1 Samuel 27 - Chahta Holisso Holitopa 1886

¹ Mihma Lewi ʋt chu̱kʋsh anu̱kaka anukfillit, Nitak kanima ka Sal ibbak a̱ ishit sʋlla chi̱ hoke: chekosi malelit Filistin okla i̱ yakni ya̱ ona li kak osh ʋm ʋlhpesa hoke; mikma nantihma wa! Sal ʋt si ahnikmʋt, himmakma Islael aiasha fullota ka ik sa hoyo ka chi̱ hoke: yohmi hosh ibbak a̱ i̱ hlakofi lashke, achi tok.

² Micha Lewi ʋt wakaya cha, hatak tahlepa hannali apehʋt aiasha tuk a̱ ishit hlopullit iʋt, Maoch ushi Achish Kalh i̱ mi̱ko ya̱ im ona tok.

³ Micha Lewi ʋt Achish a̱ takla Kalh a̱ ahanta tok, yʋmma, micha in tʋshka ʋhleha aiena, hatak puta kʋt in chuka achʋfa pehlichi bieka hosh, Lewi ak kia tekchi tuklo, Chesleel ohoyo Ahinoam, micha Kamel ohoyo Nabal tekchi atok Abikail aiena pehlichi hosh aiasha tok.

⁴ Atuk o̱ Lewi ʋt malelit Kalh a̱ ona ka Sal a̱ im annoa tok: micha himmakma anonti ik hoyo tok.

⁵ Mihma Lewi ʋt Achish a̱, Chi nishkin isht i̱ kana chi ai ahayuchi li tuk okma, yakni haiaka tʋmaha ya̱ okla ʋmakma, yʋmmak o̱ ai ʋtta lashke: nanta katiohmi ho̱ mi̱ko in tʋmaha holihta chi takla ahanta la hinla cho? im achi tok.

⁶ Yohmi ma Achish ʋt nitak yʋmma Siklak ak o̱ ima tok: yʋmohmi tok o̱ Siklak ʋt Chutah i̱ mi̱ko ʋhleha ha̱ im aiena kʋt himak nitak a̱ imoma hoke.

⁷ Mihma Lewi ʋt Filistin okla i̱ yakni ahanta kʋt afʋmmi achʋfa ʋlhpiesa cha, hʋshi ushta tok.

⁸ Mihma Lewi, micha in tʋshka ʋhleha aiena kʋt iʋt Keshulait okla, micha Keslait okla, micha Amalekait okla aiena ka in tanampit ibachukowa tok: oklushi yʋmmʋt yakni yʋmma Shu ya̱ ish ia kʋt Echip yakni ont ʋhli ka cha̱shpo pilla inli ho̱ aiasha atok.

⁹ Mihma Lewi ʋt yakni aiasha ka ʋbit tahli cha, hatak, micha ohoyo aiena ka ik apoancho tok; micha chukfʋlhpoa, micha wak, micha issuba haksobish falaia, micha kamel, micha nafohka aiena ka ishi cha, falamʋt Achish aiʋtta ya̱ ona tok.

¹⁰ Mihma Achish ʋt, Katima yak o̱ himak nitak a̱ in tanampit ont ish falama cho? achi tok. Mihma Lewi ʋt, Chutah im oka mahli, micha Chelahmeelait okla im oka mahli, micha Kenait okla im oka mahli ak atuk oke, achi tok.

¹¹ Mihma Lewi ʋt achi kʋt, Pi anolit yak ahanchi yoba ná, Lewi ʋt yakohmichishke yohmi kʋt Filistin okla i̱ yakni ahanta ta̱kla kʋt yʋmmak o̱ yohma chi̱ hoke, achi hosh anumpa Kalh a̱ isht ona hi a̱, hatak, micha ohoyo aiena ka ik okchalincho ki tok.

¹² Mihma Achish ʋt Lewi ya̱ i̱ yimmi cha, im okla Islael a̱ yuwalʋchit kaiyanchishke; yohmi hoka an tishu bilia chi̱ hoke, achi tok.