1 Samuel 5 - Chahta Holisso Holitopa 1886

¹ Mihma Filistin ʋhleha hʋt Chitokaka im itombi holitopa ya̱ Ebenese ya̱ ai ishi cha, Ashtot a̱ isht ona tok.

² Filistin ʋhleha hʋt Chitokaka im itombi holitopa ya̱ ishi mʋt, Takon im aboha okla isht ona cha, Takon apotolit talali tok.

³ Atuk o̱ Ashtot a̱sha tuk ʋt onna ma onnahinli fehna wakaya ma, yakeh! Takon ʋt Chihowa im itombi holitopa itikba ya̱ nashuka ya̱ ishit hlipiʋt aka itula tuk achini tok. Mihma Takon a̱ okla ishi cha, aiasha ya̱ anonti hilechi tok.

⁴ Atuk osh onna kʋt onnahinli moma na wakaya ma, yakeh! Takon ʋt Chihowa im itombi holitopa itikba ya̱ nashuka ishit hlipiʋt aka itula tuk achini tok: mihma Takon noshkobo, micha ibbak pʋtha ʋt iti champa aiena kʋt tʋptua tuk osh okhissa in tola yak o̱ kahʋt ma̱ya tok: Takon ʋt peh haknip ak bano hosh itonla tok.

⁵ Yʋmohmi tok o̱ Takon i̱ naholitompa isht asha, micha kʋna kia Takon im aboha ya̱ chukowakmʋt, Takon im aboha Ashtot hikia ka okhissa in tola ya̱ ik a nowo tuk osh himak nitak ak kia yʋmohmi momʋshke.

⁶ Yʋmohmi kia Chihowa ibbak ʋt Ashtot ai asha ka i̱ weki fehna tok; micha okpʋni cha, Ashtot, mikmʋt ai ʋhli fullota ka isht asha hlachowa onochi tok.

⁷ Mihma Ashtot hatak ʋhleha hʋt yʋmohmi na pisa mʋt, Islael in Chitokaka im itombi holitopa ʋt pi takla talaia he keyu: ibbak ʋt weki fehna hosh pishno, micha Takon pi̱ na holbʋt toba aiena ka pi onʋtoyula hoka, achi tok.

⁸ Yʋmohmi ho̱ hoyot Filistin okla i̱ hochitoka puta ka itʋnahli cha, Islael in Chitokaka im itombi holitopa ya̱ e katiohmicha chi̱ cho? achi tok. Mihma afalamichit, Islael in Chitokaka im itombi holitopa ya̱ falʋmmichit Kalh a̱ isht onashke, achi tok. Mihma Islael in Chitokaka im itombi holitopa ya̱ yʋmma isht ona tok.

⁹ Atuk o̱ yakohmi tok, yʋmma isht ona haya̱, Chihowa ibbak ʋt tʋmaha holihta yash im i̱ sanalit nukhlakʋshli fehna tok: micha tʋmaha holihta hatak chipunta, micha hochito moyuma ka isso na isht asha ya̱ okla hlachowa ʋbi tok.

¹⁰ Yʋmohmi ma Chitokaka im itombi holitopa ya̱ Eklon ak o̱ pila tok. Atuk o̱ yakohmi tok, Chitokaka im itombi holitopa ʋt Eklon a̱ ʋla ma, Eklonait ʋhleha hash osh pa̱yʋt, Islael in Chitokaka im itombi holitopa ya̱ pishno ma, micha pim okla aiena ka isht ʋbit pi tahla chi̱ hosh ishit pim ʋlʋshke, achi tok.

¹¹ Yʋmohmi ho̱ pilʋt, Filistin okla i̱ hochitoka ʋhleha puta ka okla hoyot itʋnahli cha, Islael in Chitokaka im itombi holitopa ya̱ hʋsh pila na atalaia he ʋlhpesa kʋt anonti onashke, yʋmohmi hosh pishno, micha pim okla aiena ka ik pe bo kashke; tʋmaha holihta moma afullota ka ililli okpulo ʋt ishit nukhlakanchit ihinli tok oka; Chitokaka ibbak ʋt yʋmmak kia weki fehna tok.

¹² Mihma hatak ʋhleha hʋt ik illo tuk a̱ isht asha hlachowa isht ʋbichi tok: mihma tʋmaha holihta yaiya kʋt shutik a̱ ona tok.