1 Samuel 3 - Chahta Holisso Holitopa 1886

¹ Mihma ʋlla Samuel ʋt Eli itikba ahantʋt Chihowa ya̱ nana isht im ahanta tok. Mihma nitak yʋmma Chihowa im anumpa hʋt achafo̱a tok; Chihowa nana otʋninchi ʋt tiapa tok keyu hoke.

² Atuk o̱ nitak yʋmma yakohmi tok, Eli ʋt ai itola ya̱ itoyula mʋt, nishkin ʋt kʋniʋt isht ia na pisa he keyu tok;

³ Mihma Chitokaka i̱ pʋla hʋt Chihowa in tempel Chitokaka im itombi holitopa a talaia ya̱ hikia tuk ʋt ik mosholo ki̱sha ho̱, Samuel ʋt nusa chi̱ hosh tʋshki tok.

⁴ Mihma Chihowa ʋt Samuel a̱ i̱ howa tok: mihma afalamichit, Yak itonla lishke, achi tok.

⁵ Mihma malelit Eli ya̱ im ona cha, Yak hikia lishke, is sa̱ howa tuk oka, achi tok. Mihma, Chi̱ howa li tuk keyu, anonti tʋshkí, achi tok. Mihma ia cha, ont tʋshki tok.

⁶ Mihma himakma anonti Chihowa ʋt i̱ howʋt, Samuel ma! achi tok. Mihma Samuel ʋt wakayʋt, Eli ya̱ im ona cha, Yak hikia lishke, is sa̱ howa tuk oka, achi tok. Mihma afalamichi mʋt, Chi̱ howa li tuk keyu, sʋso ma! anonti tʋshkí, achi tok.

⁷ Mihma Samuel ʋt Chihowa ya̱ ik ithano ki̱sha, mihma Chihowa im anumpa hʋt ik im otaiyano ki̱sha hatok.

⁸ Mihma Chihowa ʋt ont atuchina ma, Samuel a̱ i̱ howa tok. Mihma wakaya cha, Eli ya̱ im ona mʋt, Yak hikia lishke, is sa̱ howa tuk oka, achi tok. Mihma Eli ʋt Chihowa ak osh ʋlla ya̱ i̱ howa tuk a̱ akostininchi tok.

⁹ Yʋmohmi hatuk osh Eli ʋt Samuel a̱, Ish ia cha, ish tʋshkashke: atukma yakohma chi̱ hoke, chi̱ howakma, Anumpulí, Chihowa ma! chin tishu hʋt ha̱klo hoka, ish achashke, im achi tok. Yohmi ma Samuel ʋt ai itola ya̱ ona cha, tʋshki tok.

¹⁰ Mihma Chihowa ʋt ont hikiʋt, tikba tuk a̱ chohmit i̱ howʋt, Samuel, Samuel, achi tok. Yohmi ma Samuel ʋt afalamichit, Anumpulí, chin tishu hʋt ha̱klo hoka, achi tok.

¹¹ Mihma Chihowa ʋt Samuel a̱, Yakeh! Islael nana a yʋmihchi la hi oke; yʋmma kʋna kia haklokmʋt, haksobish ʋt itichampʋt cha̱sa hi oke.

¹² Nitak yʋmma nana moma Eli in chuka pulla ka anumpuli li tuk ʋt yʋmihchit Eli ya̱ onochi la hi oke: micha ishit wakaya likmʋt, ont ʋhlichi la hi oke.

¹³ Nan ashʋchi ithana yʋmma pulla kak o̱ in chuka achʋfa ya̱ nan im apesa li̱ bilia chi̱ kʋt im anoli li tok: ushi ʋhleha hʋt ile hofahyali ma, ik im olabo chatuk oka.

¹⁴ Mihma yʋmohmi kak o̱ Eli in chuka achʋfa ya̱ anumpa kʋllo il onochit, Eli in chuka achʋfa nan ashʋchi nan ʋbit isht ai okpʋchi, micha ilhpak isht aiokpʋchi ya̱ ishit kashofa he keyu bilia hi oke, achi li tuk, im achi tok.

¹⁵ Mihma Samuel ʋt itonla na onna tok; mihmʋt Chihowa im aboha okhissa ya̱ tiwi tok: mihmʋt Samuel ʋt Eli ya̱ Chihowa nan otʋninchi ash im anoli kʋt nukshopa tok.

¹⁶ Yohmi ma Eli ʋt Samuel a̱ i̱ howa cha, Samuel, sʋso ma! achi tok. Mihma afalamichit, Yak hikia lishke, achi tok.

¹⁷ Mihma Eli ash osh, Nanta ho̱ Chihowa ʋt chim achi tuk o̱? is san luhmi ná, chim asilhha lishke: nana chim achi tuk moma ka nana kia is san luhmikma, Chitokaka ʋt yakohmi, micha i̱ shahli kia chi yʋmihchashke, achi tok.

¹⁸ Mihma Samuel ʋt lushummit im anoli cha, nana kia ik in luhmo tok. Mihma yʋmmak ash osh, Chihowa yoke, im ʋlhpiesa kak osh yʋmihchashke, achi tok.

¹⁹ Mihma Samuel ʋt hofantit ia tok; mihma Chihowa ʋt ibafoyuka cha, im anumpa hʋt achʋfa kia aka ik itulá, im ahni tok keyu hoke.

²⁰ Mihma Islael moma kʋt Tan ʋttʋt iʋt Bee‐sheba ont ʋhli kʋt, Samuel ʋt Chihowa i̱ hopaii tobʋt ai a̱hli ka ithaiyana tok.

²¹ Mihma Chihowa ʋt Samuel a̱ anonti Shiloh ya̱ ai i̱ haiaka tok: Chihowa ʋt Shiloh ya̱ ai im ile haiakʋchit; Chihowa im anumpa isht im ile haiakʋchi tok oke.