1 Samuel 29 - Chahta Holisso Holitopa 1886

¹ Mihma Filistin okla hʋt in tʋshka chipota moma ka hoyot Afek ak o̱ ai itʋnahli tok: mihma Islaelait ʋhleha hʋto Chesleel kʋli hikia ho̱ a binanchi tok.

² Mihma Filistin hochitoka ʋhleha hʋt tahlepa puta, micha tahlepa sipokni puta chohmi hosh ma̱ha̱ya tok: amba Lewi, micha in tʋshka ʋhleha aiena kʋt Achish a̱ apehʋt ishtaiyopi ho̱ ma̱ya tok.

³ Mihma Filistin pehlichi ʋhleha hʋt, Heblu ʋhleha ilʋppʋt nanta katiohmi hosh yak a̱sha ho̱? achi tok. Mihma Achish ʋt Filistin pehlichi ʋhleha ha̱, Ilʋppʋt Islael i̱ miko Sal a̱ in tishu hosh sa takla ahanta tok a̱ nitak kaniohmi, micha afʋmmi kaniohmi ho̱ sʋbbak a̱ fo̱ka tok itintakla nana ashʋchi na ak ahayucho himak nitak a̱ ant ʋhli keyu cho? im achi tok.

⁴ Mihma Filistin pehlichi ʋhleha hʋt i̱ nokowa tok: mihma Filistin pehlichi ʋhleha hash osh, Hatak ilʋppa falʋmminchi na ai ʋtta ish im apesa tok ak o̱ anonti, ont ik antá, micha itibit ia kʋno pi ta̱kla ik aiyo kashke, keyukma itibikma, pin tanampa hinla yoba ká: nanta hak o̱ i̱ shahli ha̱ isht il yukpala hinla̱? hatak ilʋppa puta noshkobo hak a hinla keyu̱?

⁵ Ilʋppʋt Lewi yʋmmak o̱ hihla mʋt, isht it in taloʋt, Sal ʋt tahlepa sipokni ho̱ ʋbikma, Lewi ʋt tahlepa sipokni pokoli ho̱ ʋbi yoke, it im achi tok mak keyu̱? im achi tok.

⁶ Mihma Achish ʋt Lewi ya̱ i̱ howa cha, Chihowa ʋt okcha̱ya pulla ka ai ʋlhpiesa bieka hosh ish a̱ya tuk, micha sa tikba tʋshka chipota ʋhleha ha̱ awant kohchʋt ish ia, mikmʋt ant ish chukowa aiena kʋt sa nishkin itikba ya̱ achukma bieka tuk pullʋshke; nitak yʋmma is sʋm ʋla tok ititakla ka nan ik achukmo ka ak chi ahayucho hoke; yohmi kia hochitoka yʋt ik chi ahninchoshke.

⁷ Yʋmohmi hoka ish falama cha, it i̱ kanʋt ish a̱yashke, yohmi hosh Filistin hochitoka ʋhleha ha̱ chik nokowʋcho kashke, im achi tok.

⁸ Mihma Lewi ʋt Achish a̱, Nanta ho̱ yohmi li tuk oh cho? chi takla ahanta li̱ itintakla himak nitak a̱ ant ʋhli ka chin tishu ha̱ nanta ho̱ ish ai ahayuchi tuk o̱, a̱ shahli mi̱ko in tʋnʋp a̱ itibit ia la he keyu cho? im achi tok.

⁹ Mihma Achish ʋt afalamichit Lewi ya̱, Sa nishkin itikba ya̱ chi achukma, Chitokaka im enchil ak inli chohmi tuk oke: yohmi akinli kia Filistin pehlichi ʋhleha hʋt, Itibit ia ka pi awant ia he keyú, achi tuk oka, im achi tok.

¹⁰ Yʋmohmi hoka onna hayʋt onnahinli moma na ish wakaya cha, chi̱ shahli in tishu ʋhleha hʋt chitapehʋt ʋla tuk a̱ pehlichit, micha onnahinli moma na hʋsh tani cha, hʋchin tohwikelikmʋt, hʋsh iashke, im achi tok.

¹¹ Yohmi ho̱ Lewi, micha in tʋshka ʋhleha aiena kʋt falamʋt, Filistin okla i̱ yakni ia chi̱ hosh onna hayʋt onnahinli moma na wakaya tok. Mihma Filistin ʋhleha hash osh Chesleel a̱ ona tok.