1 Samuel 31 - Chahta Holisso Holitopa 1886

¹ Yohmi ma Filistin ʋhleha hʋt Islael a̱ itibi tok: mihma Islael hatak ʋhleha hʋt Filistin ʋhleha itikba yihlepa ma, Kilboa nʋnih ha̱ ai ʋbi na akakoha tok.

² Mihma Filistin ʋhleha hʋt Sal, micha ushi ʋhleha hak o̱ hliolit sakki tok: micha Filistin ʋhleha hʋt Sal ushi ʋhleha, Chonahlan, micha Abinatab, mikmʋt Malchishua aiena ka ʋbi tok.

³ Micha itibi kʋt Sal a̱ i̱ kʋllo fehna cha, iti tanampo sholi ʋhleha hʋt nʋhli tok: mihma iti tanampo sholi ʋhleha hʋt nʋhli na hotopa fehna tok.

⁴ Yohmi ma Sal ʋt i̱ nahalupa sholi ya̱, Chi̱ bʋshpo falaia ya̱ shu̱fi cha, isht is sa̱ bahlashke: keyukma hakshup ik tapo ʋhleha ilʋppʋt ʋla cha, bahlit sʋs sikkopali ná, im achi tok. Yohmi kia i̱ nahalupa sholi ʋt nukshopa fehna hatuk osh yʋmihcha he keyu tok. Yʋmohmi ma Sal ʋt bʋshpo falaia ya̱ ishi cha, onʋtola tok.

⁵ Mihma i̱ nahalupa sholi yash osh Sal ʋt illi na pisa mʋt, yʋmmak kia i̱ bʋshpo falaia ya̱ onʋtola cha, awant illi tok.

⁶ Yohmi hosh Sal, micha ushi tuchina, micha i̱ nahalupa sholi, mikmʋt in tʋshka ʋhleha hʋt nitak yʋmmak inli ho̱ moma kʋt it api̱hʋt illi tok oke.

⁷ Mihma Islael hatak ʋhleha okfa in tʋnnʋp a̱sha tuk, micha Chatan misha tʋnnʋp a̱sha tuk ʋt Islael hatak ʋhleha hʋt yihlepa, micha Sal, mikmʋt ushi ʋhleha aiena kʋt illi na pisa mʋt, tʋmaha holihta puta ka issa cha, yihlepa tok: mihma Filistin okla hʋt ʋla cha, ai asha tok.

⁸ Atuk o̱ yakohmi tok, onna ma Filistin ʋhleha hʋt illi tuk a̱ wehpula chi̱ hosh ʋla mʋt, Sal, micha ushi tuchina aiena kʋt Kilboa nʋnih ha̱ kaiyaha na ahayuchi tok.

⁹ Micha noshkobo ha̱ tʋbli cha, i̱ nahalupa ya̱ shu̱fit ishi mʋt, Filistin i̱ yakni pilla fullolechit naholbʋt toba puta ai a̱sha chuka puta, micha okla ha̱ im anolit isht a̱ya tok.

¹⁰ Micha i̱ nahalupa yash Ashtalolh in chuka okla bohli mʋt, haknip ash Belh‐shan holihta naksika ya̱ apotolit anʋhlichi tok.

¹¹ Atuk o̱ Chabesh‐Kileat okla hʋt, Filistin ʋhleha hʋt Sal a̱ yʋmihchi tuk a̱ haklo mʋt,

¹² Hatak chilita nukwia iksho moma kʋt wakaya cha, ninak a̱ a̱ya na onna hosh iʋt, Sal haknip ash, micha ushi ʋhleha haknip ash aiena Belh‐shan holihta naksika atakali tuk a̱ ont ishit, Chabesh a̱ isht ʋla cha, yʋmmak o̱ a̱ hukmi tok.

¹³ Mihmʋt foni ya̱ okla ishi cha, Chabesh iti hikia ho̱ nutaka ya̱ hohpi cha, nitak untuklo ho̱ nahullochi tok.