1 Samuel 26 - Chahta Holisso Holitopa 1886

¹ Mihma Sifait ʋhleha hʋt Sal aiʋtta Kibeah ya̱ ona cha, Lewi ʋt Hachilah nʋnih Cheshimon itikba aluma keyu̱? achi tok.

² Yohmi ma Sal ʋt wakaya cha, Sif yakni haiaka ya̱ iʋt, Islael hatak aiyua tahlepa sipokni tuchina ho̱ pehlichi cha, Sif yakni haiaka yak o̱ Lewi ya̱ a hoya chi̱ hosh ona tok.

³ Mihma Sal ʋt Hachilah nʋnih Cheshimon ichapaka hina takla yak o̱ binanchi tok. Amba Lewi ʋto yakni haiaka ahanta cha, Sal ʋt hoyot yakni haiaka ya̱ minti ka pi̱sa tok.

⁴ Yohmi ma Lewi ʋt napisa ya̱ tihleli tok; atuk osh Sal ʋt ʋla kʋt a̱hli fehna ho̱ haklo tok.

⁵ Atuk osh Lewi ʋt wakaya mʋt, Sal ʋt abinanchi tuk a̱ ona tok: micha Sal, micha Ne ushi Abne tʋshka chipota i̱ kʋpitʋni aiena kʋt ai itola ka Lewi ʋt pisa tok. Mihma Sal ʋt itichanʋlli hiohlit apakfoyupa ho̱ anu̱kaka itoyula ma, okla hʋt binanchit apakfoyupa tok.

⁶ Yohmi ma Lewi ʋt Ahimelech Hitait a̱, micha Seluiah ushi Abishai, Choab itibapishi itatuklo ka, Kʋta hosh Sal im ʋlbina ha̱ si awant ia chi̱ cho? im achi tok. Mihma Abishai ʋt, Ʋno ak osh ia lashke, achi tok.

⁷ Yohmi ho̱ Lewi, micha Abishai itatuklo kʋt ninak o̱ okla hash itonachi tok: mihma yakeh! Sal ʋt itichanʋlli hiohlit apakfoyupa ho̱ anu̱kaka itonlʋt nusi ma, micha tʋbi tʋli halupa ontʋla ʋt im ʋlhpishi bili̱ka yo̱ yakni ishit nʋhlit hikia na itoyula tok: mihma Abne, micha okla aiena kʋt kahʋt apakfoyupa tok.

⁸ Mihma Abishai ʋt Lewi ya̱, Chitokaka yʋt himak nitak a̱ chin tʋnʋp a̱ chibbak a̱ fohkishke: yohmi hoka himak a̱ tʋbi tʋli halupa ontʋla ya̱ himonna achʋfa ho̱ ishit nʋhlit yakni pit shamʋllichi lashke, chim asilhha lishke, micha hitukla ha isso la he keyu, achi tok.

⁹ Mihma Lewi ʋt Abishai ya, Ish bi ná: kʋta hosh Chihowa nan ahamʋt im ʋlhtoka ya̱ ibbak a̱ o̱ wielit i̱ sanali kʋt nana ik ashʋcho ka he keyu hoka, im achi tok.

¹⁰ Micha Lewi ʋt achakalinchit, Chihowa ʋt okcha̱ya pulla kʋt Chihowa ʋt issa hi oke; keyukma illa he nitak ʋt im ʋla hi oke: keyukmʋt tʋnʋp ia cha, illa hi oke.

¹¹ Chihowa nan ahamʋt im ʋlhtoka ya̱ sʋbbak a̱ o̱ wielit i̱ sanali la he a̱ Chihowa ʋt ʋm olʋbashke: yohmi kia tʋbi tʋli halupa ontʋla ʋt im ʋlhpishi bili̱ka hikia kak o̱ ish ishi cha, isht ishko oka ʋlhto kak o̱ ish ishi na il iashke, achi tok.

¹² Yohmi ho̱ Lewi ʋt tʋbi tʋli halupa ontʋla, micha isht ishko oka ʋlhto im ʋlhpishi bili̱ka talaia tuk a̱ ishi tok: yohmi cha iʋt okla tuk kia, hatak nana kia ik peso, micha ik akostinincho, micha ik okcho tok: momʋt nusit aiasha hatuk osh; Chihowa ʋt ik yohmí ahni na nusi kʋllo kʋt onʋtola hatok oka.

¹³ Yohmi ma Lewi ʋt misha tʋnnʋp ona cha, nʋnih hopaki paknaka ho̱ o̱ hikia tok, ititakla chito yosh takanli tok.

¹⁴ Mihma Lewi ʋt okla ha̱, micha Ne ushi Abne ya̱ pit i̱ pa̱yʋt, Abne chia hʋt anumpa falama ka chik anumpulo cho? im achi tok. Yohmi ma Abne ʋt afalamichit, Kʋta chia hosh mi̱ko ya̱ ish i̱ pa̱ya cho? achi tok.

¹⁵ Mihma Lewi ʋt Abne ya̱, Nakni chia keyu cho? micha Islael a̱ kʋta hosh chishno chohmi kʋt anta cho? Yʋmohmi hokak osk nanta katiohmi ho̱ chi̱ shahli mi̱ko ya̱ chik apistikelo tuk oh cho? mi̱ko chi̱ shahli ha̱ okla hash ai achʋfa kʋt ʋba chi̱ hosh ona tuk oka.

¹⁶ Ilʋppa nana ish yʋmihchi tuk ʋt ʋlhpesa keyushke. Chihowa nan ahamʋt im ʋlhtoka hʋchi̱ shahli ha̱ hʋch ik apistikelo kʋt, Chihowa hʋt okcha̱ya pulla ka hʋch illa he ʋlhpesʋshke. Yohmi ka himak a̱ pisá, mi̱ko in tʋbi tʋli halupa ontʋla, micha im isht ishko oka ʋlhto im ʋlhpishi bili̱ka talaia tuk mʋto? im achi tok.

¹⁷ Mihma Sal ʋt Lewi itih ha̱ ithana cha, Sʋso Lewi ma! ilʋppʋt chiteh hoh cho? achi tok. Mihma, Sʋteh hoke, a̱ shahli mi̱ko ma! Lewi ʋt achi tok.

¹⁸ Micha, Nanta katiohmi ho̱ a̱ shahli hʋt in tishu ha̱ hliolit ish a̱ya cho̱? nanta ho̱ katiohmi li tuk oh cho? ak cho? nana ik achukmo nanta hosh sʋbbak a̱ foyuka cho?

¹⁹ Yʋmohmi ka himak a̱ a̱ shahli mi̱ko yʋt in tishu im anumpa ha̱ haklashke, chim asilhha lishke. Chihowa ak osh is sʋm asanala chi̱ ho̱ chi nukfohki hatuk okma, nan isht aiokpʋchi ya̱ aiokpʋchashke: amba hatak im ʋlla ʋhleha ak atuk okmʋt, Chihowa itikba ya̱ na palʋmmi kʋt onʋtolashke: Chihowa im ai isha he ʋlhpesa ya̱ ahanta la hetuk a̱ himak nitak a̱ kohchit sa chʋffichi cha, Iʋt okla inla i̱ naholbʋt toba puta yak o̱ im antiá, ʋm achi hokʋt.

²⁰ Yʋmohmi ka himak a ʋm issish ʋt Chihowa nashuka itikba ya̱ aka ik itolo kashke: Islael i̱ mi̱ko ʋt, achʋfa hosh nʋnih foka kofi hoyot a̱ya chohmit, kʋshti ho̱ hoya chi̱ hosh kohchʋt a̱ya hoka, achi tok.

²¹ Yohmi ma Sal ʋt, Sai yoshubʋshke: falamá, sʋsso Lewi ma! himmakma chi hotopali la he keyu hoka, himak nitak a̱ chi nishkin ʋt pisa ka ʋmi shilombish ʋt holitopa tuk oka: yakeh! im anukfila iksho a yʋmohmi yo̱ si yʋmohmi cha, ashʋchi li fehnʋshke, achi tok.

²² Mihma Lewi ʋt afalamichit, Yakeh! mi̱ko in tʋbi tʋli halupa ontʋla yash, hatak himithoa ai achʋfa kʋt ant isht ik oná.

²³ Chihowa ʋt ai ʋlhpiesa, micha ai a̱hli kak o̱ hatak puta ka im apesashke: himak nitak a̱ Chihowa ʋt sʋbbak a̱ chi fohki kia, Chihowa nan ahamʋt im ʋlhtoka ya̱ sʋbbak a̱ o̱ wielit i̱ sanali li tuk keyu hoka.

²⁴ Micha yakeh! himak nitak a̱ chim ilhfiopak a̱ sa nishkin ʋt holitobli fehna tuk oka, yʋmohmit ʋm ilhfiopak a̱ Chihowa nishkin ʋt holitobli fehna cha, nana ai ilbʋsha moma ka sa hlakofichashke, achi tok.

²⁵ Yohmi ma Sal ʋt Lewi ya̱, Chi holitopashke, sʋso Lewi ma! nana chinto ka ish yʋmihchi cha, ish imaiya akinla chi̱ hoke, achi tok. Yohmi ma Lewi ʋt i̱ hina fohkʋt ia ma, Sal ʋt falamʋt aiʋtta ya̱ ona tok.