1 Samuel 28 - Chahta Holisso Holitopa 1886

¹ Atuk o̱ nitak yʋmma yakohmi tok, Filistin okla hʋt tanampit Islael a̱ itiba chi̱ hosh tʋshka chipota laua ya̱ hoyot itʋnahli tok. Mihma Achish ʋt Lewi ya̱, Chishno, micha chin tʋshka ʋhleha aiena kʋt si awant itibit hʋsh ia chi̱ kʋt ish ithaiyana pullashke, im achi tok.

² Mihma Lewi ʋt Achish a̱, Chin tishu hʋt kaniohmicha hinla ka ish ithana pulla chi̱ hoke, achi tok. Mihma Achish ʋt, Sa noshkobo atoni bilia chikbi la chi̱ hoke, im achi tok.

³ Mihma Samuel ʋt illi na Islael moma kʋt ishit yaiya cha, Lamah in tʋmaha holihta ak inli hohpi tok atok. Mihma Sal ʋt nana a hulhkunna puta, micha ishtahullo puta aiena ka yakni yash akohchi tuk atok.

⁴ Mihma Filistin ʋhleha hʋt itihoyot itʋnaha cha, Shunem ak o̱ ont a binanchi tok; mihma Sal ʋt Islael moma ka hoyot itʋnahli cha, Kilboa yak o̱ abinanchi tok.

⁵ Mihma Sal ʋt Filistin tʋshka chipota laua ya̱ pisa mʋt, nukshopa cha, chu̱kʋsh ʋt wʋnihinchi fehna tok.

⁶ Mihma Sal ʋt Chihowa ya̱ i̱ ponaklo kia, Chihowa ʋt afalamichit nana ik acho tok, holhpokna hokma, Ulim okma, hopaii okma, nana kia isht ik im anolo tok.

⁷ Yohmi ma Sal ʋt in tishu ʋhleha ha̱, Ohoyo nana a hulhkunna ya̱ hʋs sa̱ hoyashke; mikma im ona lish, i̱ ponaklo lashke, im achi tok. Mihma in tishu ʋhleha hʋt, Yakeh! ohoyo nana a hulhkunna ʋt Ento yak o̱ antʋshke, im achi tok.

⁸ Mihma Sal ʋt inla ilahobit nafohka inla fohka mʋt, hatak tuklo ho̱ pehlichi cha ia mʋt, ninak o̱ ohoyo yash ai ʋtta ka ona tok: micha, Ishtahullot, kʋna ho̱ chi̱ hochifo likma, is san tanichashke, chim asilhha lishke, achi tok.

⁹ Mihma ohoyo hash osh, Yakeh! Sal ʋt kaniohmichi tuk a̱ ish ithanʋshke, nana a hulhkunna puta, micha hatak ishtahullo puta aiena ka mominchit yakni yash ʋbit tahli tuk oke; yohmi ka nanta katiohmi ho̱ nan ishkanʋpa ishit sʋlla chi̱ ka sa tikba is sa̱ bohli cho̱? im achi tok.

¹⁰ Mihma Sal ʋt Chihowa hochifot anumpa kʋllo il onochit i̱ miha cha, Chihowa ʋt okcha̱ya pulla ka nana ilʋppak oka na hotopa nana kia ishit chi onʋtola he keyu hoke, achi tok.

¹¹ Yohmi ma ohoyo hash osh, Kʋta ho̱ chin tanichi la chi̱ cho? achi tok. Mihma yʋmmak ash osh, Samuel ak o̱ an tanichí, achi tok.

¹² Mihma ohoyo hash osh Samuel a̱ pisa mʋt, chitoli hosh pa̱ya tok: micha ohoyo hash osh Sal a̱ im anumpulit, Nanta katiohmi ho̱ is sa haksichi cho? Sal chia hoke, achi tok.

¹³ Mihma mi̱ko ash osh, Chi nukshopa ná, nanta ish pisa cho? im achi tok. Mihma ohoyo hash osh Sal a̱, Chitokaka holba hosh yakni ya̱ a kohcha ho̱ pisa lishke, im achi tok.

¹⁴ Mihma Sal ʋt, Pisaka katiohmi cho? im achi tok. Mihma, Hatak sipokni yosh kohchʋt minti mʋt, anchi yo̱ ai anchishke, achi tok. Mihma Sal ʋt Samuel atuk o̱ akostininchi mʋt, nashuka ak o̱ pit ishit hlipia cha, akachunoli tok.

¹⁵ Mihma Samuel ʋt Sal a̱, Nanta katiohmi ho̱ si ataklʋmmit is sa tanichi cho? im achi tok. Mihma Sal ʋt afalamichit mʋt, Sa komunta fehna hoke: Filistin okla hʋt an tanampi ma, Chitokaka yʋt a̱ filʋmmi cha, himakma hopaii, keyukmʋt holhpokna hoh kia anumpa falama ka isht ik samoshke: yʋmohmi kak o̱ nana kaniohmi la chi̱ ka is sʋm anola chi̱ ho̱, chi hoyo li tuk oke, achi tok.

¹⁶ Yohmi ma Samuel ʋt, Chihowa ʋt chi̱ filʋmmi cha, chin tʋnʋp toba hokak o̱, nanta katiohmi ho̱ is sam ponaklo cho? achi tok.

¹⁷ Micha Chihowa ʋt sa tohno na anumpuli li tok mak o̱ yʋmihinchi hoke: Chihowa ʋt apehlichika ya̱ mokofit chim ai ishi cha, ish ai itilaui Lewi yak o̱ ima tuk oke.

¹⁸ Chihowa im anumpa ha̱ chik im antiot, im ai i̱ nukkilli libbi ya̱ aia̱hlichit Amalek a̱ chik onocho tok; yohmi tok ak o̱ himak nitak a̱ Chihowa ʋt chi yakohmichishke.

¹⁹ Micha Chihowa ʋt Islael, micha chishno aiena ka Filistin ʋhleha ha̱ ibbak a̱ chi fohka chi̱ hoke; micha onnakma chishno, micha chiso ʋhleha hʋsh aiena kʋt hʋs sʋba fohka chi̱ hoke. Chihowa ʋt Islael tʋshka chipota ʋhleha hak kia Filistin ʋhleha ibbak a̱ fohka chi̱ hoke, achi tok.

²⁰ Yohmi ma Sal ʋt yakosi ititakla chisemo hosh aka ont itola cha, Samuel ʋt anumpuli tuk ak o̱ nukshopa fehna tok: micha imi̱ hlampko ʋt iksho tok; nitak achʋfa ka shohbit, micha ninak achʋfa ka ont hlopullit pʋska ik po hatuk okʋt.

²¹ Mihma ohoyo hash osh Sal ai itonla ka ona cha, nukshopʋt wʋnihinchi fehna ho̱ pisa mʋt, Yakeh! chin tishu ohoyo hʋt chim anumpa ha̱ im antiʋt, ʋm ilhfiopak a̱ sʋbbak a̱ fohkit ieshi lish, ish anumpuli ka haklo li tuk oke.

²² Yʋmohmi hoka himak a̱ chin tishu ohoyo anumpuli ka ish haklo ak inlashke, chim asilhha lishke; mikma pʋska tushafa chi tikba talali lashke: mikma ish impa cha, ish ata̱ya hetuk ʋt chimi hlampko a̱sha hosh ish a̱yashke, im achi tok.

²³ Yohmi kia ik haklo hosh, Impa la he keyu, achi tok. Yohmi kia in tishu ʋhleha, micha ohoyo hash aiena kʋt im achunanchi na im anumpa ha̱ haklo tok. Yohmi mʋt aka itoyula tuk ʋt wakaya cha, topa pakna binili tok.

²⁴ Mihma ohoyo hʋt wak ushi nia yosh aboha ya̱ im anta tok; micha tu̱shpʋt ʋbi tok, micha bota tohbi ishi cha, yamʋsli mʋt, pʋska ik shatʋmmo yo̱ pʋska tok.

²⁵ Mihmʋt Sal, micha in tishu ʋhleha itikba ya̱ ant talali na okla impa tok. Yohmi mʋt okla wakaya cha, ninak yʋmmak inli ho̱ ilhkoli tok.