kʋta hak o̱ im ia chi̱ cho? achi tok.

²¹ Mihmʋt anumpa shali ʋhleha ha̱ Kichalh‐chealim okla ha̱ pit i̱ pila cha, Filistin okla hʋt falʋmminchit Chihowa im itombi holitopa ya̱ isht ʋlʋshke; ho minti chá, ant ishit hʋsh ai asha ka isht hʋsh onashke, achi tok.