1 Samuel 30 - Chahta Holisso Holitopa 1886

¹ Atuk o̱ yakohmi tok, Lewi, micha in tʋshka ʋhleha aiena kʋt nitak ont atuchina ho̱ Siklak a̱ ona ma, Amalekait ʋhleha hʋt oka mahli, micha Siklak a̱ issot kanchi cha, luak ishit hukmit tahli tok.

² Micha ohoyo yʋmma aiasha tuk a̱ yukachit ishi; hochito, micha chipuntasi kia ik bo hosh, amba ishi cha, i̱ hina fohkʋt okla ia tok.

³ Yʋmohmi tuk o̱ Lewi, micha in tʋshka ʋhleha aiena kʋt tʋmaha holihta ya̱ ona ma, yakeh! luak ishit luʋt taha tok: mikma tekchi ʋhleha, micha ushi ʋhleha, micha ushetik ʋhleha aiena ka yukachit ishi tok.

⁴ Yohmi ma Lewi, micha okla apehʋt a̱ya tuk aiena kʋt chitolit yaha̱ya kʋt, pola̱ka yaiya he keyut taha tok.

⁵ Mihma Lewi tekchi tuklo Ahinoam, Chesleel ohoyo, micha Abikail Nabal, Kamelait tekchi atok itatuklo ka yukachit isht ia tuk atok.

⁶ Mihma Lewi ʋt ilbʋsha fehna tok: hatak puta kʋt ushi ʋhleha, micha ushetik ʋhleha aiyukali hatuk pulla kak o̱, okla moma kʋt chu̱kʋsh nukha̱klo hatuk osh, tʋli ishit boli ka miha tok oka, yohmi kia Lewi ʋt in Chitokaka Chihowa ya̱ ile hlampkochi tok.

⁷ Mihma Lewi ʋt Ahimelech ushi Abiahla naholitompa isht ʋtta ya̱, Efot a̱ isht ʋm ʋlá, chim asilhha lishke, im achi tok. Mihma Abiahla yʋt Lewi ya̱ efot a̱ isht im ʋla tok.

⁸ Mihma Lewi ʋt Chihowa ya̱ im a ponaklot, Tʋshka nawehpuli ilʋppa hlioli la chi̱ cho? sakki la chi̱ cho? achi tok. Mihma afalaminchi mʋt, Ish hliolashke; ish sakki pulla cha, ik kaniohmi kia mominchit falʋmminchit ish isha chi̱ hokʋt, im achi tok.

⁹ Yohmi ho̱ Lewi, micha hatak tahlepa hannali apehʋt a̱ya tuk ash aiena kʋt ia mʋt, bokushi Beso ya̱ ona ma, yʋmma olbʋl a̱sha chin tuk ʋt a̱sha tok.

¹⁰ Amba Lewi, micha hatak tahlepa ushta aiena kʋt hlioli tok: tahlepa tuklo hokʋto hoyʋbli fehna hatuk osh, Beso bokushi ya̱ ʋbanʋblit ont ia he keyu hatuk osh olbʋl a̱sha tok.

¹¹ Mihma yakni haiaka ya̱ Echip hatak o̱ ahayuchi cha, Lewi ya̱ isht im ona ma, pʋska ipeta na ʋpa tok; micha oka ishkochechi tok.

¹² Micha fik palʋska tushafa, micha pa̱ki shila champuli lokoli tuklo ho̱ ima na ʋpa mʋt, anonti imi̱ hlampko kʋt falamʋt im ʋla tok: nitak tuchina, micha ninak tuchina ho̱ pʋska ʋpa tuk keyu, micha oka kia ishko tuk keyu hokʋt.

¹³ Mihma Lewi ʋt, Kʋta hak o̱ immi chia hoh cho? micha katima ish minti cho? im achi tok. Mihma, Echip hatak himita sia, micha Amalekait hatak in tishu sia hoke, atuk o̱ a̱ shahli hʋt nitak tuchina kash si abeka tuk ak o̱, sa kanchi tuk oke.

¹⁴ Chelehlait okla im oka mahli imma, micha Chutah i̱ yakni ai ʋhli, micha Kaleb im oka mahli imma yak o̱ il iba chukowa cha, Siklak a̱ luak ishit hukmit e tahli tuk oke, achi tok.

¹⁵ Mihma Lewi ʋt, Tʋshka nawehpuli ilʋppa isht is si ona hinla cho? im achi tok. Mihma Chitokaka ishit hochifot anumpa kʋllo il onochit, is sʋba he keyu, micha a̱ shahli ibbak a̱ is sa fohka he keyu is sa̱ mihakma, tʋshka nawehpuli ilʋppa chisht ona lashke, achi tok.

¹⁶ Atuk osh isht ona ma, yakeh! hlahʋt pataiyʋt a̱yʋt fullota mʋt, Filistin yakni, micha Chutah yakni aiena kak o̱, nawehpoa chinto fehna ho̱ ai ishit kohcha tuk okʋt, impʋt, nan ishkot, micha hihlʋt aiasha tok.

¹⁷ Mihma Lewi ʋt okpolusbit taha ho̱ issot kanchit isht ia mʋt, onna kʋt opia tok: mihma hatak achʋfa kia ik hlakofo, amba hatak himithoa tahlepa ushta hosh kamel om binili tuk osh yihlepa kak illa tok.

¹⁸ Mihma Amalekait ʋhleha hʋt isht ia tuk a̱ mominchit Lewi ʋt falʋmminchit ishi tok: micha Lewi ʋt tekchi tuklo ka hlakofichi tok.

¹⁹ Mihma nana iskitini hokmá, chito hokmá nana kia, micha ushi ʋhleha, micha ushetik ʋhleha, micha nawehpoa, micha nana kia ishi tuk moma hokʋt ik im iksho kʋt iksho tok: Lewi ʋt moma falʋmminchit ishi tok.

²⁰ Mihma Lewi ʋt chukfʋlhpoa a̱ya kaniohmi, micha wak a̱ya kanohmi aiena ka wak inla kash, itikba tihlelit isht ia mʋt, Ilʋppʋt Lewi i̱ nawehpoa yoke, achi tok.

²¹ Mihma Lewi ʋt hatak tahlepa tuklo hoyʋbli fehna hatuk osh Lewi ya̱ iakaiya he keyu ma Beso bokushi ya̱ asha chi̱ ho̱ ashachi tuk a̱ im ʋla tok; mihma yʋmmak ash osh Lewi ya̱ afama chi̱, micha apehʋt a̱ya tuk a̱ afama chi̱ hosh okla ia tok: atuk o̱ Lewi ʋt okla hash bili̱ka ʋla mʋt, aiokpʋchi tok.

²² Yohmi ma hatak nan ashʋchi, Belial hatak ʋhleha Lewi ya̱ apehʋt a̱ya ka takla a̱ya tuk momʋt afalamichit, Pi apehʋt ia tuk keyu hoka, nawehpoa falʋmminchit il ishi tuk ʋt nana achʋfa kia il ima he keyu, amba tekchi aiyukali, im ʋlla aiyukali kak o̱ il imakma, ishi cha, iashke, achi tok.

²³ Yohmi ma Lewi ʋt, Itibapishi li ʋhleha ma! Chihowa yʋmmak osh pi hlakofichi cha, okla pin tanampi tuk a̱ pibbak a̱ fohki cha, nana pima tuk oka ishit hʋsh yʋmihcha he keyu pullashke.

²⁴ Kʋta hosh ilʋppa hʋchi̱ haponakla hinla hotuma? amba itibit ia tuk ak osh kaniohmikma, na chukushpa apistikelit a̱sha tuk ak kia i̱ yʋmohma chi̱ ak inli hoke: itilaui hosh okla itakʋshkoa chi̱ hoke, achi tok.

²⁵ Atuk o̱ nitak yʋmma i̱ himmak ma̱ha̱ya ka yʋmohmi bieka ho̱ nan ʋlhpisa bilia Islael im ikbi tok o̱ himak nitak a̱ ant ʋhli hoke.

²⁶ Atuk o̱ Lewi ʋt Siklak a̱ ʋla mʋt, nawehpoa ash Chutah hatak im asʋnonchi ʋhleha it i̱ kana ʋhleha hash pit i̱ pila cha yak achi tok, Yakeh! nan isht aiokpʋchi Chihowa in tʋnʋp i̱ nawehpoa tuk ʋt hʋch immi hoke;

²⁷ Behlel a̱sha tuk, micha Lamolh im oka mahli a̱sha tuk, micha Chatti a̱sha tuk,

²⁸ Micha Aloe a̱sha tuk, micha Sifmolh a̱sha tuk, micha Eshtemoa a̱sha tuk,

²⁹ Micha Lachel a̱sha tuk, micha Chelahmeelait ʋhleha in tʋmaha holihta puta a̱sha tuk, micha Kenait ʋhleha in tʋmaha holihta puta a̱sha tuk,

³⁰ Micha Holmah a̱sha tuk, micha Cholashan a̱sha tuk, micha Ahlach a̱sha tuk,

³¹ Micha Heblon a̱sha tuk, micha Lewi ʋt, micha in tʋshka aiena kʋt ai ashʋt a̱ya chatuk puta ka pit pila tok.