1 Samuel 25 - Chahta Holisso Holitopa 1886

¹ Atuk o̱ Samuel ʋt illi tok: mihma Islaelait moma kʋt iti hoyot itʋnaha cha, ishit yaiyʋt, in chuka Lamah ya̱ hohpi tok. Mihma Lewi ʋt wakaya mʋt, iʋt Palan yakni haiaka ya̱ ona tok.

² Mihma Maon ʋtta hatak osh imi̱la̱yak ʋt Kamel ak o̱ a̱sha tok: micha hatak yʋmmʋt imi̱la̱yak chinto fehna cha, chukfʋlhpoa ʋt tahlepa sipokni tuchina, micha issi kosoma tahlepa sipokni achʋfa aiena hosh im a̱sha tok: micha Kamel ak o̱ chukfʋlhpoa hishi ʋmo hosh anta tok.

³ Micha hatak ʋt hohchifo kʋt, Nabal atok; micha tekchi ʋt hohchifo kʋt Abikail atok: micha ohoyo im anukfila achukma cha, pisa aiokli hatok: amba hatak ʋto ba̱sh iksho, micha nana akaniohmi kʋt ik achukmo hatok; micha Kaleb in chuka achʋfa ai achʋfa hatok.

⁴ Mihma Nabal ʋt chukfʋlhpoa hishi ʋmo ho̱ Lewi ʋt yakni haiaka antʋt haklo tok.

⁵ Mihma Lewi ʋt hatak himithoa pokoli ho̱ pila cha, Lewi ʋt hatak himithoa ya̱, Kamel a̱ oh ona cha, Nabal a̱ im onʋt, sa hochifot hʋsh aiokpʋchashke.

⁶ Micha hatak nan im ʋlhtaha achukma hosh ahanta ka, Achukma̱kʋt ish ahantashke, chin chuka achʋfa ʋt achukma̱kʋt aiashashke, micha nana chim a̱sha moma kʋt achukma̱kʋt aiashashke, hʋsh im achashke.

⁷ Himak a̱ chukfʋlhpoa hishi ʋmo ʋt chim a̱sha miha ka haklo lishke: yohmi ka chin chukfʋlhpoa apistikeli ʋhleha hʋt pi takla aiasha ma, e hotopali tok keyu; micha Kamel a̱ aiasha moma ma, nana achʋfa kia i̱ kʋnia tok keyu hoke.

⁸ Hatak himithoa puta chim a̱sha ka ish i̱ ponaklokma chim anola hinla hoke. Yʋmohmi ka nitak achukma ho̱ e la hoka, hatak himithoa ʋt chi̱ holhponayo a chi ahayuchashke, chim asilhha lishke: nana hosh chibbak ont fo̱kakmʋt, hatak himithoa, micha chiso Lewi ya̱ ish imashke, hʋsh im achashke, im achi tok.

⁹ Atuk o̱ hatak himithoa Lewi im a̱sha tuk ʋt ona mʋt, anumpa ilʋppa puta kak o̱ Lewi hochifot anumpulit ont tahli mʋt, issa tok.

¹⁰ Mihma Nabal ʋt afalamichit, Lewi in tishu ʋhleha ha̱, Kʋta hosh Lewi yo̱? micha kʋta hosh Chesse ushi yo̱? nitak himak a̱ fokali ka tishu laua kʋt i̱ shahli ha̱ i̱ mokofʋt kʋnia hosh aiashʋshke.

¹¹ Yohmi ka am pʋska, micha ʋm oka, micha a̱ nipi yʋmma chukfʋlhpoa hishi ʋm ʋmo yak o̱ im ʋbi li tuk ʋt ishi lish, hatak kanima minti ya̱ ak ithano kʋt ima la hinla cho? achi tok.

¹² Yohmi ho̱ hatak himithoa Lewi ya̱ im a̱sha yash osh filema cha, anonti ia tok; micha ona mʋt, anumpa ilʋppa puta ka im anoli tok.

¹³ Mihma Lewi ʋt in tʋshka ʋhleha hash, Hatak puta kʋt i̱ bʋshpo falaia ya̱ isht il ʋskofʋchashke, im achi tok. Mihma hatak puta kʋt i̱ bʋshpo falaia aiyukali ka okla isht il ʋskofʋchi tok: mihma Lewi ak kia i̱ bʋshpo falaia ya isht il ʋskofʋchi tok: mihma Lewi ya̱ iakaiyʋt ia kʋt tahlepa ushta foka ma, tahlepa tuklo kʋto i̱ nachukushpa yak o̱ aiasha tok.

¹⁴ Yohmi kia hatak himithoa ai achʋfa kʋt Nabal tekchi Abikail a̱ im anolit, Yakeh! Lewi ʋt yakni haiaka ʋttʋt anumpa shali ya̱ pi̱ shahli ya̱ et in tihleli tuk ak o̱ i̱ nokowʋt hofahyalit namihachi fehna tuk oke, achi tok.

¹⁵ Amba hatak ʋhleha yʋmmʋt achukma fehna hatuk ak o̱ ik pi hotopalo ketuk; micha yakni haiaka ya̱ il a̱sha moma cha, it apehʋt il asha moma kʋt, nana kia ik pi̱ kʋnio tok.

¹⁶ Chukfʋlhpoa il apistikeli ta̱kla kʋt il aiasha moma ma, ninak, micha nitak aiena ka holihta pin chiyuhmi tok.

¹⁷ Yʋmohmi hoka himak a̱ ish anukfilli cha, nana ish kaniohma chi̱ kʋt ish ithaiyanashke: nana ik achukmo ho̱ pi̱ shahli, micha in chuka achʋfa aiena ka im anukfilʋt isht i̱ sanali hoka: Belial ushi ak o̱ ohmi ka kʋna hosh im anumpula he keyu hoka, achi tok.

¹⁸ Mihma Abikail ʋt tu̱shpʋt pʋska lumbo tahlepa tuklo, micha oka pa̱ki kotoba tuklo, micha chukfʋlhpoa ʋt bʋshʋt ʋlhtaha ʋt tahlapi, micha onush ʋlwʋsha ʋt ʋlhpisa tahlapi, micha pa̱ki shila champuli lokoli ʋt tahlepa achʋfa, micha fik palʋska tahlepa tuklo aiena ka ishit issuba haksobish falaia shapolichi tok.

¹⁹ Micha in tishu ʋhleha ha̱, Sa tikba oh iá: yakeh! chiakaiyʋt ma̱ya la chi̱ hoke, im achi tok. Yohmi kia i̱ hatak Nabal a̱ ik im anolo tok.

²⁰ Atuk o̱ yakohmi tok, issuba haksobish falaia om binilit a̱ya mʋt, nʋnih ai atuko ho̱ ont apakfopa tok; mihma yakeh! Lewi, micha in tʋshka aiena kʋt ichapaka minti ma ont afama tok.

²¹ (Lewi ʋt, Peh pilla ho̱ hatak ilʋppa nana im a̱sha moma ka yakni haiaka ya̱ ai im apistikeli li̱ nana kia immi hʋt ik kʋnio toshke: micha nana achukma kash ik achukmo ho̱ a̱ falʋmminchishke.

²² Yakohmi, micha i̱ shahli kia Chitokaka ʋt Lewi in tʋnʋp a̱ yʋmihchashke, onnahinli tohwikeli itintakla ka nana hosh im aiasha tuk moma nakni kia apoanchilikma, achi hatuk atok.)

²³ Mihma Abikail ʋt Lewi ya̱ pisa mʋt, tu̱shpʋt issuba haksobish falaia ya̱ akowa cha, Lewi itikba ya̱ nashuka ishit hlipiʋt, aka pit akachunoli tok;

²⁴ Micha iyi itikba hlipia cha, A̱ shahli ma! nanashʋchi ilʋppʋt ʋno ak o̱, ʋno pulla kak o̱ si onʋtolashke: micha ish ha̱klo na chin tishu ohoyo hʋt anumpulashke, micha chin tishu ohoyo im anumpa ha̱ ish haklashke, chim asilhha lishke.

²⁵ A̱ shahli hʋt Belial hatak ilʋppa Nabal fehna ka na yakohmi ik ahno kashke, chim asilhha lishke: hohchifo hʋt yʋmmak okʋt im a̱hli hoka: hohchifo kʋt Nabal atuk osh im anukfila iksho hoke: amba chin tishu ohoyo sia hokʋto a̱ shahli hʋt pit pila tuk hatak himithoa ya̱ ak peso tuk oke.

²⁶ Yʋmohmi hoka himak a̱ a̱ shahli ma! Chihowa ʋt okcha̱ya pulla ka, micha chimi shilombish ʋt okcha̱ya pulla ka, Chihowa ʋt chi̱ katʋbli na ʋlʋt issish chik hlatʋblo, micha chishno chibbak akinli ho̱ ishit chik ilaiokhoshke; yohmi ka chin tʋnʋp puta, micha a̱ shahli ha̱ nana ik achukmo ka im ahni puta kʋt Nabal ak o̱ chohmashke.

²⁷ Micha himak a̱ nahʋlbina chin tishu ohoyo hʋt a̱ shahli ha̱ isht im a̱ya tuk a̱ hatak himithoa ʋhleha a̱ shahli iakaiya tuk ak o̱ imashke.

²⁸ Chin tishu ohoyo nan ashʋchi ya̱ ish i̱ kashofashke, chim asilhha lishke: Chihowa ʋt a̱ shahli ha̱ chuka kʋllot hikia ho̱ im ikba chi̱ pulla hoka: a̱ shahli hʋt Chihowa ya̱ im itibi cha, chi̱ nitak moma ka nana ik achukmo kʋt chi a takalit haiaka tok keyu hoka,

²⁹ Yohmi kia hatak ʋt wakaya cha, chi hliolit, chimi shilombish a̱ hoho̱yoshke: yohmi kia a̱ shahli imi shilombish ʋt chin Chitokaka Chihowa im ai okcha̱ya talakchi ya̱ iba talaiyakcha hi oke; micha chin tʋnʋp imi shilombish okʋno ishit pila pilʋt kanchi kʋt ishit pila iklʋna yo̱ fohki cha, pila ka chohmicha hi oke.

³⁰ Atukma yakohma he, Chihowa ʋt a̱ shahli ha̱ nana achukma puta yʋmihcha he miha tok puta kʋt aia̱hlichi cha, Islael pehlichi chi atokolikma.

³¹ Nana kaniohmi keyu ho̱ issish hlatʋbli tok osh, keyukmʋt a̱ shahli hʋt ilap akinli hosh il aiokha tok osh ilʋppa isht ik chi nukha̱klo cha, a̱ shahli hʋt chu̱kʋsh ik nʋhlo kashke: amba Chihowa ʋt achukma ho̱ a̱ shahli ha̱ yʋmihchikma, chin tishu ohoyo ha̱ ish ithaiyanashke, achi tok.

³² Yohmi ma Lewi ʋt Abikail a̱, Islael in Chitokaka Chihowa, yʋmmak osh et chi pila na himak nitak a̱ is si afama tuk ʋt holitopashke.

³³ Micha chim anumpa is sa̱ miha kʋt holitopashke, micha chishno ʋt chi holitopashke, chishno pulla hosh a̱ katʋbli na himak nitak a̱ issish ak hlatʋblo, micha sʋbbak akinli ho̱ isht ak il aiokhoshke.

³⁴ A̱hli fehna, tu̱shpa hosh issi afama keyu tuk ma, Islael in Chitokaka Chihowa yʋmmak osh chi hotopali la chin tuk a̱ katʋbli tuk ʋt okcha̱ya pulla ka onnahinli tohwikeli itintakla ka nakni kia Nabal a̱ im okcha̱ya hetuk keyushke, im achi tok.

³⁵ Isht im a̱ya tuk a̱ ibbak foyuka ka Lewi ʋt ishi cha, Chi achukma̱kʋt chin chuka ish iashke: yakeh! chim anumpa ha̱ haklo lish, chi aiokpʋchi li hoke, im achi tok.

³⁶ Mihma Abikail ʋt Nabal aiʋtta ka ona tok: mihma yakeh! Nabal ʋt mi̱ko impʋchi chohmit in chuka ya̱ ai impʋchi hosh ahanta tok: mihmʋt Nabal ʋt chu̱kʋsh im achukma tok haksi fehna hatuk osh: yʋmohmi ma nana ola takla, micha atampa kia ik im anolo ho̱, ont onnʋt tohwikeli tok.

³⁷ Atuk oh kia yakohmi tok, onnahinli ak o̱ oka pa̱ki ʋt i̱ kʋniʋt taha ma, tekchi ʋt ilʋppa puta ka im anoli ma, chu̱kʋsh ʋt illi mʋt, tʋli nana kia chohmi tok.

³⁸ Atuk o̱ yakohmi tok, nitak pokoli foka ma Chihowa ʋt Nabal a̱ isso na illi tok.

³⁹ Mihma Nabal ʋt illi na Lewi ʋt haklo mʋt, Nabal ibbak pulla ho̱ ishit sa hofahya tuk a̱ Chihowa ʋt si apehpoa, micha in tishu nana ik achukmo yʋmohma hetuk a̱ i̱ katʋbli kʋt holitopashke: Chihowa ʋt Nabal nan ashʋchi tuk a̱ ilap noshkobo ak inli ho̱ onochi hoka, achi tok. Mihmʋt Lewi ʋt Abikail a̱ ishit itauwaya chi̱ hosh anumpa pilʋt it im anumpuli tok.

⁴⁰ Atuk o̱ Lewi in tishu ʋhleha hʋt Abikail ai ʋtta Kamel a̱ ona mʋt, im anumpulit, Lewi ʋt isht e chi ona na ish auwaya chi̱ ho̱ et chi̱ pi pilʋshke, achi tok.

⁴¹ Mihma wakaya mʋt, nashuka ya̱ aka pit isht akachunoli cha, Yakeh! chin tishu ohoyo hʋt peh tishu hosh a̱ shahli in tishu ʋhleha ha̱ iyi ya̱ achifa yashke, achi tok.

⁴² Mihma Abikail ʋt tu̱shpʋt wakayʋt, issuba haksobish falaia om binili ma, ohoyo himithoa tahlapi hosh iakaiya tok; mihma Lewi im anumpa shali ʋhleha ha̱ iakaiyʋt ia cha, tekchi toba tok.

⁴³ Mihma Lewi ʋt Chesleel ohoyo Ahinoam ak kia ishi tok; mihma itatuklot tekchit okla tok.

⁴⁴ Amba Sal ʋt ushetik Michal Lewi tekchi yatuk a̱ Laish ushi Falti Kallim ʋtta yak o̱ i̱ bohli tok.