1 Samuel 4 - Chahta Holisso Holitopa 1886

¹ Mihma Samuel im anumpa hʋt Islael moma ka im ona tok. Mihma Islael ʋt Filistin okla ha̱ itiba chi̱ hosh kohchʋt ia cha, Ebenese bili̱ka binachi tok: mihma Filistin okla hʋt Afek ak o̱ binachi tok.

² Mihma Filistin okla hʋt Islael a̱ itiba chi̱ kʋt im ʋlhtahʋt hieli tok: mihmʋt itibit itafama ma, Islael ʋt Filistin okla itikba akakoha tok; micha ai itibi yʋmma tʋshka chipota ya̱ tahlepa sipokni ushta foka ho̱ okla ʋbi tok.

³ Mihma okla hʋt falamʋt im ʋlbina ha̱ ona ma, Islael hatak im asʋnonchi ʋhleha hʋt, Katiohmi ho̱ Chihowa ʋt himak nitak a̱ Filistin okla itikba ya̱ issot pi akakohlichi cho? Chihowa nan it im apesa afoyuka itombi holitopa ya̱ Shiloh ya̱ ont ai isht iloh ʋlashke, yohmi na pititakla ʋlakmʋt, pin tʋnʋp ibbak a̱ kohchit pi hlakofichashke, achi tok.

⁴ Yʋmohmi mʋt ʋba nan oklu̱ha il aieshi Chihowa chelubim ititakla ahanta i̱ nan it im apesa afoyuka itombi holitopa ya̱ ont ai isht ʋla chi̱ ho̱ Shiloh ya̱ pila tok: mihma Eli ushi tuklo Hofni, micha Finehas itatuklo kʋt Chitokaka nan it im apesa afoyuka itombi holitopa ya̱ ta̱kla a̱shwa tok.

⁵ Atuk o̱ Chihowa nan it im apesa afoyuka itombi holitopa ʋt binah ha̱ ʋla ma, Islael moma kʋt shakapa chito shakapa tok; yohmi ho̱ anonti yakni ʋt winihʋchi tok.

⁶ Mihma Filistin ʋhleha hʋt shakapa ka haklo cha, Heblu ʋhleha i̱ binah ha̱ shakapa chito ilʋppʋt nanta hoh cho? achi tok. Mihma Chihowa im itombi holitopa ʋt binah ʋla ka akostininchi tok.

⁷ Mihmʋt Filistin ʋhleha hʋt nukshopa tok; Chitokaka hʋt binah ha̱ ʋlʋshke, okla achi hatuk osh. Mihmʋt, Na palʋmmi ʋt pi onʋtolʋshke! ti̱kba ka nana ilʋppa chohmi kʋt yakohmi tok keyu hoka.

⁸ Na palʋmmi ʋt pi onʋtolʋshke! Kʋta hosh Chitokaka nana moma imaiya ʋhleha ilʋppa ibbak a̱ a kohchit pi hlakoficha chi̱ cho? Chitokaka ʋhleha ilʋppak osh Echip okla ha̱ yakni haiaka ya̱ na palʋmmi puta isht issot kanchi tuk mak oke.

⁹ Hʋsh kʋllashke, micha nakni hʋsh chiyuhmashke, Filistin hʋchia ma! Heblu ʋhleha hʋt yʋmohmi tuk a̱ chohmit in tishu ha̱ hʋch ik tobo kashke: nakni chiyuhmit hʋsh itibashke, achi tok.

¹⁰ Mihmʋt Filistin ʋhleha hash osh itibi ma, Islael ʋt akakoha tok: mihmʋt okla yihlepa cha, hatak ʋt i̱ binah aiyukali ka ona tok: mihma illi kʋt laua fehna tok; Islael ʋt hatak aka a̱ya ʋt tahlepa sipokni pokoli tuchina hosh akakoha tok oke.

¹¹ Mihma Chitokaka im itombi holitopa ya̱ ishi tok: mihma Eli ushi tuklo, Hofni, micha Finehas itatuklo kʋt illi tok.

¹² Mihma Benchamin hatak osh tʋshka chipota aiasha ka hikiʋt maleli mʋt, mih nitak akinli ho̱ Shiloh ya̱ i̱ nafohka ʋt hlilafa cha, lukfi ʋt noshkobo ha̱ onʋtoyula hosh ona tok.

¹³ Atuk osh ona ma, yakeh! Eli ʋt hina apota ka hopo̱koyo hosh ai om binili on a̱sha tok; Chitokaka im itombi holitopa pulla kak o̱ chu̱kʋsh ʋt wʋnihinchi hatuk osh. Atuk o̱ hatak ash osh tʋmaha holihta ya̱ ont chukowa cha, anoli na tʋmaha holihta moma kʋt chitoli hosh yaiya tok.

¹⁴ Mihma yaiyʋt shakapa na Eli ʋt haklo mʋt, Nanta katiohmi ho̱ shakapa yakohmi kʋt yohmi cho? achi tok. Mihma hatak ash osh tu̱shpa hosh chukowa cha, Eli ya̱ im anoli tok.

¹⁵ Mihma Eli ʋt afʋmmi pokoli chakkali akucha untuchina tok; micha nishkin ʋt tohbi cha, nana pisa he keyu tok.

¹⁶ Mihma hatak ash osh Eli ya̱, Ʋno ak osh tʋshka chipota aiasha ka kohcha li tuk oke, micha himak nitak ak o̱ tʋshka chipota aiasha ka kohchʋt maleli li tuk oke, im achi tok. Mihma, Nanta ho̱ katiohmi cho? sʋso ma! achi tok.

¹⁷ Mihma anumpa shali yash osh afalamichit, Islael ʋt Filistin ʋhleha itikba ya̱ yihlepʋshke; micha illi kʋt laua fehnʋshke; mihma chiso tuklo Hofni, micha Finehas itatuklo kak kia illishke; mihma Chitokaka im itombi holitopa ya̱ ishishke, achi tok.

¹⁸ Atuk o̱ yakohmi tok, Chitokaka im itombi holitopa ya̱ isht anumpuli ma, holihta okhissa lapali ka ai om binili on a̱sha tuk ʋt olbʋlhpelʋt iʋt ont itula mʋt, ikunla ʋt tilofa cha, illi tok: hatak sipokni yosh weki hatuk okʋt. Micha Islael a̱ afʋmmi pokoli ushta ho̱ nan im apesa tuk atok.

¹⁹ Mihma ipok Finehas tekchi ʋt ʋlla shali tuk osh eshi a̱hosi tok: atuk osh Chitokaka im itombi holitopa ya̱ ishi tuk annoa ka haklo, micha imʋfo, micha i̱ hatak aiena kʋt illi tuk a̱ haklo mʋt, aka chunoli cha ʋlla eshi tok; nukhʋmi ʋt ant onʋtoyula hatuk okʋt.

²⁰ Atuk osh illi fokali ma, ohoyo bili̱ka hieli kash osh, Chi nukshopa ná, ʋlla nakni yo̱ ish eshi hokʋt, im achi tok. Yohmi kia afalamichi kʋt nana ik acho, micha nana yohmi ik ahno tok.

²¹ Mihmʋt, Islael isht a holitopa ʋt kʋniʋshke, achi hosh ʋlla ya̱ Ikabot hochifo tok. (Chitokaka im itombi holitopa ya̱ ishi, micha imʋfo, mikmʋt i̱ hatak aiena hatuk pulla kak o̱.)

²² Mihmʋt, Islael isht aholitopa ʋt kʋniʋshke: Chitokaka im itombi holitopa ya̱ ishi hoka, achi tok.